Codosas 3 - El Nuevo Testamento en matsés

Bëdambuec tabadte chiaid

¹ Esus tantiaquid icquin naden tantiata. Nuquin Papan Esuquidistubëta uincuenmiacbimbuen chuca uaid nebi. Adquid yanshun abuc Esuquidistu Nuquin Papan dayunquio abiuc tsadquin ambi namiacno ubitsen tabadtequid nebi, quequin aidquio tantiec bëdambuec tabadta.

² Aden abuc tabadte tantiaquid icquin nëid nidaidën icquiduidi tantiec tabadenda.

³ Esuquidistu tantiabenash uënësacbimbuec mibitedi ënden tabadondacpadecbidi icsambuen naic tabadenda. Nuquin Papan: Esuquidistubëd tabadtequido nec, quequin aidën dayun uaidquio mibitedi neque.

⁴ Adoaido yec Esuquidistu padpidec choshon abi yacno buanshun abipadquid icmiac mibitsen bëchamauanquiec iquendac.

Esuquidistubëd abentsëc yacbimbuec bëdambuec tabadte chiaid

⁵ Adec Esuquidistubëd tabadec bëdamboshëcquid iquendabi, quequin tantiaquin mimbi icsambuen nabanaidtedi cuessun secacbimbuen mibitedishun ëmbanta. Adshun: Umbi chudtemaid chudnu, quenquio icquin ënta dadan. Umbi chudmetemaid chudmenu, quenquio icquin ënta chidon. Aden natemaid bunmec dasiuidenda. Adembidi mimbi icsambuen nate bunaidtedi ënta. Adembidi mitsana dadpen bedteuidi bunaid ënta. Mimbi: Bednu, quequinuidi tantiaid matsesën ambibi nacnenshun: Papa, quequin tantiacbimbuecquid mibi bedte bunaid nendac.

⁶ Adec tabadquin ambi icsambuen nate bunaidbëta ambi icsambuen tantiaid ënesa icquin Ambi Chiaid niacquido icsho Nuquin Papan cumapenquien cuidendac.

⁷ Ënden Esus tantiesa icquin aden icsambuen nabanec mibitedi tabadpanëdac.

⁸ Adquid iccondaidi nëbi aden nainquiocquin ënash bëdambuec tabadta. Cumapenec nëishbuedi ënëdta. Adecbidi utsi chieshëmbuedi ënëdta. Adecbidi icsambuec tabadbuedi ënëdta. Adecbidi utsi icsambuen chuishumbuedi ënëdta. Adecbidi icsambuen tantiaquin chiec onquebuedi ënëdta.

⁹ Adecbidi utsibobëd mua uannambuedi ënëdta. Ënden adquid icbuedëmbi nëbi icsa sandoshon secacbimbuen mimbi icsambuen naidtedi ënta.

¹⁰ Adoacsho dashcute chuca dasiuinacbimbuen chuca uaido mibitedi nec. Mibi uaquidquio Nuquin Papabimbuec yanquin aid mimbi bëdambuen tantiaquiendac.

¹¹ Adquid icmiac Esuquidistu tantiaquid utsibotedi Nuquin Papan bëdambuen tantiaquiec. Nëid isadaidbo nec. Nëid isadaidpembo nec. Nëid shui dëbid dëtemequid nec. Nëid shui dëbid dëtemesa nec. Nëid matses utsin dada uaid isec onquequin dadpen tantiaquido nec. Nëid matses utsin dada uaid isec onquequin daëdpactsëc tantiaquido nec. Nëid iua nec. Nëid iuapenquio nec, quenquio icquin aidtedishun Esuquidistu tantiasho Nuquin Papan bëdambuen isendac. Adecbidi abitedishun Icbombo abentsëcquiobi Esuquidistu nec. Aidi abi tantiaquidotedibëd icquidquio nec.

¹² Nuquin Papan mibitedi tantiaquioquin: Nëid cun matses canu, quequin tantiamiaido yec nadec tabadta. Utsibo tantiec uënësquiocquin nashumbanta. Adecbidi: Mimbia bedan bedembi, quequid icta. Adecbidi: Mibia nashunnu, quequid icta. Utsi icsambuen naid ënmenuec cumapenec chushquenquio icquin bëdambuen chuita. Tantesa uasho issun badedquio chieshtoenquio icquin bëdambuen chuiquin tantiameta.

¹³ Mimbi nacpadombuen utsibon nainquiocsho issun: Tantienquiocquid nec, quenquio icquin adembi chuiban. Adecbidi utsin mibi icsambuen chieshënquin nasho isash aidën naid tantienquio yec bëshunta. Nuquin Papa umbi icsambuen naidtedi tantienquio yec bëshunosh, quec adta.

¹⁴ Adec tabadec utsibobëd tantiananec tabadta. Adec tabadec cuëshëdenquio yec abentsëc yacbimbuec bëdamboshëcquido mibitedi yanendac.

¹⁵ Adec Esus tantiaquido yec Esuquidistubëd abentsëc yacbimbuecquid yanash ma abitedi bëdambuec tabadnu, queshun Nuquin Papan: Cun matses nec, quequin ambi tantiamiaido yec bëdambuec tabadta. Adec tabadquin: Mibi tantiaquido yec bëdamboshë iquebi, Papa, quequin Nuquin Papa chianneta.

¹⁶ Esuquidistun naid chuibanaid bëdamboshëcquid tantiaquido mibitedi neque. Aid bëshunenquio icquin tantiec bëdambuec tabadta. Adembidi bëdambuen tantiaquin Esus tantiaquid utsibobëd tantiananec Esuquidistun chiaid chuinanec: Bëdambuec tabadnuna, quec chuinanta. Aden naic chuiquid tapa Dabidën dada uampid cuëdëntebëta cuëdënte utsi Nuquin Papan mibi bëdambo icmiaidbëtabi ambi naid utsi chiec cuëdëndedneta.

¹⁷ Aden nabanec tabadquin: Cun Icbo Esus nec, quequin tantiaquin aidën chiacpadombuen nabanta. Adec tabadquin: Mimbi tantiampicpadombuen Esuquidistun tantiamiaid yec bëdambo iquebi, Papa, quequin Nuquin Papa chianneta.

Aton shubun icquidobëd bëdambuec tabadte chiaid

¹⁸ Mibitedi: Esus tantiaquido yec nadec tabadta. Aton chido icquin min bënën chiacpadombuen nabanta. Nuquin Icbo Esuquidistu tantiaquid icquin aden nabanta.

¹⁹ Aton bënë icquin min chido bëdambuen tantiaquin nëishquioshon icsambuen chuiquin chushcainquiocquin bëdambuen chuita.

²⁰ Aton bacuëbo icquin papabëtan titan chiacpadombuen nabanta. Aden nabanec tabadsho isash Nuquin Icbo: Bëdambo iquec, quendac.

²¹ Aton papabëd aton tita icquin min bacuëbo namenuen cumapenen cuëdënquin nëishmenda. Chieshtonoshe.

²² Iuabon, nidaidënshun mibi iuaquidën chiacpaden nabanta. Aidën: Naden na, quequin chuishun isnuc nabanta. Mibi iuaquidën isenquiocnobi adombuembidi nabanuata. Aden nabansho mibi bëdambuen isendac. Cun Icbo Esuquidistun ubi isec, queshun aden nabanta.

²³ Esuquidistu nidaidën icsho nashunacbimbuen mibi iuaquid tantiaquin aidën chiacpadombuen chieshenquio icquin bëdambuen nabanta.

²⁴ Cun Icbo Esuquidistun abi yacno ubi nidacsho issun umbi bëdambuen nabanaidtedi tantiaquin bëdamboshëcquid ubi menendac, quequin tantiaquin nabanta. Nidaidënshun min Icbo Esuquidistu tantiaquin nashunquido mibitedi neque. Aden nabanta.

²⁵ Padnuen chieshëmënquid icquin icsambuen naquid icsho Nuquin Papan cuidendac. Aidon naid issun abimbo tantiaquid icquin: Nëid cuidenquio iquembi, quenquio icquin Nuquin Papan cuidendac.