Codinto 2 7 - El Nuevo Testamento en matsés

¹ Tantia, cun utsibo. Umbi tantiaido icsho mibi chuinu. Nuquin Papan: Naden naindambi, quequin chuiquin dada uamiampid isash nadnuna. Nuqui icsambuen naidbëtabi nuqui icsambuen tantiaid ënnuna. Icsamane, queshun Nuquin Papa dacuëdampambocquid icsho aid tantiaquin aidën chiacpadombuen nabanec bëdambuec tabadtembo tantianuna.

Codinto yacnocquido bëdambuec tabadaid tantiash: Bëdambo iquebi, Pabado quiaid

² Adembidi ubëtabi ubipadquid tantiaquiota. Icsambuen nashunesa nebi. Adecbidi icsa uanesa nebi. Adecbidi muaquin utsin na bedesa nebi.

³ Mibitedi icsambo iquec, quequin chuiquin dada uaicpenquio nebi. Mibitedi tantiaquiec tsadebi. Uënësquimbi mibitedi tantiaquiembi, quequin padpiden abimbo chiec nebi.

⁴ Mibitedi caic: Mimbi chiacpaden nainquio icbuedëmbi nabanosh, quequin choquidën chioshi. Aden chuisho tantiashun: Nuquin Papan chiacpaden nabanquidquio aido nec, quequin utsibo chuibanembi. Adash uënësquio icbuedi mimbi naid tantiash bëdamboshë iquebi. Utsibon natiamiaid icshobi mibitedishun dayacquio icmequin ubi bëdambo icmioc.

⁵ Nidaid Masedonia caid yacno choacsho natiamiac ushtiapimbo iccobi. Esuquidistu tantiesabon chieshënquin natiameposhi. Adoac natiec dacuëdec tabadobi.

⁶ Adnubi matses natiamesho bëdambo icmequidën Nuquin Papan ubi bëdambo icmenuen Tito chomiosh.

⁷ Choshon mibitedishun abi tantiaquin nabanaid Titon cuishoncamequin chioshi. Adembidi ubitedi iste mibitedi bunaid chioshi. Mimbi dada uaid isash uënësquio icquimbi mimbi chiacpaden nabanosh. Adecbidi: ¿Ada bëdambo iccosh? quequin mibi tantiosh, quequin Titon chuiuaposhi. Aden chiac bëdamboshë yanec udictsëc cuishonquequiobi.

⁸ Umbi dada uaid buanmiac isash Codinto yacnocquido uënësquio iccosh, quesho tantiash ubitsen uënësquio iccobi. Iuec mibi uënëspenquio icac caoc. Nëbi uënësquio icbuedi bëdambo yanac, quesho tantiash ubitsen bëdambo yanobi.

⁹ Adecbidi nëbi bëdambo iquec cuishonquebi. Dada uaquin mimbi uënësquio icmiac ambi icsambuen naid ënquin Nuquin Papan chiacpaden nabanec tabadosh, quequin Titon chioshi. Aden chuisho tantiashun: Nuquin Papan namiacpaden mibi uënësquio icmequin mibi icsabudmiambo iccombi. Uënësquio icmiaqui mibi bëdambo yanoc.

¹⁰ Uënësquio icmiac: Nuquin Papan Chiaid niaccombi, queshun Esus tantiasho bëdambuen isquin Nuquin Papan ënëdtiapimbocnoc abëdi mibi tabadmendac. Padnuen abi tantiesabo uënësquio icmiac uënësquio icbudequi uënësendac.

¹¹ Nuquin Papambi uënësquio icmiac nëbi mibitedi Ambi Chiaid tantiate bunquiec. Aden tantiaquin: Icsambuen ubitedishun nambo iccombi. Icsambuen naquidëmbien icsambuen naccosh. Mambi padambo icboc, queshumbic ubi iste bunquin mibitedishun icsambuen naquid ambi icsambuen naid ënmenuen chushcaquin cuidosh, quequin chuituidac: Icsambuen naquidbëtan mibitedishun icsambuen nambo iquec, quequin ubi mimbi tantioc.

¹² Mibitedi ënden chuiquin ambi bedtemaidi bedquin icsambuen naquid tantiaquin dada uambo iccondambi. Ambi icsambuen naquin bedshunaidtsen chuiquin dada uambo iccondambi. Umbi chuibanquin dada uaid issun ma Nuquin Papa ismequin umbi chiacpadombuen ma iccuededquidon nanu, quequin mibitedi tantiaquin dada uaquin naondambi.

¹³ Aden umbi tantiacpaden naquin mibitedishun bëdambo icmiaid nebi. Adembidi iuedquin mimbi bëdambo icmiaidbidi Tito nec. Ubi iuedenquioctsiash, quebuedi: Iuedoshi, Tito quesho tantiash bëdamboshë yec cuishonquebi.

¹⁴ Mibi nidmenu, quequin naden Tito chiondambi. Ubi iuedquin nashunondacpadombuen Codinto yacnocquidon mibi iuedquin nashuntsiash, quequin chiondambi. Aden chiac mibi yacno Tito nidacsho umbi chuibocpadombuen mibitedishun nashunac caoc. Aden nashunaid tantiash: Abimbo chiombi, quepobi. Umbi mibi mua uainquiocquin chiondacpadequi mibitedi tabadaid tantiombi.

¹⁵ Aid bëdambo iquec, queshun mibitedishun Tito iuedpanëdac. Aden iuedac: Naden nata, quequin umbi chiac cacuidanenquio icquin nabanosh, quequin Titon chioshi. Aidëmbi mibi bëdiactsëc tantiabuedëmbi mibitedi tantiaquiec.

¹⁶ Aden mibitedishun naid tantiash: Umbi chiacpadombuen nabanec, quequin tantiec bëdambo yec tsadebi.