Salmos 73 - Sharanahua: Diospan Tsain

Upa Diosin noco shara huamisi

¹ Uhuun caifo Israelifoan aton nomuranshon tsoan shinanchacayamaiton Upa Diosin ato shara huamisi.

² Asca un fasi amaquiri shinan un funo cuana. Nan mahua cuya ariashu pacui cafisca un aaquin.

³ Asca mun oian nan curafiapaimisifoan fasi chaca huamisifofiashu pui ichapayafo. Ahuacai tsoa yopaima. Nanscara ato oin urifi un ato cuscara ipaipaoni.

⁴ Ascashon un oian nanfoancai ahua chaca finonmisifoma. Tsoacai isinin iyomisima mutsisipacoinfo.

⁵ Futsafo omitsiscai cuscacai nanfoan mumisima.

⁶ Yoran tuhuuti sahuua nantifishon ointirofo. Nanscarifi ai yorafoan nantifiton ointirofo nanfo fasi cacapaimisifo. Tsoanshtahuuncai ramapaitirofoma. Futsafo omitsiscamafiaquicai atohuunoa tsoan shinanfoma.

⁷ Asca aton nomuran mutoafo chaca huapaiyai cuscan tsoa unumisima. Nanfofin curafiapaimisifoquin. Chaca fustisi shinanfafaicani.

⁸ Asca nanfoan futsafohuunoa chaca yoimisifo. —Mincai ahua tapiama. Tsainyamahuu. Un mia yoiai cuscan min ua nicayamaiton un mia asca huatiroran, —ishon nan cacapaimisifoan tsain curushcoin yoimisifo.

⁹ Dioshuunoari tsain chaca yoimisifo. Manifoti foanfafaincani, —Nonfin nantifi finoncoianquin, —ishon yoimisifo.

¹⁰ Ascaifoan futsafoan ato icoinra huashon ato nicapaicani. —Na yorafoan fasi tapicoianran, —ishon atohuunoa shinanfo nan cacapaimisifohuunoa nanscara yoiafo.

¹¹ —Non amisi cuscacai Diosin tapiama. Noco oinmaran, —ishon nan cacapaimisifoan yoiafo.

¹² Nan chaca huamisifofin nanscarafoquin. Nanfoancai ahua chaca finoncanima. Fasi ahuara ichapa fifiacashon ahuara chaca uqui nocomisi. Unfin funamaritifin omitsiscaicain.

¹³ Ascan unracafin ipaitsicoin shinansharamisiquin. Unfin cayacafin Diosi tanasharamisiquin.

¹⁴ Shafatishon ahuara chaca uqui nocomisi. Unfin funamaritifin omitsiscaicain.

¹⁵ Upa Diosin, un amaquiri shinain cuscan un min yorafo shinanmanaino un atori amaquiri shinanma cuana.

¹⁶ Ascan un fasi shinanquin isca hua, —¿Ahuuscaimun na yora chacafo omitsiscatama tsoa ahua yopaimaquin? —ishon un nannori un shinan. Ascashon un fasi tapipaicoin.

¹⁷ Upa Diosin, nannori un shinain mi fu tsainti pushu muran un iquia mia cufishquin. Ascan nannoshon un mia cufiaiton min ua tapimana nan yora chacafomain ahuun unutani ahuu cuscara iishquicain.

¹⁸ Asca min yonoa cuscan nanfo machi tunanmanri micha mayocoin tusirimu caini pacui cafiscai. Nanscarifaiyai nan yora chacafo naashu omitsispacunacafo muran pacuafo tsoancai afanan ato funitiroma.

¹⁹ Ascacun fasi ratucoincani samamashta omitsiscapanacafo muran pacuashu afanancai anoashu tsoa raqui fopanacafoma.

²⁰ Natian man isharai cuscacai man chai ipanacama. Non namaino yamariscatatiro. Non moishon non oiancai non nama cuscara afanan non ointiroma. Nanscarifi ai nan chacafo isharamisifiashu yamariscatatiro. Ascan nan Upa Diosin omitsiscamisifo ano min ato potaino afanan tsoa nipanacama. Tsoashtacai afanan ato oinnacama.

²¹ Urificai un tapiyopaonima un fasi amaquiri shinanchacapaoni. Nan yora chacafo niyoashu isharamisi cuscahuunoa un shinain uhuun nomuran ihuucoin mufain uhuun nomuran mocacoin mutsa un muuni.

²² Ascan nan chaca huamisifohuunoa ahuun unutaqui un shinantaima urifi fasi amaquiri chaca shinanni. Ascano nocon Ifo Diosin min uhuunoa shinanraca un yoina ahuara tapiama cuscaran ishon min uhuunoa shinan.

²³ Un anori shinanfiaifin unfin min yoraquin. Mincai ua potamisima. Minfin ua mutsoaquin un pacunonma,

²⁴ Minfin uhuun nomuran mian tapimanaquin un ishquiai cuscan. Chipo min icano ua iyoshquin un mi fu ipanon.

²⁵ Min nai muran icano urifi un miqui nocopai mi fu ipashquin. Uncai tsoa futsa yopaima. Un mia fuchipaiyai cusca uncai ahua futsa nuno mai anoshon un fuchipaima.

²⁶ Asca un isininqui uhuun nomuran un mua uncai chai nitiroma. Ascafia Upa Diosin minfin uhuun ointi muran ua mutsismashotiroquin. Ascashu natian min u fu ipanaca.

²⁷ Ascashon mia tsoan potashufin omitsiscapashquin. Mia nicacasmaifoan min ato onaintimai omitsiscapanonfo.

²⁸ Asca uncai ato cuscarama. Unfin Diosi fu rafupacunacaquin. Nanscarafin fasi sharaquin. Upa Diosifin nantifi iquinanquin. Un aqui caiton ua cushusharai. Unfin nantifi yorafo yoiquin isca huaiquin, —Nocon Ifo Diosifin ahuara sharafo huafafainiquin, —ishon un ato yoishquin.