Codinto 2 9 - El Nuevo Testamento en matsés

¹ Ënden nidaid Udea yacnocquid Esuquidistu tantiaquido tantiaquin nashunta, quequin umbi chiondaid padpiden chuiquin dada uainquio iquembi.

² Umbi chiondaid tantiashun: Aden nanuna, queshun mitsana musucshun sambededshun mimbi tauaquin dayun uaondac. Adsho issun nidaid Masedonia yacnouësh Esuquidistu tantiec iccuededquido mimbi nidaid Acaya yacnocquido icquin: Menenu, quequin chiaid chiombi. Utsin utsinquien sambededshun dayun uanuna, quequin ënden seta icbuedën mimbi naid umbi chiac Masedonia yacnocquido dadpen: Adombuembidi nabanembi, queuaposh.

³ Aden aidon chuisho tantiashun nuquin utsibimbuecquid daëd Titobëta mibi yacno nidmembi: Mibitedi caic: ¿Ada ambi chiondacpaden piucquid sambededaque? Ma isnu, queshun.

⁴ Nidaid Masedonia caid yacnouësh Esuquidistu tantiec iccuededquido utsi utsiec ubëdien mibi yacno nidchitec. Aidobëd mibi yacno nidshun umbi chiacpaden mimbi sambededambocsho isash: Abimbo chiacbimbuen chuichitombi, quec natiec bëpiutsiabi. Adquiecbidi mibi icuatsiac.

⁵ Mibi yacno isec nidambo icquimbi: Adquio icnushe, queshun utsiboba mibi yacno nidmembi. Aido mibi yacno nidshun mibëtambi mimbi ubi chiondacted sambededquin nainshun aidtedi mimbi dayun uatsiac. Ambo nidacsho mimbi aidtedi ubi menetsiac. Aid matses tantiaquin dadpen menenuna, quequin cudasenquiocquin mimbi meniac bëdambo ictsiash.

Atona dadpen icquidën atona nibëdquid menequid, quequin chiaid

⁶ Nuquin Papan Chiaid chuinu. Tantiata. Pete ëshë daëdpactsëc sequidën daëdpactsëc bedquid. Dadpen sequidën dadpen bedquid, quequin chuipampic.

⁷ Aden chiampid icnuc: Nëidted menembi, quequin ambi tantiactedi menequid. Cudasacbitsëcquien menenquio icquid. Utsin: Nëidted mene, quequin ancac icsambo ictsiash. Menete bunquioquin menesho isash Nuquin Papa: Bëdambo iquec, quendac.

⁸ Utsibo atona menete bunquioquin ambi tantiacted menesho issun Nuquin Papan atona uesadmenquio icquin uditsëc icmeshunendac: Ma utsi utsien nashunquin menebannu, queshun.

⁹ Nuquin Papan chuiquin dada uamiampid nad iquec: Atona nibëdquid dadpen menequid icsho isash aidën nabanaid utsibo bëshunenquio iquendac, quequin chuipampic.

¹⁰ Nuquin Papan namiac tiedën caniquid ëshë abentsëc siaid dadpen yanec. Matsesën petequid adquiecbidi dadpen yanuaic. Adecbidi utsi menequid mibi icsho issun Nuquin Papan mibi dadpen icmeshunec: Ma utsibo tantiaquin dadpen menebannu, queshun. Aden mimbi menebanac aidontsen ambi bedaid musucshun utsibotsen tantiaquin meneuaindac.

¹¹ Ma utsibo atona menequid icnu, queshun Nuquin Papan mibi dadpen icmeshunendac. Adoac mimbi: Ma utsibo menenu, caid ubitedi meniac buanshun menebanac: Bëdambo iquebi, quec tabadec. Adec tabadquin mimbi meniaid tantiaquin: Nuquin Papa bëdambo iquec, quequin mimbi meniaid bedquidon chiendac.

¹² Atona nibëdquid Esuquidistu tantiaquido nashunquin ma menenu, quequin meniaid buanshun menebanquin mimbi bëdambo icmiaido dadpen iquendac. Aden mimbi meniaidon: Nuquin Papa bëdamboshë iquec, quequin chiendac.

¹³ Aden nashunaid issun mibitedi tantiec: Chiaid Bëda Esusën naid chiac: Esuquidistu tantiaquid nebi, quequin abimbo chuiquidquio aido nec, quequin mimbi dadpen meniaid bedshun: Nuquin Papa bëdamboshë iquec, quequin aidon chiendac.

¹⁴ Adembidi aidon mibitedi tantiaquin Nuquin Papa chiannendac naden: Mimbi tantiamiacpadombuen nabanquidquio Codinto yacnocquido nec. Aido bëdambo icme, Papa, quequin chiannendac.

¹⁵ Aden aidon chuinubi naden Nuquin Papa nuqui chiec: Mimbi chomiaid Esuquidistu mibi ubi bëdambuen ismequid bëdamboshë iquec. Aden naquid utsi nibëdec, Papa, quequin nuqui chiannec.