Codinto 2 2 - El Nuevo Testamento en matsés

¹ Adec nidshun chushcac uënësquio icnushe, quequin tantiec mibi yacno isec nidenquio iquebi, caondambi.

² Mibitedi umbi uënësquio icmiac ¿tsuntsin ubi bëdambo icmequin cuishoncamepatsiash? Mibitedi ubi bëdambo icmequin cuishoncamequido nendac.

³ Naden tantiaquin mimbi iste dada uaondambi. Ubëd bëdambo iccondaidombi icsambuen nasho isash uënësquio icmane, quiash nidtiapimbo iccondabi. Ubi bëdambo icmetiadquidi mibitedi nec, quequin chiec nebi. Adquido icquin ubi bëdambo icmequin cuishoncamequid nendac, quequin tantiauidondambi.

⁴ Uënësquio yec shubiquimbi mibitedishun iste dada uashun: Buanshun meneta, caondambi. Uënësquio icmenu, quenquio icquin: Pabadon tantiaidquio nuquitedi nec, quequin mibitedi tantiamenuen dada uaondambi.

Ambi icsambuen naondaid bëshunshun iued, quiaid

⁵ Muainquiocquin mibi abimbo chuitiadquio iquebi. Mibi yacnocquid abentsëcshun ubi uënësquioshë icmedennequimbi adembidi mibitedi utsi utsien uënësquio icmiondash.

⁶ Aidi mimbi dadpenshun: Mibi cuenmenu, cac ambi icsambuen naid ënac caondash.

⁷ Adoacsho ambi icsambuen naid tantienquio yec bëshunshun aidi iueduaquin bëdambo icmequin nashunta. Iuedenquio icac natiaquiec uënësquioshë icnushe.

⁸ Nuquibi bëdambo iccuedednuna, quequin aid tantiaquin iued, caimbi.

⁹ ¿Umbi chiacpadombuen nabanquidombobida neque? Isnu, quequin: Icsambuen naquid puduedmenda, quequin mibitedi chuiquin dada uaondambi.

¹⁰ Aden umbi dada uaquin chiacpaden mimbi puduedmenquio yac ambi icsambuen naid ënsho issun ambi icsambuen naid nibëdacbimbuec bëshunshun bëdambuen isquin iuedosh, quesho tantiashun adombuembidi bëdambuen isuaimbi. Aidbëdi iccuededosh, quesho tantiash aidën icsambuen naid tantienquio yec bëshunebi Esuquidistun tantianubi.

¹¹ Aden nainquiocsho issun nuqui chieshënquid Mayan Icsa Satanasën nuquitedi icsa uabudnushe, queshun ambi icsambuen naid ëmbued bëdambuen isquin puduedmeta.

Tito choambocsho isaid

¹² Chiaid Bëda Esusën naid chuibannuec shubu dadpen icquid Todoade yacno ubi choacsho isash: Tantianu, quec chochoquid dadpen icpondash.

¹³ Adquid dadpen icnubi umbi cun utsi caid Tito choambocsho isash dacuëdec ambo iuec tabadtiapimbo iccondabi. Adquid icsho isash: Nidendabi, quequin chianec nidaid cuëshë Masedonia caid yacno nidpondabi.

Pabadon Nuquin Papa chianniaid

¹⁴ Bëdamboshëcquid mibi nec, Papa. Adquid icquin mimbi ënenquio icquin ubitedi tantiaquin Mimbi Chiaidquio chuimiac Esuquidistu tantiaquido yansho isash cuishonquebi. Esuquidistu chuibenneta, caid ubitedi nebi. Esuquidistubëd icsamboshëcquid dëniacquido nebi. Umbi chuibanaid nuadte bëdabimbuecquid nec. Nuadte bëda pushudec bëdambo nuadsho uanno uannoec tabadquidon shëdec. Adoacbimbuen ubipadquidon chuibennesho uanno uannoec tabadquidon tantiec.

¹⁵ Ubitedi Esuquidistun namiaido yec Nuquin Papa shëdmetequid nuadte bëda pichicac nuadsho uanno uannoec tabadquin shëdacbimbuecquid nuqui nec. Adquid icquin chuibenniac Esus tantiate bunquidon tantiec. Adembidi Esus tantiesabo Nuquin Papan cuidtequidon umbi chuisho tantiate bunenquio iquendac.

¹⁶ Adquid icsho dauë icsa pichicaid shëdash uënësacbimbuecnuc Nuquin Papan cuidquin chian annëdënquiacno nësecatequid iquendac. Padnuen utsibo nuadte bëda nuadsho shëdacbimbuen Esuquidistu tantiaquido yanash ënëdenquio yec abëd tabadtequido iquendac. Adtequid icnuc ¿tsutsi ambembi tantiaquin Esuquidistu chuibennequidquio icpec? Nibëdec.

¹⁷ Utsibombien dadpenshun piucquid bedteuidi bunquin Esus chuibennec. Piucquid bednu, quequin ubi yacpadquidon Esuquidistu chuibanenquio iquec. Padnuembi Nuquin Papan: Esuquidistu chuibenneta, caid icquin piucquid bedte bunenquio icquin Nuquin Papan isquin tantianubi muainquiocquin aidquio chuibennec nebi. Nuquin Papan namiaido yec Esuquidistubëd abentsëc yacbimbuec tabadquido ubitedi nec.