Doma 10 - El Nuevo Testamento en matsés

Isadaidbo Nuquin Papan Chiaid Bëda chuibante bunaid

¹ Tantia, cun utsibo. Mibitedi chuinu. Isadaidbo tantiaquin cuidenquio icquin abided cuidadaid Esus tantiamesho mibëd tabadmequido icme, quequin ubi bunaid Nuquin Papa chiannembi.

² Esus tantiabi icquin umbi chuidennecpadombuen chiec: Nuquin Papan chiacpadombuenuidi naquin bëdambuen ismembi, quebuedombi aidon bëdambuen ismete tantienquio iquec.

³ Nuquin Papa matses bëdambuen iste bunquid nec, quequin tantiatiadquidi isadaidbon tantienquio iquec. Aidon: Ambi chiacpadombuen naquin umbimbo bëdambuen ismembi, quequin tantiaquimbi Nuquin Papan: Umbi chiacpadombuen nasho icsaisabimbuecnuc bëdambuen isendambi, quequin chiaid tantienquio iquec.

⁴ Ënden Nuquin Papan: Naden nata, quequin chiacpadombuen matsesën nasho bëdambuen isembi, quedennedëmbi nëbi Esuquidistu tantiasho Nuquin Papan ambi chiampicpadombuen matses icsaisabimbuecnuc bëdambuen isendac.

⁵ Nuquin Papan: Naden nata, quequin Chiaid tantiaquin Moisesën naden chuiquin dada uapampic: Ambi chiacpadombuenuidi naquid icsho Nuquin Papan bëdambuen isquin abëdi tabadmendac, quequin chuipampic.

⁶ Aden chiampid icnuc Esuquidistu tantiate icnuc naden tantiaquin chienda: ¿Tsutsi abuc nidpatsiash? quequin aid chuiquin Esuquidistu abucuësh budte chiec nec.

⁷ Nadembidi chienda. ¿Tsutsi nidaid shëcuë ëquëducquio icquid yacno uincuenmenuec budpatsiash? quequin aid chuiquin Esuquidistu uënësash uincuente chiec nec.

⁸ ¿Mitsipaden chuiquin dada uaid Nuquin Papan Chiaid icpe? Naden chuiquin dada uamiampid iquec: Ambi Chiaid mibi yacnobi iquec. Min tantiate yacno ambi chiaid iquec. Aidquiobi Nuquin Papa bëdambuen tantiamete nec, quequin tantiaquin chuibanec nebi.

⁹ Nuquin Papan uincuenmenëdaid Esus nec, quequin tantiaquin: Esus Cun Icbo nec, quequin abimbo chuisho Nuquin Papan mibi bëdambuen isquin abi yacno tabadmendac.

¹⁰ Nuquin Papa tantiembi, quequin bëdambuen tantiasho icsaisabimbuecnuc bëdambuen isendac. Adembidi: Esus Cun Icbo nec, quequin tantiaquin chuisho abi yacno tabadmendac.

¹¹ Nuquin Papan chuiquin dada uamiampid nad iquec: Abi tantiaquid icsho mua uainquiocquin Nuquin Papan ambi chiampicpadombuen naindac, quequin chuipampic.

¹² Nuquin Papan: Isadaidbo nec. Matses utsibo nec, quenquio icquin abitedishun Icbombo icsho matsesën: Ubi nashun, Papa, quequin abi chuisho tantiashun: Nashuntiapibi, quenquio icquin nashunendac.

¹³ Nuquin Papan chuiquin dada uamiampid nad iquec: Abitedishun Nuquin Papa chuiquin: Ubi bëdambuen isquin nashunta, Icbo, quequin chiannequidquio icsho abi yacno tabadmendac, quequin chuipampic.

¹⁴ ¿Mitsipaden tantiesa icquin Nuquin Papa chiannepatsiash? ¿Mitsipaden Nuquin Papabëta Esus chuisho tantiabi icquin matsesën Esusbëta Nuquin Papa tantiabempatsiash? ¿Mitsi paden Nuquin Papan naidbëta Esusën naid chuibanabi yac matsesën tantiabempec?

¹⁵ ¿Mitsipaden: Chuibenneta, cacmaidëmbi Esusën naid chuibennepec? Naden chuiquin Nuquin Papan dada uamepampid iquec: Nuquin Papan matses bëdambuen iste iquec, quequin Chiaid Bëda chuibennequid chosho isash cuishonquendac, quequin chuipampic.

Isadaidbon Esus tantienquio yaid

¹⁶ Adquidën Esusën naid chuibanac abitedishun tantienquio icnubi daëdpactsëcshun tantiec. Naden Isayasën chuipampic: Icbo ¿tsuntsin nuqui chuibansho tantiapec? quequin chuipampic.

¹⁷ Aden Esuquidistun naid chuibansho tantiashun: Abimbo caic, quequin Esuquidistu tantiabenec.

¹⁸ ¿Esusën naid chuibansho tantiamboda isadaidbon icpadic? Ai, ma tantiapaboc. Naden chuiquin Nuquin Papan dada uamiampid iquec: Nidaid utsi utsiec yacno nidshun ambi chuimiaidon chuibansho matses abitedishun tantiendac. Adembidi nidaid abichobi yacno tabadquidontsen chuibansho tantiendac, quequin chuipampic.

¹⁹ Padpidembuen chuinu. ¿Tantienquioda isadaidbon icpanëdash? Ai, aidon tantiec. Nëidba chuinu. Nuquin Papan naden Moises dada uamepampic: Umbi cun matses cacmaidon nasho issun mibitedishun nëishënendac. Matses Umbi Chiaid tantienquio icbuedon nasho issun mibitedishun chieshënendac, quequin chuipampic.

²⁰ Adembidi dacuëdenquio icquin Nuquin Papan abi chuibued tantiaquin Isayasën naden dada uapampic: Ubi tantiate bunenquio icbuedombi ubi tantiabenendac. Ubi caic: ¿Ada Nuquin Papa icpec? quesabobi: Nëmbo iquebi, caindambi, quequin chuipampic.

²¹ Isadaidbobidi chuiquin Nuquin Papan Chiaidquiobidi Isayasën naden dada uapampic: Badiadquidën badiadquidënquien cun mëdante abuc cadodednequin: Ubi tantiata. Mibi nashunnu, caqui Umbi Chiaid niacniacquec icsambuen nate bunquidouidquio iquec, quequin chuipampic.