Cadasia 6 - El Nuevo Testamento en matsés

Tantiananec bëdambuec isnante chiaid

¹ Cun utsibo, Nuquin Papan Mayanën tantiamiaid icquin mibëtan Esus tantiaquidën icsambuen nasho issun: Esus tantiaquid adesambo neque. Bëdambuequien tabadtiad, quequin bëdambuen chuita. Mibibi datantiadec: Esus bëdambuen tantienquio yec adecbidi icsatsiabi, quequin tantiaquin: Bëdambuec tabadnuna, quequin chuita.

² Adec mibëd iccuededquid natiec tabadsho issun bëdambuen nashumbanta. Aden naquin Esuquidistun chiacpadombuen mimbi naindac.

³ Utsien: Chuiquidquio nebi. Ubiuidtsëqui bëdambocquid nebi, quec adquidpenquio yequi abibi mua uadquid nendac.

⁴ Adenquio yec mibibi datantiadta. Adashic: Nuquin Papan chiacpadec tabadquid nebi, quiash adecbidi bëdambo icta. Utsibo icsambo icnubi ubiuidtsëqui bëdambocquid nebi, quenda.

⁵ Ambi chiacpadombuen bëdambuen naic tabadquid icsho Nuquin Papan bëdambuen isendac.

⁶ Esus tantiaquido icsho: Nadec tabadquid, quequin chuibanaido icquin Nuquin Papan Chiaid abi chuibanquid nashunquid nendac.

^7-8 Nuquin Papa tantiaquid nebi, quequin ambembi muaquin chienda. Adec mibitedi muainda. Piacbobimbuec matses iquec. Tantienquio icquidën icbompin uestsaidi siac canienquio yec uënësec. Padnuen tantiaquidën ëshë bëdaidquio siac bëdambuec canitsiash. Tantienquio icquidbimbuec matses icsambo icquid iquec. Ambi icsambuen naid icbompin uestsaidbimbuec iquec. Icsauidequi tabadec uënësash Nuquin Papa yacno nidtiapimbo iquendac. Padnuen Esus tantiaquid Nuquin Papan Mayanën tantiamiacpadombuen naic tabadec uënësacsho Nuquin Papan ënenquiocquin abëdi tabadmendac.

⁹ Umbi aden chuisho tantiashun chieshtoenquiocquin bëdambuen naic tabadta. Adec tabadsho issun ambi tantiacpadën Nuquin Papan nuqui bëdambo icmequin menendac.

¹⁰ Adotequid icnuc bëdambuec tabadquin Esus tantiaquidobëta utsibo bëdambuen isquin nashunnuna. Adecbidi Esus tantiaquido yec tantiananquiec nashunnanquionona.

V. ËNQUIN CHUIBANAID ( 6.11-18 ) Pabadon ënquimbi chiaid

¹¹ Umbi chuibued aidtedi dada utsi dada uameshumbic umbimbo ënquimbi mibitedishun iste nua nuaic icnuc cun mëdanten dada uaimbi.

¹² Muaquin chuiquido: Mibitedi Moisesën chiampicpadombuen namenu, quequin shui dëbid dëtemete bunquido nec. Mabi cun matses isadaidbon: Bëdambo iquec, canu, queshun mibitedi adometiadquio iquec. Esuquidistu cueste napotiaidën dectanaid chuibansho chieshënquin cuidnushe, quequin tantiaquido aido neque. Muaquin chuisho tantienda.

¹³ Aden shui dëbid dëtemequidombi Moisesën chiampidtedi natiapimbo iquec. Adquid yec aido: Umbi chiacpadombuen nëidon naosh, quenuembien mibitedi shui dëbid dëtemetiadquio icchitec. Aden mimbi nabanquin ismiac umbi chiacpadombuen tantiaquin nabanquido nec, quiash: Ubiuidtsëqui bëdambocquid nebi, quenuec neque. Aidën chiacpadombuen nainda.

¹⁴ Ubien tantiesabimbuec: Ubiuidtsëqui bëdambocquid nebi, quetiapimbo iquec. Adenquio yec Nuquin Icbo Esuquidistu cueste napotiaidën dectanaidquio tantiec: Bëdambocquid nebi, caimbi. Adec Esuquidistu tantiec ubi bunaid ënash icsate bunenquio iquebi. Adsho issun utsibon umbi Esus tantiaquin nasho tantienquio iquec. Adec Esuquidistu cueste napotiaidën diadec uënëspanëdash, quequin tantiec Esus tantiesabon nacpadombuen nainquiocquin umbi icsambuen naid ënash icsate bunenquio iquebi.

¹⁵ Shui dëbid dëtemiaidobëta shui dëbid dëtemiacmaido Nuquin Papan bëdambuen istiapimbo iquec. Abi tantiasho Esusën chuca uaidien Nuquin Papan bëdambuen isendac.

¹⁶ Umbi aden chuisho tantiash: Abimbo mimbi caic, quiash bëdambuec tabadsho Nuquin Papan: Cun matsesquio nec, caindac. Aido Nuquin Papan bëdambuen isquin cuidenquio iquendac. Isadaidbobëta isadaidpembo adotsiash.

¹⁷ Nëbi ubi chieshënquin cuesquido nibëdquio icpashun, caimbi. Aidon umbi Esusën chiacpadombuen nasho natiamequin cacuesanniondashi. Cacuesondaid abi cun dadan bish dadpen iquec.

¹⁸ Cun utsibo, ma Nuquin Icbo Esuquidistun mibitedi bëdambuen isquin bëdambo icmepanuna. Amen. Aidtedi chuiquin dada uaombi.