Codinto 1 7 - El Nuevo Testamento en matsés

IV. CHIDO BEDTE CHIAID ( 7.1-40 ) Chido bedash: Nadec tabadta, quequin chiaid

¹ Nëbi mimbi: Ubi chui, quequin dada uacbued issun umbi tantiacpaden mibitedi chuinu. Dadan chido bedenquio yac bëdambo ictsiash. Chidon dada bedmenquio yac bëdambo ictsiash.

² Ambi natemaidi naic piucquid bedec chudadquido dadpen iquec. Adquid chudec icsamane, queshun dadan min chido bedta. Adembidi chidon min bënë bedmeta.

³ Min chido bedshun aiduidtsëqui chudec aidbëd bëdambuec tabadta. Adecbidi chido min bënë bedmeshun aiduidtsëqui chudmec aidbëd bëdambuec tabadta.

⁴ Chidon dada aton bënënabidi yec aidbëd ictequid nec. Adecbidi dadan dada aton chidonabidi yec aidbëd ictequid nec.

⁵ Adquid icnuc min bënën: Chudnu, cac: Padi, cainda. Adembidi min chidon: Ubi chud, cac: Padi, cainda. Adbuedi: Nëidtedec ushquimbien Nuquin Papa chuitiad, queshun nainquio yec tabadta. Aidtedec ushquin padenquiocshon iuen mëmuntiapimbocsho issun Mayan Icsa Satanasën icsambuen namenushe, quiash min chidobëd padpidec icuata.

⁶ Aidotedi nabanquin ënta, quenquio icquin umbibi tantiacpaden chuibanec nebi.

⁷ Dadatedi chido bedabicquido yec ubi yacpadec tabadac bëdambo ictsiash, caimbi. Adquid icnuc Nuquin Papan ambi tantiacpaden utsi utsien ambi icmiaido iquendac.

Abitedi adecbidi icta, quenquiocquin chiaid

⁸ Dada chido bedabi icquido yec ubi yacpaden chido bedenquio icac bëdambo ictsiash. Adecbidi dadan bedabicquido icquin chidon dada bedmenquio icac bëdambo ictsiash. Adembidi nianten dada utsi bedmenquio icac bëdambo ictsiash.

⁹ Adquid icnubi mëmuntiapimbo yec cumapenec chudte bunquin chido bedshun inta. Adembidi chidon mëmuntiapimbo icquin dada bunquin dada bedmeta.

¹⁰ Adec dadan aton chido bedshun aidbëd icsho umbi tantiacpaden chienquio icquin Nuquin Icbon chuinëdaidquio mibi chuinu: Aton chido icquin min bënë nianec cuenenda, quequin chuipanëdash.

¹¹ Min bënë nianec cuenshun dada utsi bedmenda. Adenquio yec aidbëdbidi bëdambuec onqueshun bedme. Adembidi aton bënë icquin min chido: Mibi bunenquio iquebi, quequin chuiquin dada uashun ismequin cuenmenda.

¹² Nëbi Nuquin Icbon: Naden chuiban, cainquiocnobi Esus tantiaquid utsi umbi tantiacpadembi mibi chuinu. Dada Esus tantiaquid icnubi aton chido Esus tantiesa yec: Cun bënë niannu, quenquio icquid icsho isash: Cun chido icsambocquid neque. Cuenmenu, quenquio yec aidbëd tabadquid dada nec.

¹³ Adecbidi chido Esus tantiaquid icnubi aton bënë Esus tantiesa yec: Cun chido niannu, quenquio icquid icsho isash: Cun bënë icsambocquid neque. Niannu, quenquio yec aidbëd tabadquid chido nendac.

¹⁴ Aton bënë Esus tantiesa icnubi aton chido Esus tantiaquid icsho issun Nuquin Papan bënë tantiamequin bëdambuen isec. Adecbidi aton chido Esus tantiesa icnubi aton bënë Esus tantiaquid icsho issun Nuquin Papan tantiamequin chido bëdambuen isec. Mibitedi adquidpenquio icnuc min bacuëbotedi icsambocquido ictsiash. Adquid icbuedi Nuquin Papa tantiaquido icnuc min bacuëbo Nuquin Papan bëdambuen isaido nendac.

¹⁵ Utsibic aton bënëbëdi aton chido Esuquidistu tantiesa yec aidbëd tabadte bunenquio yec cuëshëdte bunec ma nianec nidpanuna, caimbi. Adquid icnubi Esus tantiaquid icsho aton bënën nianac: Cun bënë nec, quenquio icac bëdambo ictsiash. Adecbidi Esus tantiaquido icsho aton chidon nianac: Cun chido nec, quenquio icac bëdambo ictsiash. Nuquin Papan: Ma chushcananenquio yec bëdambuec tabadnu, queshun Esus tantiamiaido mibitedi nec.

¹⁶ Adquid icnuc ¿Mitsi paden tantie, aton chido icquin? ¿Mimbida min bënë Nuquin Papa yacno tabadmepe? ¿Mitsipaden tantie, aton bënë icquin? ¿Mimbida min chido Nuquin Papa yacno tabadmepe?

Nuquin Papan chiacpaden nabanec tabadquiota, quequin chiaid

¹⁷ Nuquin Icbon ambi tantiamiacpadombuen dadabëta chido: Esus tantiaquid icta, caid icquin bëdambuen nabanec tabadta. Adembidi Esus tantiaquidotedi chiembi.

¹⁸ Isadaidbo Esus tantiesa icsho shui dëbid dëteshunaid yec Esus tantiaquid yanash: Matsesën tantianushe, queshun ompoec shui dëbid dëteshunaidpenquio nebi, quenda. Adecbidi shui dëbid dëtemiabicquido yec Esus tantiaquid yanash: Shui dëbid dëtemenu, quenda.

¹⁹ Nëid shui dëbid dëtemequido nec. Nëid shui dëbid dëtemesabo nec, quenquio Nuquin Papa iquec. Adquid nec, quenquio icquin: Ma umbi chiacpadombuen naic tabadpanu, quequin Nuquin Papan tantiec.

²⁰ Esus tantiaquid yanash mibi tabadbocpadquiecbidi tabadta.

²¹ Iuaid icquin Esus tantiaquid yanash: Iuapenquio nebi, quenquio yec tabadta. Mibi iuaquidën: Cun iuapenquio mibi icmenu, cac: Ai, cata.

²² Iua Esus tantiaquid yanec nëbi iuapenquio yanshun Nuquin Icbo tantiaquin nashumbanquid iquendac. Adecbidi iuaidpenquio Esus tantiaquid yanec nëbi Esuquidistun iua icquin aidën namiaidquio iquendac.

²³ Nuquin Papan piucquid dadpen menequin bedshunacbimbuen abi tantiamiaido mibitedi nec. Adoaido icquin utsibo iuamenda.

²⁴ Cun utsibo, Esus tantiaquid yanash: Nuquin Papan ubi isec, quiash mibi tabadbocpadequi tabadta.

²⁵ Chidobotedi dadan bedabicquidobëta dada chido bedabi icquido tantiaquin naden chuita. Nuquin Icbon: Adquido aden chuita, quequin chiabi iccoshi. Adquid icshobi Nuquin Papan ubi bëdambuen isquin bëdambuen tantiamiaid icquin umbi tantiacpaden chuisho tantiashun: Abimbo chiec nec, quequin tantiata.

²⁶ Natiamiantequid uëshë yanec, quequin tantiec Esus tantiaquido yec dada chido bedabicquidbëd chido dadan bedmiabi icquid yec mibi tabadbocpadquiequi tabadta.

²⁷ Chido bedshun inquid yec aid nianec cuenenda. Adecbidi chido nibëdquid icquin: Bednu, quequin nibënenda.

²⁸ Chido bedec mibi icsainquio iquec. Adecbidi chido dadan bedabicquidën dada bedmec icsainquio iquec. Padnuen chido bedshun inquido yec natiamiantequid icnuc natiec tabadendac, quequin chiac: Ma adquidpenquio icpanu, queshun mibitedi chiec nebi.

Esus tantiaquidon bëdambuen tantiaid

²⁹ Tantia, cun utsibo, umbi chuibued tantiaquin mibitedi chuinu: Nidaidën iuec nuquitedi tabadtiapimbo icnubi Esus chote anoentsëqui yanendac. Adquid icnuc min chido bedash aidbëd tabadquid iquequi chido bedacmaidbimbuec tabadta.

³⁰ Adecbidi uënësquio yec shubiec sedenquequid iquequi cuishonquec tabadquin nabanacbimbuec tabadta. Adecbidi cuishonquec tabadquid iquequi uënësquio yec shubiec tabadta. Adecbidi mitsana dadpen bedquid iquequi atona nibëdquid tabadacbimbuec tabadta.

³¹ Adecbidi nëid nidaidën tabadec mitsana dadpen bedteuidi bunquin tantiaquid iquequi atona nibëdec bedte bunenquio yacbimbuec tabadta. Nëid nidaid abichobi nuqui isaidtedi Nuquin Papan nibëdanmendac.

³² Mibitedi natiec tabadbuedi ma adec tabadenquio icpanu, quequin chiec nebi. Chido bedabicquid icquin ma Nuquin Icbo tantiaquin nabannu, queshun: Aid bëdambo iquec, camequin nabanec tabadquid nendac.

³³ Padnuen chido bedquido icquin nidaidën icquiduidi tantiaquin nabannu, queshun aton chido: Bëdambo iquec, camenuenuidtsëqui nabanec tabadendac.

³⁴ Adec tabadquido icquin aton chidobëta ambi nabanaid tantiaquin: Nuquin Icbon chiacpadenuidtsëqui nabanec tabadnu, quetiapimbo iquendac. Padnuen dadan chido bedabicquidbëd niante bëdambuen tantiaquido icquin: Cun dada icsa uatsiash, quenquio icquin: Nuquin Icbouidi tantiaquin aidën chiaidquio nabannu, queshun Nuquin Icbo: Bëdambo iquec, camenuen nabanec tabadendac. Padnuen dada bedmequido icquin: Nidaidën icquiduidi tantiaquin nabannu, queshun aton bënë: Bëdambo iquec, camenuenuidtsëqui nabanec tabadendac.

³⁵ Dada bedmenda. Chido bedenda, quequin chiecpenquio nebi. Mibi bëdambuen namenuen mibi chiec nebi. Ma bëdambuec tabadquin Nuquin Icbo tantiaquioquin ma utsi uainquiocquin aidën tantiamiacpadombuen nabannu, quequin mibitedi chiec nebi.

³⁶ Dadan ambi: Bednu, caid bedte tiombi chido caniacsho issun: Nëbi umbi bedac bëdambo ictsiash, queshun aid bedquin icsambuen nainquio ictsiash.

³⁷ Dada utsibic ambi tantiacpadequi: Chido bedenquio iquembi, queshun bedenquio icac bëdambo ictsiash.

³⁸ Ambi bednu, caid chido bedquin bëdambuen naic. Utsimbic: Chido bedenquio iquembi, quequin bëdambuenshë naic.

³⁹ Chidon dadan bedaid icquin aton bënë uënësabi icsho nianec cuenesa nec. Bënë uënësambien dada utsin bedadquid. Cun bënë uënësoshe. Dada utsi bedmenu, queshun Esus tantiesa bedmenda.

⁴⁰ Chido utsibic: Dada utsi bedmenquio iquembi, queshun bedmenquio icac bëdambo iquec, caimbi. Umbi chuibued Nuquin Papan Mayanën tantiamiacpaden chiaid nec, quequin tantiembi.