Codinto 2 13 - El Nuevo Testamento en matsés

Icsambuen naid ënesa chuiquin chushcaindambi, quiaid

¹ Mibi yacno daëden istanondashic nëbi padpiden mibi isec nidash pudueduashun: Icsambuec tabadquid nec, quequin daëdshun chuisho tantiendambi. Adembidi 3tedshun chuisho tantiendambi. Abentsëcshun: Icsambuec tabadquid nec, quequin chuisho tantiatiapimbo iquebi.

² Tauambuec nidshun Esuquidistu chuibanac aid tantiaquido mibitedi yanondac. Padpidec nidash pudueduashun icsambuen nadednequid icsho issun: Mimbi icsambuen naid ënta, caondambi. Aden chiondashumbic uannombo icquin nëbi mibitedi chuiuaimbi. Padpidec nidash pudueduashun Nuquin Papan tantiamiacpadombuen icsambuen naquid utsibobëta cumapenen chuiquin chushcaindambi, quequin chuiuaic nebi.

³ Esuquidistun tantiamiacpaden Pabadon chuibanquin dada uaid nec, quequin ¿Mitsipadentsimbi abimbo tantiape? quequid icsho chuibanembique. Tantiaquiota. ¿Esuquidistun natiapimbocquidta icpadic? Aidëmbi nadatiambocquin mibitedi tantiamec.

⁴ Aidi nadatiambocquid icbuedi matses yec uidëmpentsëcquio icsho cueste napotiaidën dectanac uënëspanëdash. Adoacsho Nuquin Papan uincuenmiac uënësesa yampanëdash. Aid tantiaquidquio icquimbi umbibi nadatiambocquin nabantiapimbo icshobi abi chuibanquid Nuquin Papan icmiondashi. Adembidi abëd abentsëc yacbimbuecnuc icmequin mibitedi nashunquid icmiondashi.

⁵ Mibibi datantiadcuededec: ¿Adambi chieshtoenquiocquin Esuquidistu bëdambuen tantiape? quequin mimbibi tantiata. Aden tantiec: ¿Mibibi datantiadec Ambi chiacpadectabi tabadpe? quequin adembidi tantiata. Aden tantiashun: Adec tabadabi iccobi, quequin tantiaquid yec Esus tantiabicquid mibi nec. Adquid icnuc: Esus ubëd ictiapimbo iquec, quequin tantiata.

⁶ Adecbidi: ¿Pabado Esuquidistun: Ubi chuibenneta, caidta neque? Tantianu, quequidën umbi chuibansho tantiashun: Abimbo chiosh, quequin mibitedishun tantiata.

⁷ Aden tantiasho mibitedi tantiaquin: Icsambuec tabadmenda, Papa, quequin chiannembi. Mibi bëdambuec tabadsho issun: Pabadon chuibanaido nec, quequin mibi isquidon chuitsiash, ¿quequindambi Nuquin Papa chiannepadi? Padenquio. Esuquidistun: Ubi chuibenneta, caid Pabado nec, quequin tantiesa utsi utsiec icnubi: Nuquin Papan chiacpadombuen nabanquidquio ma mibi icpanu, quequin Nuquin Papa chiec nebi.

⁸ Nuquin Papan chiacpadombuen nabansho mibi chushcatiapimbo iquebi. Nuquin Papan chiacpadombuen nainquio icshoembi mibi chushcatsiac.

⁹ Utsibon: Bëdambuen chuibanquidpenquio nec, ubi canubi: Mibi bëdambuec tabadsho isash bëdambo iquebi, quec tsadtsiabi. Mibi tantiaquin: Codinto yacnocquido icsambuen nainquio yec bëdambuec tabadquiduidquio icmeta, quequin ënenquio icquin Nuquin Papa chiannembi.

¹⁰ Mibi yacno nidnumbi mibitedi tantiec tsadquin mimbi iste dada uaic nebi. Mibi yacno nidash puduedshun icsambuec tabadquid nibëdsho issun cumapenen chushcainquio ictsiambi. Nuquin Papan: Esus chuibennequid icta, caid icquin: Ma Esuquidistu tantiaquidquio yampanu, queshun chuibanec nebi. Mibitedi chushcaquin icsamete bunenquio iquebi.

V. ËNQUIMBI CHIAID ( 13.11-14 )

¹¹ Nëbi ënquimbi dada uaimbique. Tantia, cun utsibo. Bëdambuec cuishonquec tabadquid icnu, quec Nuquin Papan chiacpadec tabadta. Utsibobëd tantiananec bëdambuec tabadtedneta. Bëdambuec tabadnuna, cananta. Adec tabadsho isash mibitedi bëdambuec tabadmequid yec mibi tantiaquidquio Nuquin Papa mibëd iquendac.

¹² Mibi tantiembi, mibitedi cananta. Adembidi ubëd icquidon mibi tantiaquin: Aido tantiembi, quiosh, cata, caoshi.

¹³ Nuquin Icbo Esuquidistun aton Papa bëdambuen ismiaido nebi, quequin mibitedishun tantiaquiota.

¹⁴ Adembidi: Nuquin Papan tantiaidquio nebi, quequin tantiaquiota. Adembidi: Aton Mayan Bëda ubëd iquec, quequin tantiec mibitedi tantiananquiota. Amen. Aidted chuiquin dada uaombi.