Salmos 51 - Sharanahua: Diospan Tsain

Uhuun Ifo Diosin, uhuun ramapaihuu

¹ Uhuun Diosin, minfin noco noipacunacaquin. Min nocohuun noiquin unupacunacama. Ascacun uhuun ramapaihuu. Min fasi nocohuun ramapai. Ascan un mia chaca huamisi cuscan ua soashohuun.

² Un fasi chaca huacoina cuscan nantifi ua chocafain ua turuahuu.

³ Un chaca hua cuscan mun tapian. Nanfohuunoa un shinanfafaini uhuun nomuran un omitsiscai.

⁴ Un mia fusti chaca huaiton min oiancai min ua yonoa cuscan un huama. Ascaiton min uhuunoa yoia cuscan nantifishon tapishquicani icocoincun. Icon un mia chaca huamisi.

⁵ Un facushtashu cain taunitian un chaca inacahuana. Icon uhuun uhuan ua nanuano un chaca tauni.

⁶ Uhuun Ifon, non icon fusti yoifain cayacafi fusti non shinainton oinquifin nanscarafin min fasi fuchipaicoinquin. Un icon yoifain icon shinainton min uhuun nomuran ua ahuara cayacafi tapimatiro.

⁷ Uhuun chaca ua soashohuun un afanan mia cuscaran sharacoin inon. Ua nashimai cafisca huahuu uhuun nomuran un afanan choshta itama un yoa furoamua ointsa oshopa cuscara shara inon.

⁸ Uhuun Ifon, min uhuun chaca soashonano un afanan unimacointiro. Uhuun chacahuunshon uhuun nomuran min ua omitsiscamamisi. Natian afanan ua unimamahuu.

⁹ Un chaca hua cuscan afanan nan chacahuunoa shinanyamahuu. Un mia chaca hua cuscan nantifi ua soashohuun.

¹⁰ Upa Diosin, uhuun nomuran ua afanan funa shara huashohuun un afanan ahuashta chaca shinanonma. Uhuun nomuran afanan ua funa cuscaran imahuu mian yoiai cuscan un ariscanon.

¹¹ Mimaquishon ua potayamafain min Yoshin Shara umaquinoa nichiyamapun.

¹² Nan un mia icoinra huaquin tau huainifoannaitian un fasi unimacoinni. Ua afanan nansca huaquin unimamahuu. Uhuun nomuran ua shinanmahuu min ua yoiai cuscan un anon.

¹³ Min ua asca huainofin min tsain nicacasmafo un yoisharatiroquin mia tanasharanonfo. Ascashon aton chaca shatufain miqui nasononfo.

¹⁴ Uhuun Diosin, un futsa rutumana cuscan ua rau huahuu. Minfin uhuun numamisiquin. Min uhuun chaca ua soashonano unimacain un futsafo fanainshonon min shara fustisi ahua chaca mi fu itiromaran, ishon un ato tapimanon.

¹⁵ Uhuun Ifon, ua shinanmasharahuu un mihuunoa yoisharanon.

¹⁶ Non mia tanaquin shara huatama non mia ina rutushonaitocain min fuchipaima. Min ascara fuchipaiyaiton un mia asho cuana.

¹⁷ Shinanquicain afanan non mia asca huapaima. A non chaca huamisifohuunoa shinain nocon nomuran non isincointiro. Ascacun nocon chaca non shatupaicoin miqui nasoshquin. Upa Diosin, non ascaitofin min fasi fuchipaicoinquin.

¹⁸ Ascan min fuchipaiyai cuscan Sión pushu rasi anoafo ato cushusharahuu isharanonfo. Nan Sión ahuun anu futsafin Jerusalén. Ahuun cunu cuyacoin pushu huanrasi tarati huayacunafoanno curushu shara huahuu afanan noco noicasmaifo iquinonfoma.

¹⁹ Min noco yonoa cuscan huaquin nocon chaca non shatuano min nocoqui unimashquin. Ascashon non mia ina mumacoin rutushofain coashon toquirifo putsamuinia anoshori afanan moi funu un mia rutushonaino min nocoqui unimashquin.