Codinto 1 6 - El Nuevo Testamento en matsés

Chushcananaid tantiashun cuidte chuiquid Esus tantiesabobi chiaid

¹ Mibitedi utsi utsiec mibëtan Esus tantiaquidbëd nëishash chushcananash ¿atotsi quiash Nuquin Papa tantiaquido yacno nidshun chuimetiadquidi cuidte chuiquid Esus tantiesabi yacno nidshun mimbi chuimepe?

² Iuecshun Ambi tantiacpadombuen Nuquin Papa tantiaquidon Esus tantiesabon naid chuiquin cuidtequid chiendac, quequin ¿tantienquioda mibitedishun ique? Aden Esus tantiesabon naid chuisho tantiashun cuidembi, queshumbi ¿atotsi queshun mibëtan Esus tantiaquidbëd chushcananash Esus tantiesa cuidte chuiquid yacno nidshun mimbi chuibampe?

³ Adecbidi nuquitedi Esus tantiaquido icquin Nuquin Papabëd icquido chuimeshun cuidmembi, quequin ¿tantienquioda ique? ¡Adquid icnuc Esus tantiaquid nëishnanash chushcananquido icsho issun nuquitedi chuimeshun cuidmendac!

⁴ Mibitedi badiadquidën badiadquidënquiec nëishnanash chushcanantequid icnuc ¿atotsi queshun mibëtan Esus tantiaquidbëd nëishash chushcananshun cuidte chuiquid Esus tantiesa yacno buanshun: Mimbi tantiacpaden ubi chui, mimbi cape?

⁵ Umbi aden dada uaquin chiaid isash mibitedi dacuëdec natiendac. Mibitedi yacno nëishnanash chushcananquido nëish bëdanmequin chuiquid ¿Esus tantiaquid utsida nibëdquio icpec? Ai abi iquec.

⁶ Mibëtan Esus tantiaquid utsibo yacno nidenquio icquimbi cuidte chuiquid Esus tantiesa yacno nidshun adec utsibëd chushcananquid cuidmenuen chuimenda.

⁷ Nëishnanash chushcananenquio ictiadquidi mibëtan Esus tantiaquidobëd chushcananec mibitedi icsambuec tabadec. Esus tantiaquid utsin mibitedi icsambuen chuishunac ¿atotsi quiash ëcbedenquio icquin mëmuntiadquidi nëishash mibi chushcanampe? Adembidi utsin ampeshunac ¿atotsi quiash: Ma ampenu, quetiadquidi nëishash mibi chushquepe?

⁸ Adec tabadenquio ictiadquidi mibëtan Esus tantiaquido ampeshunquin icsambuen naic mibitedi tabadec.

⁹ ¿Icsambuen naic tabadquido Nuquin Papan namiacno tabadtiapimbo iquec, quequin tantienquioda mimbi icpe? Mua uadenda. Nadquidtedi Nuquin Papa yacno tabadtiapimbo iquendac. Nëidic piucquid bedec chudadquido. Utsibic ambibi nacnenshun papa caquin tantiaquido. Utsibic aton bënëpenquio chudmequido. Utsibic aton chidopenquio chudquido. Utsibic chido daëdi dachudnanquido. Utsibic dada daëdi chichudnanquido.

¹⁰ Utsibic ampequido. Utsibic atona dadpen bunec chieshëmënquido. Utsibic tantiadennuen acte paë uaid actennequido. Utsibic icsambuec chuishumënquido. Utsibic mua uaquin chuiquin utsi ampeshunquido. Adquidotedi Nuquin Papan ambi abucshun namiacno tabadmetiapimbo iquendac.

¹¹ Ënden mibitedi utsi utsiec adquido iccondaidi nëbi abi tantiaquido yansho issun acten mentoaido iquec. Adembidi mibitedi Nuquin Papan bëdamboshëcquid icmequin Nuquin Icbo Esuquidistu tantiaquid icsho mibi isaisabimbuecnuc bëdambuen isec. Adembidi Nuquin Papan aton Mayan meniaido mibitedi nendac.

Nuquin Papan namiac Esus tantiaquido icquin icsambuen nainquio icnuna, quiaid

¹² Mibitedi utsi utsiec: Ubi bunacpadembi nabanembi, mibi quepec. Ai, abimbo mimbi caic. Aden naid abitedi bëdambocquidpenquio nec. Ai, ubi bunacpadembi nabanembi, queshun nabanquin ëntiapimbo icmane, quiash aden nainquio yec tabadta.

¹³ Adembidi naden chiaid iquec: Pete piaid pucu yacno budtequid nec. Pucu yacno budtequid pete piaid nec, queuapec. Ai, abimbo mimbi caic. Adquid daëd icshobi Nuquin Papan nibëdquio icmendac. Adotequid icnuc mibi bunacpadombuen tantiaquin nabanquin mimbi natemaidi naic chudnanquin natepenquio min dada nec. Padnuen nuquin dada Nuquin Icbona nec. Adquid icnuc Nuquin Icbo nashunec tabadtequid nuquin dada nec.

¹⁴ Nadatiambocquid icquin Nuquin Papan Nuquin Icbo Esuquidistu uënësacsho uincuenmepanëdash. Adombuembidi nuquitedi uënësacsho uincuenmendac.

¹⁵ ¿Abi tantiaquid yec Esuquidistubëd abentsëc yacbimbuec tabadquid nebi, quequin tantienquioda mimbi icpe? ¿Aidbëd abentsëc yacbimbuec tabadbuedi icsambuen naic piucquid bedec chudadquidbëd daëdash abentsëc yacbimbuecta tabadtiad? Padenquio ictiad, caimbi.

¹⁶ ¿Dadan chido piucquid bedec chudadquid chudec daëdash aidbëd abentsëc yacbimbuecquid yanec, quequin tantienquioda mibitedishun icpe? Nuquin Papan dada uamiampid nad iquec: Aton chido bedash aidbëd daëdash matses abentsëc yacbimbuecquid nec, quequin chuipampic.

¹⁷ Adquid icnuc Nuquin Icbo tantiaquid yec aidbëd daëdash abentsëc yacbimbuen tantiec tabadendac.

¹⁸ Mimbi natemaidi piucquid bedec chudadquido chido chudenquio yec cuenta. Utsi icsambuen naquin mimbi min dada icsametiapimbo iquendac. Adquid icnuc piucquid bedec chudadquid chido chudquin mimbibi min dada icsamendac.

¹⁹ Nuquin Papan aton Mayan meniaido mibitedi nec. Adoaido yec Nuquin Papa tabadte shubu mibi nec. Adquid icnuc: Nuquin Papan Mayan Bëda ubëd tabadec, quequin ¿tantienquioda mimbi icpe? Mibibi: Cun dadan icbo nebi, quetiapimbo mibitedi iquec.

²⁰ Nuquin Papan piucquid dadpen menequin bedshunacbimbuen ambi tantiamiaido yec aidëna mibitedi nec. Adquido icquin aidën chiacpadec bëdambuec tabadquin Nuquin Papa tantiata.