Codosas 2 - El Nuevo Testamento en matsés

¹ Aden chuibanshun nadentsen chuinu. Tantia. Mibitedi tantiaquin Mayan Icsa Satanasën icsambuen namenushe, queshun cumapenec chonoadquin Nuquin Papa chiannembi. Adembidi Daudisea yacnocquido tantiaquin Nuquin Papa chiannembi. Adembidi utsi utsiec yacno iccuededquido umbi isacmaidobi tantiaquin Nuquin Papa chiannembi.

² Ma ënenquio icquin Esuquidistu tantiaquidombo yampanu, queshun dayacquiocquin chiannec nebi. Abentsëc yacbimbuec tantiananquido ma yampanu, queshun adembidi chiannembi. Adquido yanshun ma bëdambuen tantiapanu. Adembidi: Ëndenquimbo Nuquin Papan matses tantiamenquio icpampidi Esuquidistu nec, quequin ma tantianu.

³ Adembidi piucquid dadpen meniacbimbuen Esuquidistunuidtsëqui tantiamiac chiaid bëdamboshëcquid tantiabenshun bëdambuec tabadte tantiaquiendac, queshun Nuquin Papa chiannembi.

⁴ Aden umbi chianniaid icnuc utsibon abimbo chiacbimbuen chuiquin: Umbi chiaid tantiata, quequin muaquin Esuquidistupenquio chuibansho ma tantienquio mibitedishun icpanu, quequin tantiaquin aden mibitedi chiec nebi.

⁵ Mibitedi uanno icnubi mibëd tabadacbimbuen mibi ënenquio icquin tantiembi. Mibitedi caic: Tantiananquiec bëdambuec tabadosh. Adecbidi chieshtoenquio icquin Esuquidistu uidtsëqui tantiec tabadosh, quequin chuisho tantiash bëdambo iquec cuishonquebi.

IV. ESUS TANTIABENEC CHUCA UACBIMBUEC TABADTE CHIAID ( 2.6—4.6 ) Muaquin chuisho tantienda, quequin chiaid

⁶ Adecbidi: Esuquidistu Cun Icbo nec, quequin aid tantiabenash aidën chiacpaden nabanec bëdambuec tabadta.

⁷ Adec tabadquin cute aton tapun ëquëducquiocquidën uidënash nidacbimbuen Esuquidistu tantiaquid icquin aidquio tantiaquiota. Aden Esuquidistu chuiquin ubipadquidon mibitedi tantiamepanëdash. Aid tantiaquid icquin Nuquin Papa chuiquin: Mimbi nac bëdambo iquebi, Papa, quequin Nuquin Papa chianneta.

⁸ Naden muaquidon icsambuen tantiamenushe. Abimbo tantiaquiec tabadta. Ëndenquio ambibi tantiaquin matsesën chiaid ambembi chiec onquiampicpaden nëbi icquidën Esuquidistu chuibanenquio icquin chuisho tantiashun: Nuquin Papan Chiaidpenquio chiec nec, quequin tantiata. Adembidi Mayan Icsa Satanasën icsambuen namenuen tantiamiacpadombuen aidon muaquin chiaid tantienda.

⁹ Matsesaid yec Nuquin Papapadquidquiobidi Esuquidistu nec.

¹⁰ Aidëmbi abitedishun Icbombo icquin Nuquin Papan chiacpaden abi tantiaquido bëdambuen namec. Nuquin Papabëd icquido aton chuiquidobëd yec ambi namiaidobëd Mayan Icsa Satanas yec quec aidtedishun Icbombo Esuquidistu nec.

¹¹ Nuquin Papan: Cun matses nec, quequin cuënaid nuqui nec, queshun isadaidbon shui dëbid dëtemebampec. Padnuen Esuquidistubëd abentsëc yacbimbuec tabadsho mibitedi Nuquin Papan: Cun matses nec, capec. Adoac icsa sandoshon secacbimbuen icsambuen nate bunenquio mibitedi iquendac.

¹² Adembidi uënësacsho Esuquidistubëta chococacbimbuen mibitedi acten mentopanëdash. Adembidi nadatiambocquid icquin Nuquin Papan Esuquidistu uincuenmepanëdash, quequin tantiasho aidbëta uincuenmiacbimbuen acten mentotanquin mibitedi cadopanëdash.

¹³ Ënden Nuquin Papan matsespenquio icquin icsambuen naic tabadec uënësacbimbuec mibitedi icpanëdac. Adquid icquin Nuquin Papan ënden: Naden nata, quequin chiaid tantienquio icquin niacquido mibitedi icpanëdac. Adquid icbuedi Esuquidistu tantiaquid yansho issun: Ubëd tabadtequid nec, queshun mimbi icsambuen naidtedi tantienquio yec bëshunquin Nuquin Papan mibitedi bëdambuen isendac.

¹⁴ Naden icsambuen naquid cuidtequid nec, quequin chuiquin dada uaid ucacbimbuen Nuquin Papan namiacpadec nuquitedi bëdambuen ismenuec abitedishun icsambuen naid bedshunash abided cuidadec cueste napotiaidën dectanac Esuquidistu uënëspanëdash.

¹⁵ Adec uënësacsho uincuenmequin Nuquin Papan Mayan Icsa Satanas aton iuabobëta dëniacmequin Esuquidistu abitedishun Icbombo icmepanëdash. Adoac cuesnanquin dëniacquin bedash bëyucquio nidmiacbimbuen Esuquidistun Nuquin Papa ismepanëdash.

¹⁶ Adquid icnuc utsibon: Nadquiduidi peshun acac bëdambo ictsiash, quesho tantienda. Adembidi: Nadquid uëshënuidi aid tantiec iccuededac bëdambo ictsiash, quesho tantienda. Adembidi: Uëshë choaid usudsho isec aid tantiec cuëdëncuededac bëdambo ictsiash, quesho tantienda. Aid uëshëuidtsëqui chonoadtemaid uëshë nec, cac tantienda.

¹⁷ Esuquidistu choabicnuc umbi chuibuedtedtsëqui Esus bëdiactsëc tantiamete nec. Esus choan aidquio tantiaquiec Aidbëd tabadtequid nendac.

¹⁸ Nuquin Papabëd icquido tantiaquid utsibon: Ubien bëdamboshëcquid nec, quesa nebi, quequin muaquin chuisho tantienda. Ushquin isacbimbuen isombi, quequin muaquin chuisho adembidi tantienda. Adembidi: Ubien dadpen tantiaquidquio nec, quequin chuisho tantienda. Aidon: Umbi tantiacpaden nainquio yec mibi icsambo iquec, quequin icsambuen chuisho tantienda.

¹⁹ Aido Esusbëd abentsëc yacbimbuec tabadquidpenquio nec. Adquid icquin: Esuquidistu abi tantiaquidon Icbombo nec, quequin tantienquio iquec. Adecbidi Nuquin Papan tantiacpadquiec Esuquidistu tantiaquid dadpen yanash aton utsibobëd tantiananec nashunnanec aton Icbo padquid yanec, quequin tantiesa adquido nendac.

Nuquin Papa bunacpadec tabadte chiaid

²⁰ Tantia. Mibi chuinu. Esus tantiaquid yanshun: Esuquidistubëd uënësacbimbuen Mayan Icsa Satanasën namiacpadombuen umbi icsambuen naid nainquio iquembi, quebuedëmbi ¿atotsi queshun umbi chuibued tantienquio icquin Esus tantiesan chiacpadombuen nate bune?

²¹ Aidon naden chiec: Nëid bedtemaid nec. Nëid petemaid nec. Nëid mishtemaid neque. Bedenda. Mibi cuidnushe, quequin Esus tantiesabon mibi chiendac.

²² Aden ambi tantiacpaden matsesën chiaidtedi badedquio naimëdec ënëdtequid nendac.

²³ Matsesën bëdambuen tantiacbimbuen chiaid aidtedi nec. Nëid umbi tantiaid neque. Aid bëdambuen ismenuen naden nanuna, quequin aid matsesën chiec. Adshumbic: Chuiquid icte bunenquio iquebi, quequin muaquin mibi namete bunec. Adembidi: Umbi tantiaidën ubi bëdambuen istsiash, quequin ambibi tantiacpaden nabanec aton dada daicsaic damëyadbudec. Aden aidon tantiaidtedi nashun abi bunaiduidi tantiaquin ambi natemaid isuidtiapimbo icquin naic tabadec.