Codinto 2 8 - El Nuevo Testamento en matsés

III. PIUCQUID SAMBEDEDTE CHIAID ( 8.1—9.15 ) Bëdambuen tantiaquin piucquid sambededte chiaid

¹ Tantia, cun utsibo. Nuquin Papan tantiamiac nidaid Masedonia caid yacnocquid Esuquidistu tantiec iccuededquidon atona nibëdquid utsibo bëdambuen nashumbanaid nëbi chuinu.

² Chieshënquin natiamiaqui: Bëdambo iquebi, quec aido tabadec. Adec tabadquin aton piucquid daëdpactsëcquid icquimbi atona dadpen yacbimbuecnuc Esuquidistu tantiaquid utsibo tantiaquin menenu, quequin atona sambededshun dayun uaosh.

³ Umbi: Meneta, cainquiocnobi ambi tantiactedi aton piucquid naintsentsëcquien menenu, quequin sambededposh.

⁴ Esuquidistu tantiaquid utsibo nidaid cuëshë Udea caid yacnocquido atona nibëdnuc natiec, quequin chiac Masedonia yacnocquid Esus tantiaquidon: Umbitsen sambedednu. Aido menenun buanta, quequin chuibededposhi.

⁵ Adoac: Daëdpactsëc tantiatsiash, quequin umbi tantianubi ambi tantiactedi dadpen sambededpondash. Nademba chuishun napondash: Nuquin Icbombo tantiaquin nanuna, queshun Nuquin Papan tantiamiacpaden Pabadon chiacpadombuen nanuna, queshun ambi tantiactedi dadpen menequin sambededpondash.

⁶ Adombuen Masedonia yacnocquidon meniondash, quequin Tito chiondambi. Mimbi ënden nidaid cuëshë Udea yacnocquido natiaid chuibanac Nuquin Papan tantiamiacpadombuen menenu, queshun Codinto yacnocquidon sambededshun dayun uaccondash. ¿Ambi chiondactedida sambededshun dayun uaque? Bedtanta, quequin Tito chiombi.

⁷ Aden naquido yec bëdambocquido nec, quequin mibitedi tantiembi. Ambi chiacpadombuen natsiash, quequin chieshtoenquio icquin Esuquidistu tantiaquido nec. Adashic bëdambuec onquequido nec. Bëdambuen tantiaquidobidi nec. Utsibo tantiaquin nashunquidombo nec. Adembidi ubitedi tantiaquioquin nashunquidombo nec. Adquid mibi nec, quequin: Atona nibëdnuc natiaquido menenuen sambededshun dayun uaimbi, mibitedi quiacpadombuen nabanquiota, caimbi.

⁸ Umbi chiacpadombuen meneta, quecpenquio nebi. Utsibon menequin nashunaid chuisho tantiashun mimbi atona nibëdquido tantiaquioquin menetiadquio ictsiash, quequin chiec nebi.

⁹ Nuquin Icbo Esuquidistu abuc tabadec abitedishun Icbombo icbuedi nuquitsen abuc abëdi tabadmenuec matsesash nidaidën tabadnuc atona nibëdpanëdash, quequin mibitedishun tantiec.

¹⁰ Umbibi tantiacpaden mibitedi chuinu. Tantia. Ënden seta utsi icbuedën mibi bunacpadombuen: Menenun sambededshun dayun uanuna, queshun dayacquiocquin mibitedishun tauapondac.

¹¹ Mibitedishun: Aden nanuna, queshun dayacquiocquin tauaondacpadombuembidi mimbi tantiactedi nainquin sambededta.

¹² Atona daëdpactsëc icquidën menete bunquioquin menesho isash: Bëdambo iquec, caindac Nuquin Papan. Dadpen meneta, quenquio Nuquin Papa iquec.

¹³ Atona nibëdquid icsho issun: Mitsana uesquin meneta, quecpenquio nebi. Atona nibëdquid icsho atona dadpen icquidën meniac adecbidi ma atona icuapanuna, caimbi.

¹⁴ Mitsana dadpen icsho mimbi musucshun meniac atona nibëdquid: Bëdambo iquebi, quetsiash. Uëshë utsin aidën atona dadpen yanshun mitsana nibëdsho issun aidëntsen meniac mibitsen: Bëdambo iquebi, quendac.

¹⁵ Nuquin Papan chuiquin dada uamiampid nad iqueque. Tantia. Chuinu. Petempi Nuquin Papan mana caid meniaid chuiquin: Dadpenquio bedbuedën buanaid aton shubun icquidon piac samëdadenquio icpampic. Daëdpactsëc bedbuedën buanaid aton shubun icquidon piac cuesmainquio icpampic, quequin chuipampic.

Tito Codinto yacno nidte chiaid

¹⁶ Nëbi Tito mibi yacno nidec, quequin chuinu. Tantia. Umbi mibitedi tantiacpadombuembidi Nuquin Papan tantiamiac Titontsen mibi tantiec, quiash: Nuquin Papa bëdamboshë iquec, quec tsadebi.

¹⁷ Adecbidi mibi tantiaquid yec Tito icnubi: ¿Codinto yacno tsutsi nidpatsiash? quequin umbi chiac: Ubi nidebi, quiosh Tito.

¹⁸ Adec Tito: Nidnu, quesho tantiashun nuquin utsibimbuecquid utsi: Titobëd nidta, caombi. Aidi Esuquidistu bëdambuen chuibanquid nec, Esus tantiaquid utsibon caidquio nec.

¹⁹ Nidaid Masedonia caid yacnocquid Esus tantiec iccuededquidon: Umbi sambededshun dayun uaid Pabadobëd nidquin buanec nidta, caidbidi Titobëd nidquid nec. Ma Edusaden yacnocquido meniac: Nuquin Papa bëdamboshë iquec, ma quenu, queshun buanendambi. Adecbidi ambocquido: Pabado chedon ubi tantiaquin nashunec, ma quenu, queshun buanendambi.

²⁰ Aid ubëdi nidsho isash: Nuqui buanmiaid dadpen icsho ampetsiash, quec chushquetiapimbo utsibo iquec.

²¹ Nuquin Papan isnubi ubitedishun bëdambuen nabanquin matsestedi ismequin adembidi bëdambuen nabanembi.

²² Titobëd nidquidbëta utsi mibi yacno nidmembi. Umbi: Nata, cac bëdambuen nabanquid aidi nec. Utsibo nashunquido nec, cac aidi mibi yacno nidte bunec.

²³ Mibi nashunquin ubëtambi Esuquidistu chuibanquid Tito nec. Aidbëdi Esuquidistu tantiaquid utsi daëd nidec. Aidi nëshunquio Esuquidistu tantiaquidon: Nidta, cabuedo Titobëd nidec.

²⁴ Aido chosho issun bëdambuen isquin tantiata. Ma umbi chuibenniacno Esus tantiaquidon mimbi naid chuisho tantiashun naden chuinu: Pabadon chiacpadombuen Codinto yacnocquid Esus tantiaquido bëdambuen naquido nec, ma quenu.