Codinto 1 8 - El Nuevo Testamento en matsés

V. AMBI PAPA CANUN NACNENAID YACNO PETE DASANAID ( 8.1—11.1 ) Ambi papa caid tantiaquin nëish pichicaid ismiaid

¹ Mimbi dada uaquin chiaid issun nëbi umbi tantiacpaden chuinu. Ambi papa canun nacnenaid ismequin nëish iua pichicaquin ¿pete dasanaid petequidida nepec? quequin mibitedishun chiaid chuinu. Mimbi abimbo chiaid nad iquec: Nuquitedi ambi papa canun nacnenaid ismequin pichicaid iquec, quequin tantiec. Aden umbi tantiacpadenuidi naic ubiuidtsëqui bëdambocquid nebi, quepec. Padnuen mimbi tantiananquin nabannuc Esus tantiaquid utsibo bëdambuen tantiec bëdambuec tabadquid yanendac.

² Ubimbo tantiaquidquio nebi, quequid iquequi bëdambuen tantiabenabicquid nec.

³ Padnuen abi tantiaquidon abi tantiaquiosho Nuquin Papan aido tantiaquiec.

⁴ Umbi chuibocpadembidi ambi papa canun nacnenaid ismequin nëish iua pichicaquin dasambued pambidtambi pepe, quequin chuiquin mimbi dada uacbued issun chuinu. Ambi papa canun nacnenshun tabëcaid tiboquenquio yec tabadnubi: Nuquin Papa abentsëcquiobi iquec, quequin nuquitedi tantiec.

⁵ Abuc icquidobëta nidaidën icquidtedi matsesën papa caid dadpen iquec. Adquid icsho issun ambi papa caid dadpenquio icnubi adecbidi ambi icbo caid dadpenquio icuaic.

⁶ Adquid icnubi nuquitedi: Papa, quequin tantiaid Nuquin Papa abentsëcquiobi iquec. Aidi abitedimbo uaquidquio nec. Aidën tantiacpadequi nuquitedi abi tabadec. Adecbidi nuqui Cun Icbo caid Esuquidistu abentsëcquiobi iquec. Aidënuidtsëqui abitedimbo uashun adembidi nuquitedi uapampic.

Esus tantiactsëcquid tantiaquin bëdambuen nate chiaid

⁷ Utsin utsinquien mibitedishun umbi chuibued bëdambuen tantiabi iquec. Ënden Esus tantiabenabi icquin ambi papa canun nacnenaid tantiaquid mibi icpondac. Adombuembidi nëbi tantiaquin ambi papa canun nacnenaid ismequin pete dasanaid nec, quequin tantiaquimbi aid pec Esus bëdambuen tantiabenabictsëcquid yec: Icsambuen nachitombi, quependac.

⁸ Tantia. Abimbo chuinu. Adquid pesho Nuquin Papan ubi bëdambuen isec. Utsi pesho ubi bëdambuen istiapimbo iquec, quequin abimbo chiaidpenquio nec, quequin nuqui tantiec.

⁹ Padnuen: Umbi ambi papa canun nacnenaid dasanquin ismiaid pequin icsambuen nainquio iquembi, quebuedëmbi pesho issun Esus bëdambuen tantiabenabictsëcquidën ambitsen piash: Umbi petemaid pequin icsambuen nachitombi, quenushe, queshun ismequin penquio icac bëdambo ictsiash.

¹⁰ Mimbi: Aid pequin icsambuen nainquio iquembi, quequin abimbo tantiec. Aden tantiaquid icquimbi Esus bëdambuen tantiabenabictsëcquid ismequin mimbi pesho isash: Umbitsen penu, quetsiash.

¹¹ Aden mimbi Esus bëdambuen tantiabenabictsëcquid icsamiaidobëta mibitedi cuidmenquio icnuec abided cuidadec Esuquidistu uënëspanëdash.

¹² Esus bëdambuen tantiabenabictsëcquid icquin bëdambuen nabanaidbëta icsambuen naid bëdambuen tantiabi icquid icshobi mimbi icsambuen namec. Aden namequin mimbi Esuquidistu uënësquio icmequin icsambuen naindac.

¹³ Adquid icnuc ambi petemaid pequin cun utsibo icsambuen nametsiambi, queshun pambid penquio iquembi: Ma aidën icsambuen nainquio icnu, queshun.