Codosas 4 - El Nuevo Testamento en matsés

¹ Iuaquidon, mimbi iuaido ambi nabanaid tantiaquin bëdambuen menebanta. Adembidi: Abuc Cun Icbombo iquec, quequin tantiaquin mimbi iuaido bëdambuen ista.

Nadec tabadta, quequin chuibanaid

² Esuquidistu tantiaquido icquin Mayan Icsa Satanasën chieshtomenushe, queshun ënenquiocquin Nuquin Papa chianneta. Aden chianniac Nuquin Papan nasho issun: Mimbi naid bëdambo iquec, Papa, quequin Nuquin Papa chianneta.

³ Adembidi ubitedi tantiaquin Nuquin Papa chianneta. Ënden mimbi matses tantiamenquiocnëdaidi Esuquidistu chuibanquin ma utsibo tantiamequin bëdambuen chuibennenu, quequin Nuquin Papa chianneta. Aden chuibennesho bedshun quënën tsadunaid nebi.

⁴ Matses utsibo bëdambuen tantiamequin chuibanme, Papa, ma aidontsen Esus bëdambuen tantiapanu, quequin ubi tantiaquin Nuquin Papa chianneta.

⁵ Esus tantiesabon ubi tabadsho isec, quiash Esus tantiec bëdambuec tabadta. Adec tabadquin Esus tantiesatsen chieshtomenquio icquin tantiamenu, quequin Esuquidistun chiaidquio chuibanta.

⁶ Aden chuibanec mibi bëdambuec onquesho tantiash: ¿Mitsicquid mimbi tantiaid icpec? quetsiash tantiesa. Adsho tantiashun Esuquidistu mimbi tantiaid bëdambuen chuiquin tantiameta, ma aidon bëdambuen tantiapanu, queshun.

V. ËNQUIN CHIAID ( 4.7-18 ) Mibitedi tantiembi, quequin chiaid

⁷ Tantia. Mibitedi chuibannu. Nuquitedi cun utsi caid Tiquico mibi yacno nidshun ubi tabadaid mibitedi chiendac. Aidi Nuquin Icbon tantiamiacpadombuen ubëtan chuibanquidquio yec ubi nashunquid nec.

⁸ Adquid icsho: Ma mibitedi bëdambuen tantiamenu, queshun aidi mibi yacno nidmembi. Adoac nidshun umbi naidtedi chuibanac mibitedi ubi tantiec cuishonquendac.

⁹ Tiquicobëd Onesimo mibi yacno nidec. Aidi nuqui tantiaidquio yec nuqui cun utsi caidbidi nec. Onesimo mibi yacnoshon Esus tantiec mibëd iccuededquid nec. Aidi chieshenquio icquin ubi nashunquid nec. Aid daëdshun ubëd icquidon umbi nabanaidtedi mibitedi chuibanendac.

¹⁰ Adistadco ubëta quënën tsadunaid nec. Aidëmbi: Aido tantiec tsadebique. Chui, quesho tantiashun dada uaimbi. Adombuembidi Madcos Bednaben utsin chiaid dada uaimbi. Aidi iuecash mibi yacno nidsho issun bëdambuen isquin iuedta.

¹¹ Adembidi Esus cashumbic Usto caidëntsen: Aido tantiec tsadebique. Chui, quesho tantiashun dada uaimbi. Adistadco yec Madcos yec Usto yec quec aidtedi isadaidbo nec. Aidonuidtsëqui: Nuquin Papan namiacno tabadte iquec, quequin ubëtambi Esuquidistu chuibanquin ubi bëdambo icmequido neuaic.

¹² Epapadas mibi yacnoshon Esus tantiec mibëd iccuededondaid Esuquidistun namiaid icquin aid chuibanquidquio nec. Aidëmbidi: Aido cun utsibimbuecquido icsho tantiec tsadebique. Chui, quesho tantiashun dada uaimbi. Aidëmbidi ënenquio icquin mibitedi tantiaquin Nuquin Papa naden chiannec: Icsambuen namenuequid icnuc mibi bunacpaden tantiamequin mimbi Codosas yacnocquido chieshtomenquio icquin Esuquidistu tantiec tabadme, Papa, quequin Epapadasën Nuquin Papa chiannec.

¹³ Aidëmbi mibitedi tantiabudquiosho isembi. Adembidi Daudisea yacnocquidobëta Iedapodis yacnocquido tantiaquiec.

¹⁴ Adembidi Demasbëtan ubitedishun tantiaidquio dauëchoquid Ducasën: Aido tantiec tabadebique. Aido chui, quequin chiacpadombuen dada uaimbi.

¹⁵ Nëid umbi dada uaid mibitedishun issun: Pabadon mibitedi tantiec, quequin Daudisea yacnocquid Esus tantiaquido chuita. Aden chuishumbic Nimpas cuëmëdquidbëta aton shubun Esuquidistu tantiec iccuededquidotsen chuiuata.

¹⁶ Adembidi nëid umbi dada uaid isec onquequin mibëd iccuededquido tantiameshun: Daudisea yacno iccuededquid chuibanquidën ma isnu, queshun buanshun menequin: Nëid Pabadon dada uaid isec onquequin mibëd iccuededquido tantiameua, quequin chuita. Adoshombic umbi Daudisea yacnocquido chuiquin dada uaidtsen bëuashun isec onquequin mibëd iccuededquido tantiameuata.

¹⁷ Adembidi Adquipo cuëmëdquid naden chuita. Nuquin Icbo Esuquidistun: Naden nata, caid icquin bëdambuen tantiaquin nabanta, quequin chuita.

¹⁸ Mibitedi tantiaquin nëbi umbimbo nëidtedtsëqui chuiquin naden dada uanu. Puduentiapimbo yec Pabado quënën tsadeque. Bëdambo icmeta, Papa, quequin ubi tantiaquin Nuquin Papa chianneta. Nuquin Papan ma mibitedi bëdambuen ispanuna, quec tsadebi. Aidted chuiquin dada uaombi.