Cadasia 3 - El Nuevo Testamento en matsés

III. ESUS TANTIASHO NUQUIN PAPAN CUIDENQUIO ICTE CHIAID ( 3.1—5.12 ) Nuquin Papan Esus tantiaquido aton Mayan tabadmiaid

¹ Nidaid cuëshë Cadasia yacnocquido bëdambuen tantiondaidëmbi pacuënnëdacbimbuen ¿Tsuntsin: Esus tantienda, cac tantienquio yano? Cueste napotiaidën dectanac abided cuidadec uënësaid Esusënuidtsëqui Nuquin Papa nuqui bëdambuen ismec, quequin mambi chuibanondac.

² Mimbi tantiaid ubi chui. Tantianu: ¿Atotsi quiash Nuquin Papan Mayan Bëda mibëdi tabadanondash? ¿Nuquin Papan: Naden nata, quequin ambi Moises chuiquin dada uamiampidtedi mimbi nabansho isashta mibëd tabadanondash? ¿Umbi chuibanac: Abimbo caic, queshoda mibëd aton Mayan tabadanmiondash? Ai, umbi chuibanac Esusquio tantiabensho issun Nuquin Papan aton Mayan meniac mibëd tabadanondash.

³ Aden meniac Nuquin Papan Mayanën mibitedi bëdambuec tabadquid icmec. Adoaqui ¿pacuënnëdacbimbuen tantienquioda ique? ¿Matsesën chiaiduidi tantiaquin naicta mibitedi bëdambuec tabadpatsia? Padenquio.

⁴ ¿Aden Nuquin Papan aton Mayan meniac iuec bëdambuec tabadbuedida abenquiobi tabadano?

⁵ Nuquin Papan aton Mayan meniaid icquin nadatiambocquin naquin mibitedi ismiondash. ¿Atotsi queshun Nuquin Papan aden namiondash? ¿Moisesën chiampicpadombuenuidi nashoda Nuquin Papan aton Mayan mibitedi meniondash? Padenquio. Umbi chuibanac: Abimbo caic, queshun Esusquio tantiabensho issumbien Nuquin Papan aton Mayan mibitedi meniondash.

Nuquin Papa tantiaquidquio Abadauan chiaid

⁶ Nuquin Papa ambi chiacpadombuen naquidquio nec, quequin abi tantiaquidquio icsho Nuquin Papan Abadauan isaisabimbuecnuc bëdambuen ispampic.

⁷ Adquid icnuc Nuquin Papa tantiaquidotedi Abadauanën tsiuecquido nec, quequin mibitedishun tantiata.

⁸ Isadaidpembotsen Nuquin Papa tantiaquido yanendac, quequin naden ëndenquimbo Nuquin Papan Abadauan chuipampic: Nidaid utsi utsiec yacno tabadquidontsen min tsiuecquid abentsëc tantiasho icsaisabimbuecnuc bëdambuen isendambi, quequin chiampid cun tsusedpan dada uapampic.

⁹ Abi tantiaquidquio icsho ambi Abadauan bëdambuen isampicpadombuembidi nëbi ambi Chomiaid tantiaquido icsho Nuquin Papan bëdambuen isquin bëdambo icmendac.

¹⁰ Utsiboen: Moisesën chiampicpadombuenuidi nasho Nuquin Papan bëdambuen istsiashi, quequidëmbi abitedimbo nainquio icsho Nuquin Papan cuidtequido nendac. Naden Nuquin Papan Chiampid iquec: Umbi: Naden nata, quequin Moises chuiquin dada uamiampidtedi nainquio icsho cuidendambi, quepampic Nuquin Papa.

¹¹ Ambi: Naden nata, quequin Moises chuiquin dada uamiampid nainquio icsho Nuquin Papan bëdambuen istiapimbo iquec. Aden istiapimbo icquin Nuquin Papan naden chuiquin dada uamiampid iquec: Ambi chiacpadombuen naquidquio Nuquin Papa nec, quequin tantiaquioquid Nuquin Papan icsaisabimbuecnuc bëdambuen isquin abëd tabadtequid icmendac, quequin dada uamepampic.

¹² Moises chuiquin dada uamiampiduidi tantiaquid icquin Nuquin Papa tantienquio iquec. Naden chuiquin Nuquin Papan dada uamiampid iquec: Moisesën chiampiduidi tantiaquin naquid aidën chiacpadec tabadendac, quequin chuipampic.

¹³ Abitedishun Moisesën chiampiduidi natiapimbo yec icsambuec tabadsho isash abided cuidadec uënësquin Esuquidistun nuquitedi icsambuen naid bedshunquin bëdambo icmepondash. Naden chuiquin Nuquin Papan dada uamiampid iquec: Cueste napotiaidën dectanmiaid Nuquin Papan cuidaidquio nec, quequin dada uamepampic.

¹⁴ Adec matses abitedimbo abi tantiaquido icmenuec uënëspanëdash. Aden ambi Abadauan chiampicpadombuen napampic. Nëbi Esuquidistu tantiasho isadaidpembo ambi chiampicpadombuen bëdambo icmequin aton Mayan menec.

Nuquin Papan Moises chiampidën ëndenquimboshë Ambi Abadauamba chiampid utsi uatiapimbo iquec, quiaid

¹⁵ Tantia. Chuinu, cun utsibo. Cun matsesbëtan min matsesën nadoquid: Naden naindambi, quequin dada uashun: Abimbo chiaidquio nec, ma isquidon canu, queshun abi cuëmëdquidtsen dada uaquid. Aden dada uaid utsin tsidada uaquin aid dadauaid utsi uatiapimbo ictequid nec.

¹⁶ Nuquin Papan: Nadombuen naindambi, quequin Abadauan chuishumbic: Mibi nibëdanan iuecquimbo ictanneshun min tsiuecquid abentsëcshun matses bëdambo icmendac, quepampic. Min tsiuecquido, quenquio yec: Min tsiuecquid abentsëc, quequin Esuquidistu chiec nepampic.

¹⁷ Aid chuinu. Tantia. Ëndenquimboshë Nuquin Papan Abadauan chuiquin: Min tsiuecquidën matses bëdambo icmendac, quequin Esuquidistu caquin abimbo chuipampic. Adshumbic iuecquio icshun seta dadpenquio 430ted matanmeshun utsitsen chuiquin Nuquin Papan Moises dada uamepampic. Aden Moisesën dada uampid icsho utsi uatiapimbo iquec. Adembidi: Iuecshun min tsiuecquid bëdambo icmequid icmendambi, quequin Nuquin Papan Abadauamba chiampid utsi uatiapimbo iquec.

¹⁸ Nuquin Papan ambi: Naden nata, quequin Moises dada uamiampiduidi nasho issun matses bëdambuen isendambi, quequin tantiaquin Abadauan muaquin chuitsempampic. Iuecshun min tsiuecquidën matses bëdambo icmendac, quepampic. Aden ambi ëndenquimboshë chiampicpadombuen: Ubi piucquid mene, quenquio icquin matsesën Esus tantiasho Nuquin Papan matses bëdambuen isec.

¹⁹ ¿Atotsi camenuen Nuquin Papan ambi: Naden nata, quequin Moises dada uamepampic? Umbi chiaid isash: Nuquin Papan Chiaid niacniaquec icsambuequien nuqui tabadchitec, quequin ma matsesën tantianu, queshun Moises dada uamepampic. Nuquin Papan Abadauan chiampid Esuquidistu choabi icnuc isadaidbo: Nuquin Papan Chiaid nanu, quebuedi icsambuec tabadpampic. Adsho issun Nuquin Papabëd icquidon Moises chuiuampampic. Adoac Moisesën aton matses Nuquin Papan Chiaid chuibampampic.

²⁰ Aden chuinuen Nuquin Papanquio: Abadauan chuitan, quequin utsi nidmenquio icquin Nuquin Papanquiobi Abadauan bëisquin chuipampic. Adquid yec Nuquin Papa abentsëcquiobi iquec.

¿Atotsi canuen Nuquin Papan ambi: Naden nata, quequin chuiquin Moises dada uamepampic?

²¹ ¿Min tsiuecquid tantiaquido bëdambuen isendambi, quequin Abadauan chiampid niacquinda Nuquin Papan Moises chuipampic? Padenquio. Ambi: Naden nata, quequin chiampidën ënëdenquio yec tabadtequid icnuc Nuquin Papan chiacpadombuen naic tabadenquio ictsempampic.

²² Adquid icnuc Nuquin Papan chuiquin dada uamiampid niac niacquido yec mëtaniacbimbuec matses abitedimbo icsambuec tabadquido nec. Adquid icbuedëmbi ambi Abadauan chiampicpadombuen naquin Esuquidistu uidtsëqui tantiasho Nuquin Papan bëdambuen isendac.

²³ Esus choabi icnuc nadquio matses icpanëdash. Moisesën chiacpadombuenuidi naic abembi bëdambo ictiapimbo icpanëdash. Mëtaneshun quënën tsadunac natiapimbo yacbimbuen aidën chiacpadec bëdambuec tabadtiapimbo icquin Esuquidistun bëdambo icmete caimpanëdash.

²⁴ Aden Moisesën chuiquin dada uampid niacniaquec icsambuec tabadsho Nuquin Papan ubi bëdambuen istiapimbo iquec, nuqui camenuen Ambi Chiaid Moises dada uamepampic. Adshumbic Esuquidistu choacsho aid tantiaquido Nuquin Papan bëdambuen isec, quequin nuqui tantiec.

²⁵ Aden tantiaquin nëbi Moisesën isadaidbo chiampidtedi nasho Nuquin Papan matses bëdambuen istsiash, quenquio nuqui iquec. Esusuidtsëqui tantiasho Nuquin Papan nuqui bëdambuen isquin bëdambo icmec, quequin nuqui tantiec.

²⁶ Aden Esuquidistu tantiaquido yec mibitedi Nuquin Papan bacuëbo nec.

²⁷ Adquido icsho acten mentoaido yec Esuquidistubëd daëdash abentsëc yacbimbuecquido nuqui nec. Adecbidi Esuquidistupadquid nuqui nec.

²⁸ Isadaidbo yec isadaidpembo yec matses iuaido yec matses iuapenquio yec dada yec chido yec quequin Esus tantiaquid icsho bëdambuen isec. Nëbi mibëtan Esuquidistu tantiaquid utsibobëd abentsëc yacbimbuecquido nec.

²⁹ Adembidi Esus tantiasho ambi Abadauan bëdambuen isampicpadombuen Esuquidistu tantiasho Nuquin Papan nuqui bëdambuen isquin bëdambo icmec ambi Abadauan chiampicpadombuen. Adec Abadauanën tsiuecquido nuqui nec.