Salmos 63 - Sharanahua: Diospan Tsain

Ifo Diosin nocon ointi muran noco unimamatiro

¹ Upa Diosin minfin uhuun Diosiquin. Un mi fu rafupaicoin. Tsoa nomicoin unu yopatiro. Nanscarifi ai unfin nan nomiyai cuscaraquin uhuun nomuran un mia yopacoin. Un mua uhuun nomuran un mutocoin. Atsanacoin cafiscai mia funai.

² Un mia ichananti pushu murannoa oin cafisca huamisi. Min ahuamamishti huatiro mun oian. Nannoshori mun mia oinmisi min fasi sharacoin.

³ Min ua noiyamainocai un nipaima. Un nisharapaifiai min ua noicoinquin nan sharafinacaia. Ascan mun tapian min nocohuun noi. Ascan un minhuunoa yoiquin shara huai.

⁴ Un niyoshon nantishotapiquin un futsafo minhuunoa yoiquin shara huai. Uhuun poyan rafu un mushan huainifoanshquin mia cufinquin.

⁵ Yoran tushu sharacapa pii mayacointan unimatiro. Nanscarifi ai un min tsain uhuun nomuran nanuashu un fasi unimatiro. Ascan un minhuunoa shinansharai fanainquin.

⁶ Uhuun oshati camaquishon un mihuunoa shinanshifafainni.

⁷ Min ua shara huamisi. Ascan min ua cushuaino un minhuunoashu fanainmisi.

⁸ Un mi fu rafumisi. Min poyan mumihuurinoaton ua cushui un pacunonma.

⁹ Futsafoan ua rutupaifiacani nanfofin chii uru muran focaniquin nanno ipashquin.

¹⁰ Futsafoan ashin ato rutuano cotocotofoan aton nami picani.

¹¹ Ascafia unfin maton niaifoquin un Diosihuunoashu unimashquin. Tsoan Diosi icoinran huai yoitiro isca huaquin, —Nocon Ifo Diosin fasi sharacoinran, —ishon yoishquin. Ascan nan chanimisifo ato tsain shatumashquin afanan ahua yoinonfoma. Ascashu afanan pusinonfoma.