Codinto 1 4 - El Nuevo Testamento en matsés

Esusën: Ubi chuibenneta, caidon nate chiaid

¹ Esuquidistu nashunquin chuibennequido nec, quequin ubitedi tantiata. Adquid icquin Nuquin Papan ambi matses tantiamenquio icpampidi tantiamequin chuibanquid icmiaido nec, quequintsen ubitedi tantiata.

² Aden Esus nashunquido icquin aidën chiacpadombuen nabanquin bëdambuen ismequidquio nendac.

³ Padnubi mibitedishun ubi caic: Icsambo iquec, cac uënësquio yec natienquio iquebi. Adembidi cuidte chuiquidon ubi caic: Icsambo iquec, cac natiec dacuëdenquio icuaibi. Adecbidi ubibi: Icsambuen naquid nebi, cadtiapimbo iquebi.

⁴ Nëbi umbi icsambuen naid tantienquio iquembi. Aden tantiequi: Icsambuen naisambo nebi, quetiapimbo iquebi. Nuquin Icbombien umbi naidtedi tantiaquin abimbo chiendac.

⁵ Adquid icnuc utsibo isquin: Aid Icsambuen naquid nec, cainda. Nuquin Icbo choshombien icsambocquid cuidendac, quequin aid cainta. Aidëmbi matsesën ompodshon naidbëta ëquëducshun tantiaid chuibanquin tantiameshun cuidendac. Adoshombic utsibo chuiquin: Mibi bëdambuec tabadoc, quequin abentse abentsen chuibanquin Nuquin Papan bëdambocquid menebanendac.

4. Dadpen tantiaquidquio nebi, quequin Codinto yacnocquidon chiaid ( 4.6-21 )

⁶ Tantia, cun utsibo, mibitedi chuinu. Ma Nuquin Papan Chiaid utsi uaquin chienquio icnu, queshun Apodon naidbëta umbi naid chuibanembi. Adembidi icsambuen tantienda. Ubi chuibanquid bëdamboshëcquid nec. Aidpadquid utsi nibëdec, quenda.

⁷ ¿Tsuntsin: Utsibo padenquio icquin: Mibitedi bëdambocquid nec, capash? Nuquin Papambien mibi adoambo iquec. Adoambo yac ¿atotsi quiash: Ubitedi bëdambocquido nebi, mibi quepe? Ubibi adquidquio yanobi, quiacbimbuen mimbi chuipec.

⁸ Mibi bunaidtedi mitsana dadpen bedash mibi tabadec. Aden bedquido yec chuiquid tapabobimbuecquin mimbi ubitedi bëdambuen istiapimbo iquec. Abimbo chiec: Chuiquid tapambo nebi, mibitedi quenuc mibëd chuiquid ictsiandabi.

⁹ Adec mibitedi tabadnubi naden tantiec tsadebi. Esuquidistun: Ubi chuibenneta, caido icsho matses utsibon bedaido cuessunnenun tsiuec chomiaidbimbuecquid nebi. Adec Nuquin Papan namiaido icsho abi yacno abuc abëd icquidobëtan nidaidën icquido matsestedishun mamënshunaidbimbuecquid ubitedi nec, quequin tantiec tsadebi.

¹⁰ Ubitedi Esuquidistun: Ubi chuibennequid icta, caido icquin chuibansho tantiash: Ambembi chiec onquequido nec, quepec. Mibitedien Esus tantiaquido icsho: Bëdambuen tantiaquidquio nec, quequin mibi tantiec. Ubitedi caic: Tantienquiocquid nec, quenubi mibitedi: Tantiaquidquio mibi nec, mimbi ubi capec. Matsesën ubitedi tantienquio icnubi mimbitedi ubi tantiaquiec.

¹¹ Ubitedi Esuquidistun: Chuibenneta, caido yec pete bunec tabadebi. Adecbidi acte bunequi tabadebi. Adecbidi dashcute abentsëqui icnuc natiec tabadebi. Adecbidi chieshëmënquidon natiamiaido nebi. Quenenash icte shubu nibëdquido nebi.

¹² Cuna bednuec cun mëdanten nabanec uinmabudec chonoadquido nebi. Chieshëmënquidon: Icsambocquido nec, quequin icsambuen chuishunaqui aido cuidenquio icquin bëdambo icmequin chuibanquido nebi. Utsibon natiamequin mëyanaqui chieshtoenquio icquido nebi.

¹³ Adembidi utsibon icsambuen chuishunaqui cuidnanenquio icquin bëdambuen chuiquido nebi. Icsa tsindoaid neque. Secanu, cacbimbuen icsambuen isaido nebi. Aden ënenquio icquin nëbi matsesën chieshënaid nebi.

¹⁴ Umbi dada uaid isash mibitedi: Ma natiec uënësquio yannu, quenquio icquin: Cun bacuëbobimbuecquido yec umbi tantiaidombo icsho: Ma bëdambuec tabadnu, quequin chuiquin dada uaic nebi.

¹⁵ Mibitedi Esus tantiamenuen chuibanquido dadpenquio 10 midted icnubi min papabimbuecquid daëdpactsëc iquec. Ubien mibitedishun papabimbuecquid nec. Umbia: Esuquidistu abided cuidadec uënëspanëdash, quequin Chiaid Bëda chuibanac aid tantiaquido yanash Esuquidistubëd abentsëc yacbimbuec tabadquid mibitedi yanondac.

¹⁶ Adquid icquin umbi nabambocpadombuen naic bëdambuec tabadta, quequin mibitedi chiec nebi.

¹⁷ Umbi nabanaid ma chuibannu, queshun Timoteo mibi yacno nidmiombi. Aidi umbi chuibanac Nuquin Icbo Esus tantiaquidquio yanash cun madobimbuecquid nec. Aidëmbi umbi chiacpadombuen naquin Esus tantiaquido iccuededacnoshon umbi Esus chuibenniondacpadombuembidi mibitedi chuibanuaquin padpiden tantiamendac.

¹⁸ Mibitedi utsi utsiec: Pabado ubi isec chotiapimbo iqueque. Umbimbo chuibannu, quequin chuibanec.

¹⁹ Aden chuinubi Nuquin Icbo bunacpadec badedquio mibitedi isec nidendabi. Adshumbic: Ubiuidtsëqui bëdambocquid nebi, quequido cain: Abi onquiaid tantiaquimbi ambi nabanaid isnu, caindambi.

²⁰ Nuquin Papan namiaido yec ambibi tantiacpadec onqueuidequi onquesa nec. Padnuen Nuquin Papan Mayanën tantiamiacpadec onquequidëmbien aidën tantiamiacpadombuen nabanec tabadquido nec.

²¹ ¿Mibi yacno nidash puduedshundambi mibi cuesquin cuidacbimbuen chushcape? ¿Adoenquio icquindambi: Mibitedi tantiembi, quequin bëdambuen chuibanquin mibi tantiamepe?