Codinto 2 3 - El Nuevo Testamento en matsés

2. Esuquidistu chuibennequidon naid ( 3.1—6.10 ) Nuquin Papa bëdambuen ismete chuca uaid chiaid

¹ Pabado bëdambuec tabadquin Esuquidistu chuibennequid nec ¿mibitedi camenuendambi chuibandio? Padenquio. Adembidi: ¿Mibi yacno nidnun: Bëdambuec tabadquin Pabadon Esuquidistu chuibanosh, quequin chuiquin dada uata, umbi cac mimbi iste utsibon dada uaidtambi buampe? Padenquio. Utsibombien adopec. ¿Utsibo yacno nidnun mimbi ubi bëdambuen isquin dada uaidtambi buampe? Padenquio.

² Mibëdi tabadquin umbi chuibanac mibitedi Esuquidistu tantiaquido dadpen yansho isash: Codinto yacnocquido icsambuec tabadbuedi nëbi bëdambuec tabadec. Adsho isash: Aido Pabadon Esuquidistu chuibanaido nec, quequin utsin dada uaid bedshun isacbimbuen utsibon tantiabededec.

³ Pabadon chuibanac ubi tantiabenshun ma bëdambuec tabadte utsibon tantianu, quequin Esuquidistun tantiec. ¿Abi tantiaquido icsho issun bëdambuec tabadmenu, quequin ambi cuënoten dada uampidta mibitedi menediondash? Padenquio. Esuquidistu tantiabensho issun Nuquin Papa uënëstiapimbocquid icquin dada uacbimbuen aton Mayan Bëda abipadquidquio mibitedi meniondash.

⁴ Nuquin Papa bunacpadombuen Esuquidistun: Ubi chuibenneta, cac umbi chuibanac Esuquidistu tantiaquid mibitedi yanac, quequin abimbo tantiembi.

⁵ Umbibi tantiacpaden chuibanesa nebi. Nuquin Papan tantiamiacpaden chuibanquid nebi, quequin tantiembi.

⁶ Umbi tantiaid chienquio icquin Nuquin Papan abimbo chuiquin ambi bëdambuen ismete chuca chiaid chiec nebi. Nuquin Papa matses bëdambuen ismequid Esuquidistu umbibi chuibennetiapimbo icsho Nuquin Papan Mayan Bëdan tantiamiac Esuquidistu chuibennequidquio nebi. Ambi: Naden nata, quequin chuiquin dada uamiampicpadombuen chuibanta, caidpenquio nebi. Ambi: Naden nata, quequin dada uampidtedi nabanenquio yec Nuquin Papa yacno matses tabadtiapimbo iquec. Padnuen Esus tantiasho aton Mayan meniaido yec Nuquin Papabëd tabadtequido nendac.

Abi tantiaquido bëdambo icmete chiaid

⁷ Nuquin Papan: Naden nata, quequin cuënoten dada uaquin chiacpadombuenuidi nainquio icquid cuidtequid matses nendac, quequin chuiquin dada uaid meniac Moisesën bëtantete bëchamauanquiec chënquec macuësh budpampic. Budsho isadaidbon bëistiapimbo icpampic. Adec chënquebuedi badedquio chënquenquio yantequidi nepampic.

⁸ Nëbien Nuquin Papa bëdambuen ismete chuca tantiamequid aton Mayan abipadquid meniaid ënëdenquioctequid yec bëdamboshë iquec.

⁹ Umbi: Naden nata, quequin chiaid niacquid cuidtequid nendac, quequin dada uaid Nuquin Papan meniac imbudshun Moisesën aton matses ënëdenquiocnoc Nuquin Papabëd tabadmetiapimbo icpampic. Adquid icnubien matsesën icsambuen naid bedshunash icsambuen naisa yequi abided cuidadec uënësaid tantiaquido icsaisabimbuecnuc Nuquin Papan bëdambuen isaido nec, quequin chiaid bëdamboshë iquec.

¹⁰ Nuquin Papan ëndenquimboshë: Naden nata, quequin chiaid bëdambuen namebante yampid icnubi nëbi Esus tantiaquidobien bëdambuen isaido nec, quequin chiaid bëdamboshë iquec.

¹¹ Aden: Naden nata, quequin chiaid Moisesën bedshun bëdambuen chuibanaid ënëdtequid icnubi bëdambo icmiantequid Nuquin Papan Chomiaid yec bëdamboshëcquid nec, quequin umbi chuibanaidquio nibëdantiapimbo icquid nec.

¹² Aden tantiaquin: Esuquidistu nuqui tantiaid icsambuen naisa yec nibëdantiapimbocquid nec, quequin dacuëdenquio icquin chuibennequid nebi.

¹³ Moises Nuquin Papabëd onquiash aton bëtantete bëchamauanquiecbuedi auëshquio budec ushma ushmactsëcquio yanash: Matsesën bëisnushe, quiash bëpucudpampicpaden nainquio iquembi.

¹⁴ Nuquin Papan dada uaid Moisesën chuibanac tantiate bunesa aton matses isadaidbo icpampic. Adquiobidi pamumëdacbimbuec isadaidbo abi tabadec. Nuquin Papan Chiampid isec onquec nëbi adquiobidi abi bëdambuen ismenuen nate tantiesa nec. Padnuen Esuquidistu uidtsëqui tantiaquidën Nuquin Papa bëdambuen ismete tantiec.

¹⁵ Naden nata, quequin dada uaid Moises meniampid isec onquequid yequi pamumëdacbimbuecquid isadaidbo dadpen abi iquec.

¹⁶ Padnuen Esuquidistu tantiaquid Nuquin Papan Mayan Bëdan bëdambuen tantiamiaid yec Moisesën abi bëpucudaid chicacbimbuecquido nendac.

¹⁷ Nuquin Icbo Esus padquidquiobidi Nuquin Papan Mayan Bëda nec. Esus tantiasho bëpucudaid chicacbimbuen Nuquin Papan Mayan Bëdan tantiamiac bëdambuec tabadquido yec cuidadtequidopenquio nendac.

¹⁸ Adquid icnuc: Umbi icsambuen naid bedshunash Esuquidistuded cuidadpanëdash, quequin tantiabenash Esusbimbuec bëdambocquid nuquitedi yanendac. Adsho aidënquiobi icsambuen naisa icquin abipadquid nuqui meniac aton Mayanën nuqui bëdamboshëcquid icmebanendac.