Salmos 86 - Sharanahua: Diospan Tsain

Min fustifin Diosiquin

¹ Uhuun Ifo Diosin, uncai ahuama, un mia fasi yopacoin. Ascan ua nicafain ua cumapun.

² Un mia fusti Ifo huai. Ascan ua cushuhuu. Minfin uhuun Diosinquin. Un mia fusti icoinra huai. Ascan ua numapun.

³ Shafatishon un mia cufiain cuscan uhuun ramapaihuun.

⁴ Uhuun Ifon, uhuun nomuranshon un mia cufin. Ua unimamahuun.

⁵ Un mia chacahua cuscan mian rauhua. Min fasi shara. Tsoan mia cufiain min fasi atohuun noiquin.

⁶ Uhuun Ifo, un mia cufian cuscan ua nicapun. Uhuun ramapaihuu.

⁷ Ahuara chaca finonquin un mia cufin min ua numanon. Un mia cufiaintian min ua cumashquin.

⁸ Futsafoan aafin dioscoinma rami huaafo. Nanfocai mia cuscarama. Min ahuamamishti atiro cuscan nanfoancai atiroma.

^9-10 Tsoa futsacai mia cuscarama. Min ahuamamishti huatiro. Minfin yorafo ashotiro cuscan fasi sharacoin. Mirus fustifin Min Diosiquin. Min nantifi yora manifoti ato oni huani. Ascan nanfo miqui futirofo mia cufinshcaquin. Mihuunoa nantifi yoisharashcaquin.

¹¹ Uhuun Ifon, min ua amapaiyai cuscan ua tapimahuu. Min ua tapimapaiyai cuscan ua tapimahuu. Minfin icon yoimisi fustiquin. Nanfin un tanaicai. Ua cayacafi shinanmahuu un ointi rafuya inonma. Mia fustifin un tanasharaiquin.

¹² Uhuun nomuran un mia fusti shinainno un unimatiro mihuunoa yoi sharashquin. Un nantifi yorafo mihuunoa yoisharapacunaca afoanrifi mihuunoa shinansharanonfo.

¹³ Min ua fasi noicoin. Ascan mirus fusti min ua numa. Ascan yora chacafo faquish muran foaifo cuscan un canonma.

¹⁴ Uhuun Diosin, nan cacapaimisifoan ua chaca huapai uqui fuafo. Nan yorafocai tsoashtahuun ramapaimisima. Natianfin ua rutupaicaniquin. Nanfoancai mihuunoa shinanmisifoma.

¹⁵ Ascafia mincai ato cuscarama. Minfin yorafohuun ramapaicoinquin. Min ato shara huamisi. Mincai funa sinamisima. Nantishotapiquin nocohuun noicoin. Min yoiain cuscan huamisi. Mincai noco potamisima.

¹⁶ Uhuun Ifon, natian ua shinanhuun. Uhuun ramapaipun. Unfin min oinmatiquin. Min curushu ua inanhuun.

¹⁷ Ua ismahuu min ua shara huashoi cuscan. Min ua shara huai cuscan uhuun nomuran min ua shinanmasharaino nan ua noicasmaifoan oincaquin tapitirofo un min facu icaino ua chaca huafain miarifi chaca huacani. Rafipaitirofo.