Codinto 1 16 - El Nuevo Testamento en matsés

IX. ËNQUIMBI CHIAID ( 16.1-24 ) Esus tantiaquid utsibo menenun piucquid sambededte chiaid

¹ Edusaden yacnocquido Nuquin Papa tantiaquido menenun mimbi piucquid sambededaid chuinu. Nidaid cuëshë Cadasia caid yacnocquid Esus tantiaquido umbi dada uaquin chuibanondacpadombuen mimbitsen nabanta.

² Dominco uëshën uëshënquien mimbi bedbanaidtedi tantiaquin abentsëcshun abentsëcshunquien sambededta. Chonoadquin daëdpactsëc bedquidën daëdpactsëc dayun uanubi piucquid dadpen bedquidën dadpen sandoshon dayun uata. Adoshon dayun uaid sambededshun bedbanash ubi chosho isash: Piucquid sambedednuna, quenquio mibitedi iquendac.

³ Mibi yacno ubitsen nidshun Esus tantiaquido mimbi: Nëidtedi nidec, quequin chiaido icsho Edusaden yacno nidmequin: Umbi nidmiaido bëdambuen ista, quequin chuiquin dada uaidbëta mimbi piucquid sambededaid: Ma buannu, queshun menendambi.

⁴ Mimbi: Aidobëd nidtan, cac: Ubitsen nidnu, quiash adecbidi aidobëdi nidtsiabi.

Pabadon abi nidte tantiaquin chiaid

⁵ Nidaid cuëshë Masedonia caid matambidanec nidequi shubu dadpen icquid Codinto yacno nidendabi.

⁶ Adash: Isbidannu, quebuedi iuec mibëd tabadash iquenuanquid ënëdan: Utsi yacno nidnu, quesho mibi bunacpaden ubi nashunquin mimbi piucquid menendac.

⁷ Nëbi mibi yacno ushenquio icquin isbidantiapimbo iquebi, quiash mibi yacno nidenquio iquendabi. Iuecash Nuquin Icbon tantiacpadec mibëd iuec tabadnush nidtanendabi.

⁸ Shubu dadpen icquid Epeso yacno isadaidbon aton tiedën caniquid tidico caid bedaid tantiate uëshën cuishonquec tabadaid pentecostes caid choacnobi cuësquec iquendabi.

⁹ Ambo Nuquin Papan Chiaid tantianu, quequid dadpen iquec. Adsho badedbadedquien: Ma tantianu, queshun Esuquidistu chuibansho tantiaquid icnubi utsibo ubi chieshënquido nëmbo dadpen iquec.

¹⁰ Mibi yacno Timoteo nideque. Nidacsho bëdambuen ista. Ubipadquid yec Nuquin Icbon namiaidquiobidi Timoteo nec.

¹¹ Adquid icsho: ¿Ubëd icquidta nedic? quequin chieshënenquio icquin iuedta. Adoac aidi: Ambo nidnu, quesho bëdambuen isquin nashunta. Ma ubi isec chono. Esus tantiaquid utsibobëd Timoteo chosho isnuen cainec tabadebique.

¹² Nëbi nuquin utsi Apodo cain: Esus tantiaquid utsibobëtan ma mibitedi istannu, queshun Apodo iuen chuiuidombi. Aden chiaqui: Nëbi nidte bunenquio iquebi, quiosh. Iuecash istante bunec aidi mibi yacno nidendac.

Naden nac bëdambo ictsiash, quequin chiaid

¹³ Icsamane, queshun isucunacbimbuen chieshtoenquio icquin Esus tantiaquidquio icta. Adecbidi natiamiantequid icnuc dacuëdenquio yec chieshtoenquio yec tabadta.

¹⁴ Utsibobëd tantiananec tabadquin mimbi nabanaid bëdambuen nabanta.

¹⁵ Cun utsibo, nidaid Acaya caid yacnocquid Estepanas aton shubun icquidobëd abia Esus tantiaquido yanaccondash, quequin mibitedishun tantiec. Adquid yanshun Esus tantiaquid utsibo tantiaquin nashumbanquido nebi, queshun aidon nashumbanec.

¹⁶ Aidon chiacpaden nabanec mibitedi tabadta. Adembidi aidon nabanacpadembidi Esus tantiaquid utsibo tantiaquin nashumbanec tabadta.

¹⁷ Estepanas yec Podtunato yec Acaico yec quec choacsho isash bëdambo iquebi. Mibitedi ubëd ictiapimbocnobi aido chochosho isash bëdambo iccobi.

¹⁸ Mibitedi bëdambo icmebocpadombuembidi aidon nashunquin bëdambo icmioshi. Aidopadquid utsi icsho issun aidën chiacpaden nabanta.

Esus tantiaquidon mibitedi tantiec, queshumbic ënquin chiaid

¹⁹ Nidaid cuëshë Asia caidën icquid Esus tantiec iccuededquid utsi utsiec yacnocquidon: Mibitedi tantiembi, quequin chuita, cac mibitedi chiec nebi. Adembidi Aquidan aton chido Pisidabëtan aton shubu yacnoshon Nuquin Icbo tantiec iccuededquidon: Aido tantiaquiembi, quequin chuita, cac chiec nebi.

²⁰ Adembidi Esus tantiaquid utsibotedishun: Mibi tantiembi, quequin chiosh. Aden Esus tantiaquido icquin mibi padquid utsibo chuiquin: Mibitedi tantiembi, cabanta.

²¹ Nëbi cun mëdanten: Mibitedi tantiembi, quequin umbimbo nëiduidtsëqui dada uaic nebi.

²² Matses Nuquin Icbo tantiesa icsho ma Nuquin Papan aidi cuidquiopanuna, quequin chiondambi. Cun Icbo, cho, capombi.

²³ Ma Nuquin Icbo Esusën mibitedi bëdambuen isquin bëdambo icmepanuna.

²⁴ Nuquin Icbo Esuquidistubëd abentsëc yacbimbuec tabadquido icsho umbi ënenquio icquin tantiaido mibitedi nec. Amen. Aidted chuiquin dada uaombi.