Codinto 1 3 - El Nuevo Testamento en matsés

Esuquidistu tantiaquido yec chushcananenda, quiaid

¹ Cun utsibo, mibitedi: Esus tantiaquidombo nec, queshun mibi dadpen chuibantsenombi. Esus bëdambuen tantiabenabictsëcquido yec bacuëmpibimbuecquido nec, queshun daëdpactsëc tantiamequin mibitedi Esuquidistu chuibanombi.

² Bacuëmpi nëbi tishtsaidën shumauidi chishquin pete tsasimbocquid penquio iquec. Adquidbimbuec mibitedi icsho issun: Tantienquio icnushe, queshun Nuquin Papan Chiaid daëdpactsëc chuibanondambi. Aden chiondaqui ënden iccondacpadquiobidi mibitedi nëbi icuapec.

³ Esus tantiesa tabadacpadec chushcananquido yec Esus bëdambuen tantiabenabictsëcquido mibitedi nec. Adquido iquec Nuquin Papa tantiesabon tantiacpaden tantiaquido mibitedi nec.

⁴ Mibitedi utsi utsiec: Pabadon chuibanaid nebi, quec chushquepec. Adnubi utsi: Apodon chuibanaid nebi, quec chushqueuapec. Adec chushcananec tabadquido yec Nuquin Papa tantiesabon tantiacpaden tantiaquido mibitedi nec.

3. ¿Mitsi padquid Esusën: Ubi chuibenneta, caid nepec? ( 3.5—4.5 )

⁵ ¿Mitsipadquidibi Apodobëd nepe? Nuquin Papa nashunquid icquin Esuquidistu chuibennequid ubi daëdi nebi. Adquid icquin umbi chuibannac Esuquidistu tantiaquid mibitedi yanondac. Nuquin Icbon: Naden chuibanta, cacpadombuen ubi daëdshun chuibanoc.

⁶ Tiedën pete ëshë siacbimbuen mibitedi Nuquin Papan Chiaid: Ma Esuquidistu tantiaquiono, queshun chuibanondambi. Iuecash Apodotsen mibi yacno nidshun tiedën nidtsinaid: Ma bëdambuec caninu, queshun acte machiuindoniacbimbuen: Esuquidistu ma udictsëc tantiaquiono, quequin chuibanuapanëdash. Aden ubi daëdshun chuibannubi pete ëshë canimiacbimbuecnuc Nuquin Papan mibitedi tantiamebampanëdash.

⁷ Tiedën ambi nitsinaid taneshcaquin canimesa matses nec. Adquiobidi Nuquin Papan Chiaid chuibanquid matses tantiamesa icnubi Nuquin Papambien Esus tantiamec.

⁸ Tied icbon abi tied nitsinshunquidbëta abi neshcashunquid bëdambo icmequin menendac. Adoacbimbuen ambi bëdambuen nabanaidtedi tantiaquin ambi tantiacpaden bëdambo icmequin Nuquin Papan bëdambocquid menendac.

⁹ Nuquin Papa nashunquid icquin Esuquidistu chuibennequid Apodobëd nebi. Adquid icnubi umbi tied dëdshun nitsinaidbimbuecquido mibitedi nec. Adecbidi Nuquin Papana umbi shubu uaidbimbuecquidbidi mibitedi neuaic.

¹⁰ Nuquin Papan ubi bëdambuen isquin: Esuquidistu mimbia chuiban. Ma tantianu, cac mibitedi chuibanondambi. Shubu uanun buintad bëdambocquid teshun aidba tabëcacbimbuen umbia chuibanondambi. Adshumbic utsibontsen adombuembidi aidbidi chuibenneuaic. Aden chuibennequidon: ¿Adambi bëdambuen shubu uapoba? quiacbimbuen tantiac bëdambo ictsiash.

¹¹ Umbi buintad tabëcaid icnubi utsi nitsintiapimbo yacbimbuen umbia Esuquidistu chuibanan utsibon utsi uaquin chuibantiapimbo iquec.

¹² Umbi buintad tabëcacsho odo caid yec shocosh ushu caid yec cuënote bëdambo isadquid yec cute cuëshaid yec tsatsibiecquid yec tiantebiecquid yec quenuc nacnenquin shubu uacbimbuen Nuquin Papan Chiaidquio chuibanuaic.

¹³ Adshumbic iuecshun matses cuidte uëshëmbi choshon Ambi Chiaid chuibanquido abitedi chuibanmendac. Aid uëshëmbi: ¿Ada bëdambo iqueque? Isnu, queshun ambi nacnenaid pichicaquin tanacbimbuen ambi bëdambuen naidbëta ambi icsambuen naid chuimendac.

¹⁴ Ambi chiaidquio tantiaquin chuibanac tantiaquidombo yansho issun ambi bëdambuen chuibanaido tantiaquin Nuquin Papan bëdambo icmequin bëdamboshëcquid menendac.

¹⁵ Padnuen chuibanquid utsi ambi shubu uaid nëdënquec pichiquenuc cuenacbimbuec ambi chuibanaido nibëdnuc aiduidtsëqui Nuquin Papa yacno tabadtequid iquendac.

¹⁶ Mibitedi Nuquin Papa tabadte shubu nec. Adquid icnuc: Nuquin Papan Mayan ubëd iquec, quequin ¿tantienquioda mimbi icpe?

¹⁷ Nuquin Papa tabadte shubu bëdamboshëcquid mibitedi nec. Adquid icbuedi mibibi min dada icsauadquid icsho Nuquin Papan cuidtequid nendac.

¹⁸ Adec aid tabadtequid iquequi mibibi mua uadec tabadenda. Matsesën ambibi cumapenen tantiaquin chuibanaid tantiash: Tantiaquidquio nebi, quenda. Matses dadpen tantienquio icquidbimbuecquid icta. Matsesën tantiacpaden nainquiocquin abimbo tantiaquin nabanquid yec tantiaquidquio mibitedi yanendac.

¹⁹ Matses: Cumapenen tantiaquin nabanquidquio nebi, quesho tantiashun Nuquin Papan: Ambembi chiec onquequido nec, caindac. Adquid icnuc Nuquin Papan chuiquin dada uamiampid nad iquec: Matses: Cumapenen tantiaquidquio nebi, quesho tantiashun Nuquin Papan ambi dectanaidëmbi siacbimbuen aidën tantiacpadombuen namenquio iquendac, quequin chuipampic.

²⁰ Adembidi: Dadpenquio tantiaquidquio nebi, quequidon tantiaid tantiaquid yec Nuquin Icbo: Ambembi chiec onquequido nec, quequin chuipampic.

²¹ Adquid icnuc dadpenquio tantiaquin nabanquid yec: Ubiuidtsëqui bëdambocquid nebi, quenda. Nuquin Papan uaid abitedimbo mitsana nendac.

²² Ubi yec Apodo yec Petedo yec abubëd nidaid yec uënësambo icquido yec uënësmiantequid yec nëbi tabadtequido yec iuecash tabadtequido yec quec mitsana abitedi nec.

²³ Mibitedi Esuquidistuna nec. Esuquidistu Nuquin Papana nec.