Codinto 1 14 - El Nuevo Testamento en matsés

Mimbi chiaid chuibanquid ubi icme, quiaid

¹ Utsibobëd tantiananquin nabante bunquidquio icta. Adembidi: Min Mayanën namiaid icquin chuibante bunquiebique. Ubi tantiame, quequin Nuquin Papa chianneta. Adembidi: Min Mayanën namiaid icquin mimbi iuecshun natequid chiaid tantiaquin chuibante bunquiebique. Ubi adquid icme, quequin chianneta.

² Esus tantiaquido utsi utsiec abi onquiacmaid onquete utsin onquequido yec Nuquin Papabëd onquesho aton matsesën tantiatiapimbo iquec. Adec aton onqueten onquenquiocsho aidon tantienquio iquec. Aton mayanën tantiamiacpadec abi onquiacmaidënquio onquesho Nuquin Papan tantiec. Aden tantianubi matsesën tantienquio iquec.

³ Padnuen Nuquin Papan iuecshun natequid chiaid tantiaquin chuibanquidëmbien: Ma Esus tantiaquido bëdambuen tantiec chieshtoenquio yec tabadnu, queshun chuibanec. Adembidi utsibobëd tantiananquin nabanec: Ma dayacquio yec bëdambuec tabadnu, queshun chuibanec. Adembidi tantiananquin dayacquio icmiaid icquin natiamiaid utsibo icsho: Ma bëdambo yec cuishonquenu, queshun dayacquio icmequin chuibanec.

⁴ Abi onquiacmaid onquete utsin onquequin chuibanquid yec abibi bëdambo yanec. Padnuen Nuquin Papan iuecshun natequid chiaid tantiaquin chuibanquidëmbien: Ma Esus tantiaquido bëdambuen tantiec chieshtoenquio yec tabadnu, queshun chuibanquido nec.

⁵ Abi onquiacmaid onquete utsin mibitedi onquiac bëdambo ictsiash, quequin tantiembi. Aden tantiaquid icquimbi: Nuquin Papan iuecshun natequid chiaid tantiaquin onquequin chuibanac bëdamboshë ictsiash, caimbi. Aid chuibanec abi onquiacmaid onquete utsin onquiaid bëdambo iquec. Chuibanac tantienquiocsho issun Nuquin Papan Mayanën namiaid icquin abi onquiacmaid onqueten onquequin chuibansho aid onquete tantiaquidën: Ma Esus tantiaquido bëdambuen tantiec chieshtoenquio yec tabadnu, queshun utsibo tantiamequin chuibanec.

⁶ Cun utsibo, aid tantiaquin chuinu. Mibi yacno isec nidshun umbi mibi onquiacmaid onquete utsin onquequin chuibansho tantienquio yec: Bëdambuen chuibanosh, quetiapimbo yec mibitedi tabadtsiac. Padnuen min onqueten naden chiac mimbi tantiatsiac. Nuquin Papan ubi tantiamiaid umbi chuibansho mimbi tantiatsiac. Adembidi abimbo chiaid chuibanac mimbi tantiatsiac. Nuquin Papan iuecshun natequid chiaid tantiaquin chiaidquio chuibanac mimbi tantiatsiac. Adembidi umbi Nuquin Papan Chiaidquio chuibanac mimbi tantiatsiac.

⁷ Shoncatempi abibi shonquetiapimbo iquec. Adembidi, aid shoncaisan shoncasho tantiash: Bëdambuen shoncaic, quetiapimbo utsi iquec. Adecbidi tintincate cuëdënmesan icsambuen cuëdënmesho tantiash: Bëdambuen cuëdënmec, quetiapimbo iquec.

⁸ Adembidi: Utsibobëd cuesnanec ma chochono, queshun ambi tantiabocpadpenquiocnoc shoncasho tantiash sondado cuesnannu, quec nacnemëdenquio ictsiash.

⁹ Adquidbimbuec mibitedi iquec: Adembidi aton onquetempenquio onquequin chuisho ¿Mitsi paden utsibon tantiapatsiash? Tantienquio ictsiash. Adquido yec nibëdquio yacno onquiacbimbuec mibitedi onquetsiac.

¹⁰ Nëid nidaidën onquete utsin utsinquiec onquequid dadpenquio iquec. Aton onquetembi onquequin chuibansho aton matsesën tantiec.

¹¹ Adec umbi tantiacmaid onquete utsin onquesho umbi tantienquiocsho isash: Cun matsespenquio nec, quequin tantiec. Adembidi aton onquetempenquio umbi chuibansho tantiash: Cun matsespenquio nec, quequin tantiatsiash.

¹² Adquid icnuc mibitedi Nuquin Papan Mayanën namiaid icte bunquidquio icquin: Esus tantiaquid utsibo: Ma chieshtoenquio yec bëdambuec tabadnu, quec aido nashunte bunquidquio icta.

¹³ Adquid icnuc mibitedi utsi utsiec mibi onquiacmaid onquete utsin onquequid icquin mimbi chuibanac tantienquiocsho issun: Umbi chuibanaid tantiamequin aidën onqueten chuibanquid ubi icme, quequin Nuquin Papa chuita.

¹⁴ Ubi onquiacmaidën Nuquin Papa chiec cun mayan onquiaid umbibi tantienquio iquembi. Aden chiec ubi onquiaid tantiadenquio iquec.

¹⁵ Tantienquiocquid icquin ¿mitsipadembimbi nape? Naden naimbi. Cun mayanën chuimiacpaden Nuquin Papa chiannembi. Cun mayanëmbidi cuëdënmiacpadec cuëdënebi. Adembidi umbimbotsen tantiacpaden Nuquin Papa chuitanec Nuquin Papa tantiec cuëdënebi.

¹⁶ Mibi iccuededacnoshon min mayanën tantiamiacpadec: Mimbi naid bëdambo iquec Papa, quequin onquete utsin onquequin Nuquin Papa mimbi chuipec. Adnuc matses utsi puduedshun aton onquetempenquio onquequin chuibansho tantiashun mibëtan aidën: Mibi bëdambo iquec, quequin Nuquin Papa chuitiapimbo iquendac.

¹⁷ Puduedquid matses onquiacmaidën onquequin mimbi Nuquin Papa chuiquin mimbi bëdambuen chiec. Adnubi mibëd iccuedednuec matses utsi chobued mibi onquiaid tantienquio yec: Bëdambo iquec, quetiapimbo iquendac.

¹⁸ Mibitedi dëniaquec onquete utsin onquequidquio icquin: Mibi bëdamboshë iquec, Papa quequin Nuquin Papa chiannembi.

¹⁹ Aden chuiquid icquimbi Esus tantiaquido iccuededacno puduedshun aton onqueten onquequin 5tedpactsëc cuembo chuibantsiambi. Ma aidon tantianu, queshun 10mid abi onquiacmaid onquete utsin onquequin chuibante bunenquio iquebi.

²⁰ Cun utsibo, mibitedi bacuëbon tantiacpaden tantiec tabadenda. Bacuëbo tantiabenabictsëcquidën icsambuen naid tantienquio yacbimbuec tabadta. Adec tabadquin caniaidën tantiacpaden bëdambuen naic tabadquin ismeta.

²¹ Nuquin Papan naden chuiquin dada uamiampid iquec: Abi onquiacmaid onquete utsin onquequin: Ma isadaidbon tantianu, queshun chuibanmendambi. Aden aton matsesëmpenquio onquequin chuibanaqui tantiate bunenquio icquin umbi chiacpaden nate bunenquio iquendac, quec Nuquin Icbo, quequin chuipampic.

²² Adquid icnuc abi onquiacmaid onquete utsin onquequin chuibanaid Esus tantiesabo tantiametequid icnuc Esus tantiaquido tantiametequidpenquio nec. Aden chiaid icnubidi Nuquin Papan iuecshun natequid chiaid tantiaquin onquequin chuibanaid Esus tantiaquido tantiametequid icnuc Esus tantiesabo tantiametequidpenquio nec.

²³ Esus tantiaquidtedi iccuededec abitedi abi onquiacmaid onquete utsin onquequin chuibanec onquecuedednubi matses utsi Esus tantiesa puduedshun tantiatanec: Mibitedi tantienquio yec abembi onquequido nec, quetsiash.

²⁴ Padnuen Nuquin Papan Chiaid aton onqueten Esus tantiesa puduedshun chuibansho tantiash abibi datantiadquin tantiec: Icsambuen naquid nebi, quequin tantiabentsiash.

²⁵ Adash: Nëbi Esus tantiate bunebi, queshun ambi icsambuen naid chienquio icbuedëmbi aidtedi chuibanash dannëshën tinquebudshun: Nuquin Papa bëdambo iquec, quequin chuitanec: Abimbo caic. Mibitedibëd Nuquin Papa iquec, quequin Esus tantiaquid yanshun chiendac.

Esus tantiaquido iccuededquin bëdambuen nabanta, quequin chiaid

²⁶ Tantia, cun utsibo. Naden mibi chuinu. Mibitedi Esus tantiec iccuedednuc utsi utsiec cuëdënte cuëdënec. Utsimbic Nuquin Papan Chiaid tantiamequin chuibanec. Utsimbic: Nuquin Papan naden ushquin isacbimbuen ismioshi, quequin Nuquin Papan ismiaid chuibanec. Utsimbic abi onquiacmaid onquete utsin onquequin chuibanec. Utsimbic abi onquiacmaidën onquete utsin onquequin chuibansho tantienquiocsho issun aid onquete tantiaquidën: Ma utsibon tantianu, queshun chuibanec. Aden chuibanquin: Ma Esus tantiaquidtedi bëdambuen tantiec chieshtoenquio yec tabadnu, queshun aidtedi nabanec tabadta.

²⁷ Abi onquiacmaid onquete utsin onquequin chuibannu, quequid daëd icquid bëdambo iquec. Adecbidi 3ted icquid bëdambo iquec. Aidted icsho issun abentsëcshun abentsëcshunquien chuiban, cata. Aden abi onquiacmaid onquete utsin onquequin chuibansho aidën onquete tantiaquid chuiquin: Ma tantianu. Iccuededquidon onqueten chuiban, cata.

²⁸ Aden abi onquiacmaid onquete utsin onquequin chuibanaid tantiaquin iccuededquidon onqueten chuibanquid nibëdnuc abitedi tantiamec onquenquio yec ënëdash ma abentsëqui tsadquin Nuquin Papa otacquiocquin chiec onquepanuna.

²⁹ Adecbidi Esus tantiaquido iccuededacno: Chuibannu, quequid Nuquin Papan oncamiaid daëd icquid bëdambo iquec. Adecbidi 3ted icquid bëdambo iquec. Aidted icquin chuibansho tantiec tabadquin: ¿Abimbobida chuibanquin naique? Tantianu, quequin utsibon Nuquin Papan Chiaidquio isbanquin tantiec.

³⁰ Aden chuibannubi mibëd iccuededquid abentsëc Nuquin Papan Mayanën tantiamiac tsadbuedi nidtosho isash: Ma aidëntsen chuibannu, quiash ambia chuibanquid ënëdta.

³¹ Aden abitedishun Nuquin Papan: Umbi iuecshun natequid chuibanquid icta, caid icquin abentsëcshun abentsëcshunquien Nuquin Papan iuecshun natequid chuibanec. Chuibansho tantiash: Ma abitedi bëdambuen tantiabenash dayacquio yec tabadnu, queshun chuibanec.

³² Nuquin Papan: Umbi iuecshun natequid chuita, caid icquin Nuquin Papan oncamiaidon tantiacpaden chuibanquid nec. Aecbidi aidën tantiacpadec ënëdquid nec.

³³ Nuquin Papa bëdambuec tabadmianquid nec. Adquid yec tantiadenquio yec onquecuededsho bëdambuen istiapimbo icquid nec. Nuquin Papan tantiamiaido yec Esus tantiec icuededquido bëdambuec tabadquido nec.

³⁴ Esus tantiaquido iccuededacnouësh onquenquio yec otacquio tabadquid chidobo nec. Nuquin Papan Moises chiampicpadec: Cun chuiquid cun bënë nec, quequid chidobo nec.

³⁵ Ashunquio chienquio yec otacquio yec tsadshun shubuno nidshun: Chuibambued tantiambo iccombique. Ubi chui, quequin aton bënë chuimec. Esus tantiaquido iccuededacnoshon chidon onquequin chiac icsambo iquec.

³⁶ Mimbia bedanquin Nuquin Papan Chiaid chuibanquidpenquio mibitedi nec. Mibiuidtsëcpenquio Nuquin Papan Chiaid chuibanac tantiabenquido mibitedi nec.

³⁷ Nuquin Papan oncamiaidquio nebi, quequidën naden tantiatsiash: Ma tantianu, queshun Nuquin Icbon tantiamiacpadombuen chuiquin Pabadon dada uaid nec, quequin tantiatsiash. Adembidi Nuquin Papan Mayanën namiaidën tantiauatsiash.

³⁸ Adombuen tantiadenquio icnoc chuibansho aidon chuibanaid tantienda.

³⁹ Tantia. Chuinu, cun utsibo. Nuquin Papan Mayanën namiaid icquin ambi iuecshun natequid chiaid tantiaquin chuibante bunquiota. Adembidi abi onquiacmaid onquete utsin onquequin chuibannu, quesho tantiashun padi cainquio icquin chuibanmeta.

⁴⁰ Aden chuibanmequin: Abentsëcshun abentsëcshunquien chuiban, quequin bëdambuen chuimeta.