Codinto 1 9 - El Nuevo Testamento en matsés

Esus tantiaquidon nabantequid chiaid

¹ Nuquin Icbo Esus isondambi. Aidën: Ubi chuibenneta, caidquio nebi. Adquid iquec utsibon namiaidpenquio nebi. Umbi Esuquidistu chuibansho tantiash aid tantiaquid mibitedi yampondac.

² Utsibon: Esuquidistun: Ubi chuibenneta, caidpenquio nec, quequin ubi tantiec. Aden tantianubi mibitedishun: Esuquidistun: Ubi chuibenneta, caidquio nec, quequin ubi tantiec. Umbi chuibanac Esus tantiaquido mibitedi yanshun: Abimbo chuibanquidquio nec, quequin mimbi ubi tantiec.

³ Ubi chieshënquin icsambuen chuishunquido naden umbi tantiacpaden chuinu.

⁴ Bednabebëtan umbi chonoadquin chuibansho issun: Ma pequin acnu, queshun petebëta actequid meniac bëdambo ictsiash, caimbi.

⁵ Adembidi ubëd chuibennec nidquidën aton chido Esus tantiaquid buanac bëdambo iquec. Adombuembidi Petedon aton chido buanec. Adembidi Esusën utsibon chuibennequin aton chido buansho: Bëdambo iquec, caimbi.

⁶ ¿Bednabebëduidtsëquidabi: Mabi Esus tantiaquidon nashunnu, quenquiocquin chonoadquin chuibanquid nepe?

⁷ ¿Tsuntsinquio sondado icquin actequidbëta pete bednuen atonabi menepec? ¿Tsuntsinquio tied icbo neshcashunquimbi tiedën caniquid uba cheshunenquio icpec? ¿Tsuntsinquio nëish iua obecabëta cabada isquin dayun uaquidën shuma chinshun shuma ënë aquenquio icpec?

⁸ Umbi chiaid tantiashun: Matsesën tantiacpaden chiaiduidi nec, quequin tantienda. Nuquin Papan Moises dada uamiampidën aden chiac.

⁹ Ambi Moises chuiquin dada uamiampid nad iquec: Min tiedën caniquid tidico ma ëshchicnu, queshun min baca bënë tsuctsucmequin dëpuquenda. Ma penu, quequin chuipampic. Aden chiaid icnuc Nuquin Papan baca bënëuidtsëqui tantiatiapimbo iquec.

¹⁰ Adenquio icquin Nuquin Papan nuquitedi tantiaquiec. Ambi Moises dada uamiampid nuquitedi tantiamenuen chiaid nec. Tied uaquin nashunquidobëtambi ëshchicshunquidon: Ambi cuësaid utsi ma penu, quequin menetsiashi, quequin tantiaquin cainec.

¹¹ Adquid icnuc mibitedi tantiamebenquionuen Esuquidistu chuibanec chonoadquid icsho ubitedi ma penu, queshun ubi nashunquin pete menetiadquidi mibitedi nec.

¹² Chuibanquid utsibo petebëta actequid menebanquimbi ubia mibi chuibanondaidquio icsho menetiadquidi menianenquio mibitedi icpondac. Aden petebëta actequid menenquio yaqui: Bec cho quetiadquidi: Umbi: Esuquidistu abided cuidadec uënëspanëdash, quequin Chiaid Bëda chuibansho tantiatiapimbo icnushe, quiash: Bec cho, quequin chienquio iccondambi.

¹³ Nuquin Papa tabadte shubu dapa yacnoshon nashunquidën ashunquio utsibon bëaid peshun aquec. Adembidi ashunquio matses utsibon bëaid bedshun Nuquin Papa ismequin nëish iua cuessunneshun pichicaquidën ambi pichicatequid tëshë bedshun peshun aquec, quequin mibitedishun tantiec.

¹⁴ Adombuembidi abi tantiamequin Esuquidistu chuibanquido icsho: Ma ambi chuibanaidon nashunnu, quequin Nuquin Icbon tantiec.

¹⁵ Ubi nashuntiadquidi nec, quequin tantiequi ¿adabi pete pemenun iuedpec? quesa nebi. Adembidi umbi dada uaid buanmiaid issun pete menetsiashi, quequin tantiaquin dada uainquio iccombi. Bunec uënësbudequi mibitedi caic: Bec cho, quenquio ictsiabi. Meniabi yac Esus chuibennec bëdambo iquebi.

¹⁶ Ubiuidtsëqui bëdambocquid nebi, quenquio icquin Esuquidistu chuibennequid nebi. Esuquidistun: Ubi chuibenneta, cac aidquio chuibennec nebi. Aden aid chuibennenquio yanash Nuquin Papan cuidtequid ictsiabi.

¹⁷ Adquid icnuc umbibi tantiacpaden Esuquidistu chuibanquid yec ubi piucquid menetequid iquec, quequin caintsiambi. Padnuen Nuquin Papan: Umbi chiaidquio chuibanta, caid icquin aidën chiaidquio chuibennec nebi. Ubi menetsiash, quenquio icquin aden chuibennec nebi.

¹⁸ Cuishonquequin Esuquidistu chuibennec nebi. Esus chuibennequid Esus tantiaquidon nashunquid, quequin chiaid icnubi: Mitsana bec cho, quenquio icquin chuibennec nebi. Aden: Umbi tantiacpaden ubi mitsana mene, quenquio icquin Esuquidistu chuibennequidquio nebi.

¹⁹ Utsin iuacmaid yequi abitedishun iua namiacbimbuen umbi chuibanac ma matses dadpenquio Esuquidistu tantiaquido yannu, quequin chuibanec nebi.

²⁰ Cun matses isadaidbo yacno nidash aido tabadacpadec tabadobi: Ma aidontsen Esuquidistu tantiabennu, quiash. Aido Moisesën chiampicpadec tabadsho isashini adecbidi tabadoc. Aidon: Moisesën chiampiduidi nasho Nuquin Papan bëdambuen isec, quequin tantianubi umbien: Esuquidistu uidtsëqui tantiasho Nuquin Papan bëdambuen isec, quequin tantiec.

²¹ Adecbidi matses utsibo Moisesën chiampid tantiaquin nainquio icquido chuibannuec nidash aido tabadacpadec tabadobi, Ma aidotsen Esus tantiaquido yannu, quiash. Nuquin Papan Chiampid niaquenquiocquimbi Esuquidistun chuinëdaid tantiaquin nabanquidquio nebi.

²² Adecbidi Esus bëdambuen tantiabenabictsëcquido yacno nidash aido tabadacpadecbidi tabadobi: Ma Esus tantiabenquiono, quiash. Adecbidi matses utsi utsiec yacnouësh aido tabadacpadecbidi tabadobi: Ma Esuquidistu tantiaquido utsi utsiec yampanu, quiash.

²³ Adec tabadquin umbi Esuquidistu chuibanac aid tantiaquido yanash ubëdi bëdambuec tabadendac, quequin tantiembi.

²⁴ Mibitedishun naden tantiec. Titincametequid icnuc abitedi titinquecuededec abentsëc abia bëyuc choquid icsho issun bëdamboshëcquid menendac. Adquid icnuc nuquitedi titinquequido yacbimbuen: Esuquidistu tantiaquid Nuquin Papan bëdamboshëcquid ubi menetequid iquec, quiash bëdambuec tabadnuna.

²⁵ Utsi utsiec tsidadash mamëncuededtequid icnuc: Bëdiactsëc titinquemane, queshun dada icsambo icmiantequid nainquiocquin isuidec tabadec. Mamënquin dëniacsho bëdamboshëcquid meniaid bedte abi bunaid badedquio chodquetequid nec. Padnuen nuquitedi bëdamboshëcquid menetequid chodquetemaidquio bednuec chonoadec Esus tantiaquido nec.

²⁶ Utsien: Bedembi, quenquio yec titinquec. Adecbidi bednu, quenquio yec utsibëd mëdanten senannu, quequin matses nibëdacnobi ambembi uiccacbimbuen mëdanten seded sededec. Ubien aden tantiaquin nabanesa nec. Ma ubi bëdambuen isquin bëdamboshëcquid menenu, queshun nabanquid nebi.

²⁷ Adquid icquin ambembi naquin ubi bunacpaden nabanenquio iquembi. Ënapen nidec: Padishmane, quiash uidënquio icnuec capuquidquio nebi. Adacbimbuen umbi tantiacpaden chuibanenquio icquin: Ma utsibon tantianu, queshun Esuquidistu uidtsëqui chuibanembi. Chuibanenquiocsho Nuquin Papan bëdamboshëcquid menenquio icnushe, queshun icsambuen nainquio iquembi.