Codinto 2 10 - El Nuevo Testamento en matsés

IV. NADQUID NEBI, QUEQUIN PABADON CHIAID ( 10.1—13.10 ) Nuquin Papan tantiamiacpadombuen Pabadon Chiaid

¹ Pabado nebi. Tantia. Mibitedi chuinu. Cumapenec chushquenquio icquin matses bëdambuec tabadmenu, quequin chuibanquid Esuquidistu icpanëdash. Mibi yacno nidshun Esuquidistupadquid icnu, quequin ubi chieshënquidi bëdambuen tabadmenu, quequin chuibanondambi. Adoaqui ubi chieshënquido nadec onquec: Nuquibëd tabadquin dacuëdacbimbuen cumapenen Pabadon chushcainquio iccondash. Utsibo yacno nidash tabadquin dada uaquimbi cumapenen chushcaic, quequin icsambuen chuishunoshi.

² Adsho tantiash mibi yacno nidash matses yec tabadquin chushcante bunenquio icquimbi: Ambibi tantiacpaden Esus tantiesan nacpaden Pabadon naic, quequidon adembidi icsambuen chuisho tantiashun dacuëdenquio icquin chushcaindambi.

³ Matses yequi Esuquidistu tantiaquid icquin Esus tantiesabon icsambuen naquidon nabanacpaden nabanesa nebi.

⁴ Mibi yacno nidshun matsesën tantiacpadempenquio Nuquin Papa nadatiambocquidën tantiamiacpaden umbi Ambi Chiaid chuibannubi Mayan Icsa Satanasën icsambuen tantiamiac ubi chieshënec icsambuec onquequidon icsambuen chuibanaid Nuquin Papan ënmendac.

⁵ Mayan Icsa Satanasën tantiamiaidon Nuquin Papan Chiaid tantiate bunenquio icquin niac niaquec. Utsibo: Nuquin Papa caid nibëdec, quenubi: Umbi tantiacpaden naic bëdambo iquebi, quequin tantiec. Aden tantiaquido icsho issun ambi icsambuen tantiaid ënmenu, quequin Nuquin Papa nadatiambocquidën bëdambuen tantiamiac umbi Esuquidistu chuibansho tantiashun Esus tantiesabon aidën chiacpadombuen natiadquio yanendac.

⁶ Aden tantiaquid dadpen matses iccuededsho issun Nuquin Papan chiacpadombuen nainquio icquin utsin utsinquien ënenquiocsho cumapenen mibi chedobëtabi chushcaindambi: Ma Esus tantiec abitedi bëdambo iccuedednu, queshun.

⁷ Ambi isaiduidi tantiec utsi utsiec onquec: Esuquidistu tantiaquid nebi, quequi aido: Pabado icsambocquid nec, quepec. Adec onquequidobi: Pabadotsen Esuquidistu tantiaquid nec, ma quenu, quequin chiec nebi.

⁸ Abi tantiaquid yansho Esuquidistun: Ubi chuibenneta, cashumbic ubi tantiaquido chieshtomenquio icquin ma ubi tantiaquidombo icmenu, quequin chuibanquidbidi icmiondashi. Adoaid icquin cuëshëdmenquiocquin mibitedi chiec nebi.

⁹ Adquid nebi, quequin umbi dada uaid isash: Dacuëdampambocquid Pabado nec, camenuempenquio dada uaic nebi.

¹⁰ Mibitedi dacuëdmenu, quenquio icnubi umbi dada uaondaid issun naden utsin utsinquien chiec: Cumapenec chushquequin chuiquidën chiacbimbuen Pabadon dada uac. Nëmbo choshon aden chuitiapimbo iquec. Tantiadtiapimbo icnuc chuibanondash, quequin aidon ubi icsambuen chuishunec.

¹¹ Aden ubi chiec onquecuededquidon bëdambuen tantiata. Chuinu. Uannoshon umbi dada uaquin chiacpadombuembidi mibi yacno nidshun adombuembidi mibitedi chuibanendambi.

Ubiuidtsëqui bëdambocquid nebi, quequido chiaid

¹² Ubiuidtsëqui bëdambuen tantiaquin chuibanquid nebi, quequidopadquidpenquio nebi. Utsiboen aden chuiquid bëdambuen tantiesambo nec. Ubiuidtsëqui bëdambuen tantiaquidquio nec, quequidien icsambuen tantiaquidbidi nec.

¹³ Ubien Nuquin Papan tantiamiacpaden chuibanquid nec. Adquid icquin mibitedi chuibanquid yec: Ubiuidtsëqui tantiaquidquio nebi, quetiapimbo iquebi. Nuquin Papan namiac mibitedi isec Codinto yacno chondabi.

¹⁴ Esus chuibanquid utsi mibi yacno nidambo icnuc: Ambo tabadquin Esuquidistu chuiban, quequin Nuquin Papan tantiamiac mibëd tabadquin umbia mibitedi Esusën naid Chiaid Bëda chuibanondambi.

¹⁵ Adecbidi: Utsibon chuibanac Esuquidistu tantiaquid yanosh, quesho tantiash: Umbiuidtsëqui chuibanac Esuquidistu tantiabenosh, quenquio iquebi. Adenquio yec mibëdi tabadquin umbi chuibanac aid tantiaquido mibitedi yanondac. Adondacsho isash: Esuquidistu tantiaquidombo ma yampanu, quec mibitedi tantiec mibi yacno niduate bunebi.

¹⁶ Esuquidistu umbi chuiban chuibanac aid tantiadonequiec mibitedi tabadsho isash Chiaid Bëda Esusën naid utsin chuibanacmanombo chuibanec nidendabi, caombi. Adec utsibon chuibanacno nidash aidon chuibanaido caic: Aido umbia chuibanaido nec, quetiapimbo iquebi.

¹⁷ Bëdamboshëcquid nec, quete bunquid yec ma: Nuquin Icbombo Esus bëdamboshëcquid nec, quequin tantiec adpanuna.

¹⁸ Bëdambuen nabanquidquio nebi, abibi quesho Nuquin Papan bëdambuen istiapimbo iquec. Padnuen Nuquin Papan: Bëdambuen mimbi naoc, caidien ambi bëdambuen isaidquio nendac.