Salmos 42 - Sharanahua: Diospan Tsain

Mun tapia nocon Ifo Diosin fustiton ua ashotiro

¹ Chasho nomicoin ashashaitiro shushanqui nocoriscapai ayashquin. Nanscarifi ai uhuun Upa Diosin un fasi mia yopai mi fu ipashquin.

² Uhuun nomuran un mia fasi shinain. Un fasi nomicoin nan unu yopai cuscari un fasi mia yopacoin min ua ashoai cuscan min ua shinanmasharanon. ¿Uhuun Upa Diosin ahuutian un miqui catiromun mi fu iishquin?

³ Shafatisho yafi yamutishon un uaimisi. Ascan ua noicasmacaquin ua cashu mutsama huacaquin yoiafo isca huaquin, —¿Min Diosi ranimun? —ishon ua yoimisifo.

⁴ Non iyopaoni cuscan afohuunoa un shinain uhuun nomuran un fasi isincoin. Ipaonifo yora ichapa Diosi pushu ano un ato iyopaoni. Caashu nantifi non unimai. Oi ashcafinin non fanainpaoni. —¡Aicho, uhuun Ifo Diosin! Min noco shara huamisiran, —icashu non unimayanan non fanainni.

^5-6 ¿Ascan uhuun Ifon ahuuscaimun natian un unimatama uhuun nomuran un fasi omitsiscai un puusicamaquin? Natianfin un uhuun Diosihuunoa shinaincain afanan ua unimamanon. Nanfin uhuun Numamisi icain uhuun Diosiquin. Ascan natian un afanan ahuunoa yoisharai. Natian uhuun nomuran un unimaima. Ascafia Diosin ua sharahuashomisi cuscan un afanan afohuunoa shinain unimashquin. Nan unu Jordán rufoquiri machi Hermón non machi futsa Misar ano un cahuacacainai cuscan Upa Diosin ua iyosharafoanfafainmisi.

⁷ Unuhuan fuchomanhuan furannaino noco tsoa ihuiyamaino non asantiro. Nanscarifi ai un natian omitsiscaiton mian numataima. Min ua ahuara chacafo fuma cuscan nicaquicai un afanan tunutiroma. Nan afohuunoashu un asain cafiscai.

⁸ Ascafia shafatifi min ua noicoinquin ua ismafafaini. Yamutifiri min ua unimamai un fanainon. Nantianri un mia cufin min ua nimasharamisicun.

⁹ Uhuun Diosin, minfin toquirininhuan cuscaran mutsisipacoinquin tsoancai mia shucatiroma. Ascan un mia yocain isca huaquin, —¿Ahuuscai mian ointiaquimamun? Ua noicasmamisifoan ua omitsiscamaifoanno uhuun nomuran un fasi shinancoian. ¿Ahuuscaquin mian numamamun un afanan omitsiscanonma?

¹⁰ Ua noicasmacaquin ua cashu mutsama huaifoanno un mua nan uhuun ointi chachia mutsa un mua. Shafatisho ua yocafo isca huaquin, “¿Min Diosi ranimun?” —ishon ua cashu mutsama huamisifo.

¹¹ ¿Ahuuscaimun natian un unimaimaquin uhuun nomuran un fasi omitsiscai puusiquima? Natian un Dioshuunoa shinain ua afanan unimamanon. Nanfin uhuun Numamisi icain uhuun Diosiquin. Ascan un afanan ahuunoa yoisharai. Natiancai uhuun nomuran un unimaima. Ascafia Diosin ua shara huashomisi cuscan un shinain afanan ahuunoashu unimashquin.