Salmos 46 - Sharanahua: Diospan Tsain

Nocon Ifo no fu ica

¹ Diosin no fu ishon noco cushushara. Ahuun curushu noco inain. Ahuara chaca non finoainnofin nan noco fu imisiquin noco ashoshquin.

^2-3 Ascacu noncai shinanchacatama ratuima. Ahuara chaca ifiaino mai curushcain nayanaiyaicaino machifo tsucuinifoantan unuhuan muran pacu yamarai unuhuanri fuchomanhuain fasi achacoin icaino machifori nayanaiyaifiainocai non ratuima Diosimain noco fu icun. Nanfohuunoa shinancahuun.

⁴ Ascan unu yamainocai non nitiroma. Ascan nan ununfin non isharatiroquin. Nanscarifiai Jerusalén pushu rasi ano Diosin icano ahuun yorafori nannoashu unimacointirofo. Diosinhuunoashu isharatirofo. Nantofin nantifi finoncoianquin.

⁵ Diosin Jerusalén icanoshocai tsoan ato ahuusca huatiroma. Ahuara chaca finononma shafaino Diosin ato cushui.

⁶ Asca mani futsafo mucaifoanno mani futsafori cuyoshquicani. Diosin curushcain ato yoiaino maifoti anoafo tsoacai pusiquima.

⁷ Diosin ahuamamishti huafain ahuun curushhuunshon nantifi finoncoian. Nanfin noco fu icaquin. Jacob ahuun Diosin nocon cushumisi. Nanfohuunoa shinancahuun.

⁸ Diosin acai cuscan oinyopon. Nantofin mai chacana huatiroquin afanan ahuarafo ano inonfoma.

⁹ Maifoti rutunainfoan Diosin ato unumatiro afanan rutunanonfoma. Nantofin aton piacatifo tucufain ashifori ato tucumishtipacushquiquin. Taramutifori cooi futsushquin afanan ahuun rutunanonfoma.

¹⁰ Ascano nocon Ifo Diosin yoiquin isca huai, —¡Puusiyamacahuun! Unfin Diosiquin ua tapicahuun. Nantifi manifotiton uhuunoa yoishquicani unmain Diosicoincunfin. Unfin nantifi finoncoianquin, —ishon Diosin yoini.

¹¹ Ascacun afanan shinancahuun. Diosin ahuamamishti huafain ahuun curushhuunshon nantifi finoncoian. Nanfin noco fu icaquin. Jacob ahuun Diosin nocon cushumisi.