Codinto 1 13 - El Nuevo Testamento en matsés

¹ Matses utsi utsiec onquiacpadquiec onquequid nebi. Adecbidi Nuquin Papabëd icquido onquiacpadquiec onquequid nebi. Adec onquequid nebi, quebuedi utsibobëd tantiananec tabadesa yec tsentsencate icsactsëcquio cuëdmiacbimbuecquid ictsiabi.

² Nuquin Papan Mayanën namiaid icquin Nuquin Papan iuecshun natequid chiaid tantiaquin chuibanquid iquequi utsibobëd tantiananec tabadesa yec abenquiobi icquid ictsiabi. Nuquin Papan ambi matses tantiamenquio icpampid tantiaquid nebi, quebuedi utsibobëd tantiananec tabadesa yec abenquiobi icquid ictsiabi. Umbi chiac Nuquin Papa nadatiambocquid icquin mananuc macuësh tapa icbuedi manniactsiash, quequin tantiaquidquio iquequi utsibobëd tantiananec tabadesa yec abenquiobi icquid ictsiabi.

³ Atona nibëdquido icsho issun cuna abitedi menequidquio iquequi utsibobëd tantiananec tabadesa yec abenquiobi icquid ictsiabi. Adembidi ubiuidtsëqui bëdamboshëcquid ictsiabi, queshun ubi cuessunneshun cun dada pichicaquin nëdëncata, catsiambi. Aden tantiaquid iquequi utsibobëd tantiananec tabadesa yec abenquiobi icquid ictsiabi.

⁴ Padnuen utsibobëd tantiananquidquio utsibon chieshënaqui chieshtoenquio yec bëdambuec tabadquid nec. Adecbidi utsi tantiaquin bëdambuen nabanec tabadquid nec. Adecbidi utsina isash chieshëmënec tabadesa nec. Adecbidi: Ubentsëqui cumapenen tantiaquin naquidquio nebi, quesa nec. Adecbidi: Ubiuidtsëqui bëdambocquid nebi, quesa nec.

⁵ Adecbidi utsi icsambuen tantiec icsambuec onquesa nec. Adecbidi: Umbiuidtsëqui tantiacpadombuen mibitedishun nabanta, quesa nec. Adecbidi badedquio nëishesa nec. Adecbidi: Ubi chieshënquid cuidte bunebi, quequin tantiabudesa nec.

⁶ Adecbidi utsibon mua uaquin chiac cuidte chuiquidën cuidacsho isash cuishonquesa nec. Bëdambuen chuibanec onquesho tantiash: Abimbo chuibanquid nec, quiash cuishonquequid nec.

⁷ Utsibobëd tantiananquid icsho natiamiaid iquequi nëishenquio yec mëmunec tabadquid nec. Adecbidi: Aid bëdambuec tabadantsiash, quequin tantiaquid nec. Adecbidi: Ma bëdambo yannu, quiash cainec tabadquid nec. Adecbidi chieshënaqui chieshtoenquio icquin mëmunec tabadquid nec.

⁸ Tantiananec tabadaid ënëdtiapimboctequid nendac. Uëshë utsimbi Nuquin Papan Mayanën namiaid icquin Nuquin Papan iuecshun natequid chuibanaid ënëdendac. Adecbidi abi onquiacmaid onquete utsin onquebuedobi aid onqueten onquenquio yec ënëdendac. Adecbidi matsesën dadpenquio tantiaidtedi ënëdendac.

⁹ Dadpenquio tantiaid nuqui abitedi tantienquio iquec. Adecbidi Nuquin Papan iuecshun natequid chiaid abitedi tantienquiocquido nuqui neuaic.

¹⁰ Padnuen isaisambocquid yec bëdamboshëcquid chonoc nuqui abitedi tantiabi icbued ënëdendac.

¹¹ Bacuë yec bacuëmpi onquiacpadec onquepadennebi. Adembidi bacuëmpin tantiabenabi yacpaden tantiapadennembi. Adembidi bacuëmpin: Nëid bëdambocquid nec. Nëid icsambocquid nec, quequin tantienquio yacbimbuen tantiapadennembi. Aden tantiaquid ictennedëmbi canishun bacuëmpin tantiaidtedi ënondambi.

¹² Nëbi isnanten bëisadquin isac isadentsëcquio yacbimbuen Nuquin Papa nuquitedi bëdiactsëc tantiatsec. Iuecshun Nuquin Papambo nuquitedi bëistuidendac. Aid tantiaquin isenquiocquimbi nëbi Ambi Chiaid tantiembi. Aden tantiabuedi uëshë utsimbi ambi ubi tantiamebocpadombuembidi Nuquin Papa bëistuidquin tantiendambi.

¹³ Nëidtedi ënëdtemaid iquec: Abimbo caic, quequin Nuquin Papa tantiaid ënëdtemaidquio nendac. Adecbidi Nuquin Papa yacnouësh abipadquid bëdambocquidquio iquendabi, quequin cainquin tantiaid ënëdtemaidquio nendac. Adecbidi utsibobëd tantiananaid ënëdtemaidquio neuaindac. Adec aidtedi ënëdtemaid icnubi utsibobëd tantiananec tabadtembuen natequidquio nendac.