Salmos 57 - Sharanahua: Diospan Tsain

—Uhuun Ifo Diosin, ua ashopun, —ishon David cufini

¹ Uhuun Diosin un miqui oa min ua cushunon. Ascacun uhuun ramapaihuu, ua shinanpun. Natian ahuarafoan ua omitsisca huamapai. Nan tacara facumishti ahuan putaon muran onutiro ato cushuquin. Nanscarifiai un miqui oa min ua cushusharanon.

² Min nantifi finoncoian. Ascan un mia cunai mian nicanon. Mian amapaiyai cuscan min ua huamatiro.

³ Min nai muran ishon ua numamisi. Ua noicasmacaquin mufaintan ua chaca huashcani. Ascafia min ua noiquicai uhuunoa min ointiaquimamisima. Min ua numamisi.

⁴ Nan yora chaca masharo cuscarafoan ua chaca huapaicani. Masharonun ato shutafo cunocoinshon yora piquin cuyotiro. Nanscarifi ai nan chacafoan ua tarati huayacuna ua omitsisca huamashcaquin. Uqui tsain chaca huacaquin uhuunoa yoiaifono uhuun nomuran ua isinmapaicani.

⁵ Min nantifi nai murannoa finoncoian. Nanfoan mihuunoa yoiquin isca huapainonfo, —Min fustifin min nocon Ifosharacoinquin, —ishon yoipainonfo. Nantifi mai anoafoanri min ahuamamishti atiro oinquin nantififain mihuunoa yoicaquin isca huapainonfo, —Nocon Ifo Diosin fustifin fasi sharaquin. Nanton ahuamamishti huatiroran, —ishon yoisharapacupainonfo.

⁶ Ua noicasmacaquin ua trampa muran pacupai cafisca huacani. Ascaquin ua fasi uhuun nomuran omitsiscamacani. Fai nushmancayan poquimua muran un pacua shinantsa anon. Ascafiacai un a muran pacuamarocon nanfocaifin nan shoi muran pacui shinantsa aafoquin.

^7-8 Uhuun Diosin, uhuun nomuran un mia icoinra huacoinna. Ascan un unimacoinni mihuunoa fanainshoni. Un funanmarishta manutifo mihuunshon manui. Nansca huai un moitiro.

⁹ Uhuun Ifon, un futsafo muranshon mihuunoa yoisharai. Un yorafo murannoashu mihuunoa un fanainquinsharai.

¹⁰ Futsafoan noco noitirofia mincaifin nocohuun noiquin finacaiaquin. Min noco yoimisi cuscan min noco ashomisicoin. Mincai noco ointiaquimamisima.

¹¹ Min nantifi nai murannoa finoncoian. Nanfoan mihuunoa yoiquin isca huapainonfo, —Min fustifin min nocon Ifo sharacoinquin, —ishon yoipainonfo. Nantifi mai anoafoanri min ahuamamishti atiro oinquin nantififain mihuunoa yoicaquin isca huapainonfo, —Nocon Ifo Diosin fustifin fasi sharaquin. Nanton ahuamamishti huatiroran, —ishon yoisharapacupainonfo.