Cadasia 2 - El Nuevo Testamento en matsés

Esusën: Ubi chuibenneta, caidon: Pabado bëdambo iquec, caid

¹ Seta 14ted matanmetanec padpidec Edusaden yacnobidi Bednabebëd nidquin Titotsen buanondambi.

² Adec Nuquin Papan tantiamiacpadec ambo nidshun Esus tantiaquido iccuededacno puduedshun umbi isadaidpembo Esusën naid Chiaid Bëda chuibennebued chuibanondambi. Adshumbic aidon chuiquid tapabo caidouidtsëqui umbi nabambuedtedimbo chuibanondambi. Aden chiambo icnuc utsibon: Pabadon icsambuen chieque. Tantienda, cac tantiashun Esus tantienquio yannushe, queshun chuibanondambi.

³ Ubëd icquid Tito isadaidpembo quidieco matses icshobi shui dëbid dëtemeta, cainquio icpondash chuiquid tapabon.

⁴ Esus tantiaquid danmianquiec muaquido ubitedi tabadacno ompodash puduedpaccondash. Esuquidistu tantiasho Nuquin Papan nuquitedi bëdambuen isec, quequin cun tsusedpan chiaid niacsho tantianu, quiash umbi chuibanacno puduedpaccondash. Adec puduedshun tantiashic: Mimbi icsambuen chiec. Nuquin tsusedpa Moisesën chiampidtedi nasho Nuquin Papan bëdambuen istsiash, quenuen tantiec tabadpaccondash.

⁵ Aden tantiash aido: Nuquin tsusedpan chiampicpadombuenuidien nametiad, quesho: Padi. Mimbi icsambuen chiec, quequin aidën chiacpadombuen nainquio iccondambi. Ma umbi chiaido mibitedishun: Esusën naid Chiaid Bëda abimbo iquec, quequin ënenquio icquin tantianu, queshun nainquio iccondambi.

⁶ Adquid icnuc Esus tantiaquidon chuiquid tapa caidon Esus tantiaquidën natequid utsi chienquio iccondashi. Aid chuiquid tapabo icsho dacuëdënenquio iccondambi. ¿Chuiquid tapa nec, queshunda Nuquin Papan aido bëdambuen ispec?

⁷ Esus tantiaquidon chuiquid tapabon naden chiondashi: Nuquin Papan chiacpadombuen mimbi isadaidpembo Esusën naid Chiaid Bëda chuibenniaccoc. Adembidi Nuquin Papan chiacpadombuembidi Petedon nuquin matses isadaidbo Esusën naid chuibenniosh.

⁸ Adembidi Nuquin Papan namiac Esusën: Ubi chuibenneta, caid icquin Petedon cun matses isadaidbo dadpen Esus tantiamiaccosh. Adembidi Nuquin Papan namiac Esusën: Ubi chuibenneta, caid icquin umbitsen isadaidpembo dadpen Esus tantiamequin chuibenniombi.

⁹ Aid chuiquid tapabo Santiaco yec Petedo yec Uan yec quec icpondash. Aido: Isadaidpembo Esusën naid mimbi chuibennenubi adembidi isadaidbombo chuibennendambi, quepondash. Adshumbic: Ubipadquid yec mibitsen Esus chuibennequid nec, queshun chuiquid tapabon ubëd icquid Bednabebëta mëdimpondashi.

¹⁰ Nadentsen chuipondashi: Atona nibëdquido tantiaquin nashunnuna, capondashi. Adsho tantiash adquid tantiaquin nashunquidquio yec: Ai, adonona, quepondabi.

Pabadon Petedo chushcaid

¹¹ Adashic iuectanniash ubi tabadaid shubu dadpen icquid Antioquia yacno Petedo chopondash. Ashunquio icsambuen nashobimbi bëisquioquin chushcapondac.

¹² Ambo choshon matses utsibon codocaid pec aidobëd bëdambuec tabadpondash. Adnubien Santiacon: Ambo istan, cac cun matses Moisesën chiampid tantiaquido chochopondash. Aido chochosho isash: Moisesën chiampid niacquin isadaidpembon codocaid pesho chushcanushe, quec dacuëdquin pete meniaid isuidampondash Petedon. Adec abëtan Esus tantiaquido isadaidpembobëd cuëshëdquin icsambuen napondash.

¹³ Adsho isash ambocquid isadaidbo Esus tantiaquidontsen isadaidpembobëtan pec tabadenquio yec cuëshëdpondash. Adsho isash ubëd icquid Bednabetsen adecbidi cuëshëdpondash.

¹⁴ Aden icsambuen naquin Esusën chiacpadombuen nainquio icshobimbi Esus tantiaquidtedishun tantianuc Petedo naden chuipondac: Isadaidbo icquimbi mimbi nuquin matsesën chiaid niacquin isadaidpembon codocaid pec aidbëdi mibi bëdambuec tabadoc. Adec tabadbuedi nëbi aidbëd mibi cuëshëdoc. Adsho isash mimbi nianaido: Petedon matses isadaidbo tabadacbimbuec tabadshoen Nuquin Papan nuqui bëdambuen istsiash, quequin icsambuen chuitsiash, queshun Petedo chushcapondambi.

Esuquidistu tantiasho Nuquin Papan bëdambuen iste chiaid

¹⁵ Nuquitedi isadaidbon tishaid yec isadaidbo icnubi Moisesën chiampid chiacmaido yec isadaidpembo icsambuen naquido nec.

¹⁶ Adquid icnuc Nuquin Papan: Naden nata, quequin chuiquin Moises dada uamiampid tantiaquin nabansho Nuquin Papan icsaisabimbuecnuc nuqui bëdambuen isec, quetiapimbo nuquitedi iquec. Esuquidistu tantiashouidtsëqui Nuquin Papan nuqui bëdambuen isec, queshun nuqui Esuquidistu tantiabenondac. Adshun ambi: Naden nata, quequin chiampiduidi nainquio icsho icsaisabimbuecnuc Nuquin Papan bëdambuen istiapimbo iquec, quequin nuqui tantiec.

¹⁷ Nëbi: Esuquidistu uidtsëqui tantiasho Nuquin Papan bëdambuen isec, quequin nuquitedi tantiec. Aden tantiaquid icsho cun matses isadaidbon: Nuquin Papan Chiaid mimbi niacquin icsambuen naic, ubi capec. ¿Ada Esuquidistun aden Nuquin Papan Chiaid ubi icsambuen namepec? Padenquio.

¹⁸ Nuquin Papan: Naden nata, quequin chuiquin Moises dada uamiampicpaden nasho Nuquin Papan bëdambuen isec, quequinuidi chiondaidi Esus tantiabenshun aden chuitiapimbo yanondabi. Adbuedëmbi padpiden cun tsusedpabon chiaiduidi naquin Nuquin Papa bëdambuen ismembi, queshun abi bëdambuen ismequidquio Esus tantienquio yanquimbimbi icsambuen nachitoc, quequin tantiondambi.

¹⁹ Adshun Nuquin Papan: Naden nata, quequin chuiquin Moises dada uamiampidtedi nanu, quebuedi umbimbo natiapimbo icquin Aidën Chiampidtedi Esusbëd uënësacbimbuen ënondambi. Adshun Nuquin Papa tantiec Esuquidistun chiacpadec tabadebi.

²⁰ Esusbëd uënësacbimbuen umbi icsambuen nabanaid ënondambi. Nëbi Esusbëd cuëshëdenquio yec bëdambuec tabadebi. Ubi tantiaquiec ubi cuidmenquio icnuec Nuquin Papan Mado abided cuidadec Esuquidistu uënëspanëdash, quequin tantiashoeni Aidëmbi nëbi bëdambuec tabadquid icmec.

²¹ Nuquin Papan: Matses bëdambuen isendambi, quequin Chiaid niactiapimbo iquebi. Moisesën dada uaquin chiampid tantiaquin aidën chiacpadombuenuidi naic Nuquin Papabëd tabadtequid icnuc Esuquidistu abembi uënëstsempanëdash.