Codinto 1 12 - El Nuevo Testamento en matsés

VII. ESUS TANTIAQUIDO NUQUIN PAPAN MAYANËN NAMETE CHIAID ( 12.1—14.40 )

¹ Tantia, cun utsibo, Nuquin Papan Mayan Bëdan utsi utsien namete tantiamequin mibitedi chuinu.

² Ënden Esus tantiesabo icquin matsesën ambibi nacnenshun papa caid onquetiapimbo icquidi tantiaquin nabanec mibitedi tabadpondac.

³ Adquid iccondaidi nëbi Esus tantiaquido mibitedi icsho chuinu. Nuquin Papan Mayanën tantiamiacmaido yec: Esus icsamboshëcquid nec, quendac. Padnuen Nuquin Papan Mayan Bëdan nadatiambocquin tantiamiaido yec: Esus Cun Icbombo nec, quendac.

Nuquin Papan Mayanën namete utsi utsien chiaid

⁴ Esus tantiec iccuededsho Nuquin Papan Mayanën utsi utsien namete dadpen icnubi namequid abentsëcquiobi Nuquin Papan Mayan iquec.

⁵ Nuquin Icbon tantiamiaid icquin utsibo tantiaquin nashunquid utsi utsiec iquec. Adec dadpen utsi utsiec icnubi abi nashunquidon Icbo abentsëcquiobi iquec.

⁶ Nuquin Papan Mayanën namiaid icquin nadatiambocquin nabanquin ismebante utsi utsiec iquec. Aden nabanquid dadpen icnubi abi nadatiambocquin nabanmequid Nuquin Papa abentsëcquiobi iquec.

⁷ Esus tantiaquido icsho: Ma utsibobëd tantiananec nashunnannu, quequin Nuquin Papan aton Mayan menendac.

⁸ Nuquin Papan Mayanën namiac bëdambuen tantiaquin chuibanquid utsi utsiec iquendac. Utsibobic Nuquin Papan Mayanën namiac ambi dadpenquio bëdambuen tantiaid chuibanquido iquendac.

⁹ Nuquin Papan Mayanën namiac Esus tantiaquido: Umbi chianniacpadombuen Nuquin Papan naic, quequin tantiaquidquio utsi utsiec iquendac. Utsibobic Nuquin Papan Mayanën namiac nënquido bëdanmequido iquendac.

¹⁰ Adembidi Nuquin Papan Mayanën namiac nadatiambocquin nabanquido utsi utsiec iquendac. Utsibobic Nuquin Papan iuecshun natequid chuimequin oncamiaido iquendac. Utsibobic: Nuquin Papan Mayanën namiaid nec, quequin tantiaquido yec: Mayan Icsa Satanasën iuan namiaid nec, quequin tantiaquid utsi utsiec iquendac. Utsibic abi onquiacmaid onquete utsin onquequido utsi utsiec iquendac. Utsibic abi onquiacmaid onquete utsin onquequin chuibansho tantienquiocsho issun aid onquete tantiaquidën: Ma utsibon tantiaquiono, queshun cuembo chuibanquid utsi utsiec iquendac.

¹¹ Aden Nuquin Papan Mayan abentsëcshumbi nadatiambocquin namiaido aidotedi nec. Ambi tantiacpadembi matses abentse abentsen namequid Nuquin Papan Mayan nendac.

Dada abentsëc yacpadquiec Esus tantiaquido tabadte chiaid

¹² Matsesën dadan icquid uidënuaid dadpen icnubi dada abentsëcquiobi iquec. Adquiobidi Esus tantiaquido dadpen icnubi ambi tantiaid abentsëcquiobi Esuquidistu iquec.

¹³ Adecbidi isadaidbo yec matses utsibo yec utsin iuaido yec matsesën iuacmaido yec quec Esus tantiaquido iquec. Adquido icsho acten mentoaido yec abentsëc yacbimbuec nuquitedi tabadnubi Nuquin Papan Aton Mayan abentsëcquiobi nuqui meniaid nuquibëd tabadec.

¹⁴ Matsesën dada abentsëqui icnubi aid dadan icquid dadpen iquec.

¹⁵ Taë onquec: Mëdantepenquio nebi. Adquid yec matsesën dadan icquidpenquio nebi, quequid ¿aidën dadan icquidpenquioda nedic?

¹⁶ Adecbidi pabiate onquec: Ëshëpenquio nebi. Adquid yec matsesën dadan icquidpenquio nebi, quequid ¿aidën dadan icquidpenquioda nedic?

¹⁷ Matsesën dadan ëshëuidpambo icnuc matses onquesho tantienquio ictsiash. Adecbidi, matsesën dadan pabiateuidpambo icnuc shëdtiapimbo ictsiash.

¹⁸ Nuquin Papan ambi tantiacpadombuen matsesën dadan icquid tabëcquin uidënuaid iquec.

¹⁹ Dëccuëscaid abentsëqui icnuc dada ictiapimbo ictsiash.

²⁰ Uidënuaquin dëccuëscaid dadpen icnubi matsesën dada abentsëcquiobi iquec.

²¹ Ëshën mëdante chuiquin: Mibi bunenquio iquebi, catiapimpo iquec. Adembidi mapin taë chuiquin: Mibi bunenquio iquebi, catiapimpo iquec.

²² Adotiapimbo icquin uidënuaquin dëccuëscaid matsesën dadan icquid uidëmpentsëcquio icquid icshobi cudasquin dayunuatequidquio nec.

²³ Uidënuaid ëquëducquid ismenquio icquin ompoaidquio utsi iquec. Adembidi dëccuëscaid utsi cudasquin ismetemaid icsho ompoec dasiuidec.

²⁴ Dadan icquid uidënuaquin dëccuëscaid isaidquio ompodesa nec. Nuquin Papan ambi tantiacpadombuen matsesën dadan icmequin dëccuëscaid istemaid icsho ompoquin dayun uaid nec.

²⁵ Dadan icquid dëccuëscaid icsambo icmianeque tësnu, quetiapimbo dada iquec. Adenquio yec dadan icquidtedi nashunnanquid nec.

²⁶ Dadan icquid abentsëc paëmbo icnuc utsitedi adecbidi paëmbo iquec. Dadan icquid abentsëc bëdambo icnuc abitedi bëdambo iquec cuishonquec.

²⁷ Mibitedi Esus tantiaquin utsi utsien nabanquido yec Esuquidistun dadabimbuecquido nec.

²⁸ Esus tantiaquido icsho Nuquin Papan namiaido nadquidtedi iquendac. Esuquidistun: Ubi chuibenneta, caido. Utsibic Nuquin Papan oncamiaido. Utsibic Nuquin Papan Chiaid tantiamequido. Utsibic nadatiambocquin nabanquin ismequido. Utsibic daicsaidobëta nënquido bëdanmequido. Utsibic utsibo nashumbanquido. Utsibic iccuededquido namequido. Utsibic: Abi onquiacmaid onquete utsin onquequin chuibanquido, quec adquidtedi iquendac.

²⁹ ¿Esus tantiaquid abitedida: Esuquidistun: Ubi chuibenneta, caido icpadic? ¿Abitedida Nuquin Papan oncamiaido icpadic? ¿Abitedida abëd iccuededquido ismebanquin chuiquin tantiamequido icpadic? ¿Abitedida nadatiambocquin nabanquin ismequido icpadic?

³⁰ ¿Abitedida daicsaidobëta nënquido bëdanmequido icpadic? Padenquio. ¿Abitedida abi onquiacmaid onquete utsin onquequido icpadic? Padenquio. ¿Abitedida abi onquiacmaid onquete utsin onquequin chuibansho tantienquiocsho issun aid onquete tantiaquidën: Ma utsibon tantiaquiono, queshun chuibanquido icpadic? Padenquio.

³¹ Aden Nuquin Papan Mayanën nametequid bëdamboshëcquid icnuc mibitedishun adquid icte bunquioquin Nuquin Papa chiannequin tantiaquiota. Umbi chuibuedotedi tantiaquin bëdambuec tabadtequidquio tantiamequin chuibannu.