Codinto 2 1 - El Nuevo Testamento en matsés

I. BEDANQUIN CHIAID ( 1.1-11 ) Mibi tantiembi, quiaid

¹ Pabado nebi. Nuquin Papa bunacpadombuen Esuquidistun: Ubi chuibennequid icta, caid nebi. Esus tantiaquidbidi Timoteo nuqui cun utsi caid ubëd iquec. Aidbëtambi mibi tantiembi, quequin shubu dadpen icquid Codinto yacnoshon Esus tantiaquin Nuquin Papa tantiaquido icsho mibitedi chuiquin dada uaimbi. Adembidi Esus tantiaquid utsibo nidaid cuëshë Acaya yacno tabadquidtedi icsho tantiembi, quequin chiec nebi.

² Nuquin Papabëtan Nuquin Icbo Esuquidistun bëdambuen isquin ma bëdambuec tabadmepanuna, quequin mibitedi tantiaquin Nuquin Papa chiannembi.

Bëdambo icmianquidquio Nuquin Papa nec, quiaid

³ Nuquin Papa Nuquin Icbo Esuquidistun Papa bëdambocquid nec. Aidi nuquitedi tantiaquidquio icquin nuqui natiamiac natiambo icsho issun uënësquio icquin bëdambo icmianquidquio nec. Adenuidi Nuquin Papan naindac.

⁴ Nuquitedi natiamiaid icsho issun Nuquin Papan uënësquio icquin bëdambo icmendac. Umbi icmiacpadombuembidi utsibo natiamiaid icsho issun umbi bëdambo icmiaidontsen: Ma aido bëdambo icmenu, queshun Nuquin Papan nuquitedi bëdambo icmendac.

⁵ Esuquidistu chieshënquin natiamenëdacpadombuembidi nuquitedi Esus tantiaquido icsho natiamendac. Aden natiamiaid icsho adembidi Esuquidistunuidtsëqui nuquitedi bëdambo icmendac: Ma utsibo natiamiaid icsho bëdambo icmenu, queshun.

⁶ Mibitedi natiamiaid icsho ma Nuquin Papan bëdambo icmequin abi yacno tabadmenu, quequin Esus chuibanquid icsho ubitedi chieshënquin natiamiaid nebi. Nuquin Papan ubitedi bëdambo icmequin adembidi mibitedi natiamesho bëdambo icmendac. Adoac mibitedi chieshënquin natiamiaqui mëmunec chieshtoenquio yec mibitedi tabadendac. Adombuembidi ubitedi natiamiaqui chieshtoenquio yec tabadebi.

⁷ Utsin natiamiaid icquimbi chieshtoenquio icquin abi Esus tantiec, quequin mibitedi tantiec tabadebi. Ubitedi natiamequin chieshënacpadembidi mibitedi chieshënquin natiamesho issun Nuquin Papan nuquitedi bëdambo icmequin chieshtoenquio icmendac, quequin tantiembi.

⁸ Tantia, cun utsibo. Nidaid cuëshë Asia caid yacnoshon ubi chieshënquin natiamebued mibi tantiamequin chuibannu. Mëmuntiapimbocnoc natiamioshi. Adoac: Uënësebi, quequin tantiauidombi.

⁹ Cuessunnenuna, utsibo quesho tantiash: Ubibi mënchiquidtiapimbocshobi matses uënësaid uincuenmequidëmbi ubi mënchiquendac, quequin tantiec tsadobi.

¹⁰ Aden: Cuessunnenuna, cac natiapobi. Adshobi Nuquin Papan mënchicposhi. Adenuidi aidëmbi ambi mënchicbocpadembi ënenquio icquin ubi nashunendac, quequin tantiec tsadebi.

¹¹ Ubitedi nashunquin mibitedishun chiannesho tantiashun Nuquin Papan mënchicaid nebi. Aden: Cuessunnenu, quesho tantiashun mimbi Pabado mënchiccoc. Adquid yec mibi bëdamboshëcquid nec, Papa, quequin ma dadpenshun abi nashunaid chuipanuna.

II. ESUSËN: UBI CHUIBENNETA, CAIDQUIO NEBI, QUEQUIN PABADON CHIAID ( 1.12—7.16 ) 1. Pabadon chieshtoenquio icquin bëdambuen tantiaid 1.12—2.17 Pabado Codinto yacno nidenquio yaid

¹² Ubitedi bëdambuec tabadquin ismequid nebi, quequin tantiec bëdambo iquebi. Matsesën tantiamiacpadpenquio yec utsibobëd bëdambuec tabadobi. Nuquin Papanquio tantiamiacpaden ismec utsibobëd bëdambuec tabadobi. Adquiecbidi mibitedibëd tabadobi.

¹³ Nëbi ma nëid dada uaid isquin bëdambuen tantiabennu, queshun mibitedi abimbo chuiquin dada uaic nebi.

¹⁴ Aden umbi dada uaid isquin bëdambuen abitedi tantiabi icbuedëmbi Nuquin Icbo Esuquidistu padpidec chouanuc mibitedishun bëdambuen tantiendac. Pabado bëdambuec tabadquidquio nec, quequin mibitedishun chiendac. Umbitsen adembidi: Codinto yacnocquid Esus tantiaquido bëdambuec tabadquido nec, quequin chiendambi.

¹⁵ Aden Codinto yacnocquidon ubi bëdambuec tabadaid chiendac, quequin tantiec: Mibitedi daëden isec nidnu, queuidobi.

¹⁶ Mibi yacno isbidanec nidaid Masedonia caid yacno nidashic padpiden mibitedi isbëtsenec chouaindabi. Aden isbëtsenquin mibitedi chiec: Nidaid cuëshë Udea caid yacno nidnu, quesho tantiashun ambo nidmequin ubi nashuntsiash, quequin tantiauidombi.

¹⁷ ¿Otacquio tantiaquin: Nidenquio iquebi, quequin Esus tantiesabimbuec muaquindambi chuidionda? ¿Adembidi Esus tantiesabo bunacpaden nanuen muaquindambi chuidionda? Mambi adenquio icquin abimbo chiondac.

¹⁸ Abitedimbo tantiaquidquio icquin Nuquin Papan ubitedi onquiaid tantiec, queshun muainquiocquin abimbo chuiquidquio nebi.

¹⁹ Adembidi ambi chiacpadombuen nabanquidquio Nuquin Papan Madombo umbi chuibenniaid Esuquidistu nec. Aidi Sidbanobëtan Timoteon chuibenniaidbidi neuaic.

²⁰ Cun Madon naden naindac, quequin Aton Papan chiampicpadombuen Esuquidistun nabampanëdash. Adombuembidi abi nëbi nabanec, quequin Esuquidistu uidtsëqui tantiaquin: Mibi bëdamboshë iquec. Amen, quequin nuquitedi Nuquin Papa chiannec.

²¹ Nuquitedi Nuquin Papan: Cuna nec, quequin Esuquidistubëd abentsëc yacbimbuecnuc tabadmequin bëdambuen isaido nec.

²² Adembidi: Cuna nec, quequin aton Mayan Nuquin Papan meniaid nuquibëd tabadec. Adoaid yec aidbëd tabadtequid nebi, quequin tantiamenuen Nuquin Papan aton Mayan meniac.

²³ Nuquin Papan tantiec, queshun abimbo caondambi. Mibi yacno Codinto yacno nidnu, quiondabi. Adashic: Aido chushcaquin natiamemane, quiash mibi yacno nidenquio iccondabi.

²⁴ Naden dadpen tantiata, quequin icbon ancacbimbuen mibitedi chienquio iquembi. Esus tantiaquidombo nec, quequin mibitedi tantiembi. Ma Esus tantiec chieshtoenquio yec cuishonquequiono, quequin mibëd icquin mibitedi chuibante bunebi.