Salmos 34 - Sharanahua: Diospan Tsain

Non nocon Ifo Diosihuunoa yoisharafafainon

¹ Uhuun nomuranshon un Ifo Dioshuunoa shinansharafafainquin un futsafori ahuunoa yoisharafafaini.

² Un nocon Ifo fustihuunoa yoisharafafainmisi cuscan un futsafori ahuunoa yoisharai. Ascan man ratora futsan maton nomuran unimayamaquin nocon Ifoan noco shara huashomisi cuscan shinancahuun afanan unimashcaquin.

³ Non ichananon nocon Ifohuunoa yoisharashquin. Non yoiquin isca huanon, —Nocon Ifon Diosin fustitofin ahuamamishti huatiroquin. Nan fustitocai ahuashta chaca huamisima. Tsoa futsacai a cuscarama. Nan fusti fasi sharafinacoian, —ishon non yoinon.

⁴ Ascacun uhuun Ifo un cufian cuscan ua nicashara. Ua nicaquin uhuun ratufo ua potashoshquin. Ascainocai afanan ahuara chacafoqui un ratuima. Uhuun Ifon ua numa un afanan afoqui ratunonma.

⁵ Ascan tsoan Ifo Diosi cufinfafainnaifin nanfin ashosharaiquin. Nanfin unimamaino ahuun fuso fupishtacoin iiquiquin. Afanan rafipaitiroma ahuun fuso fupishtacoin fusti iquin.

⁶ Un fasi omitsiscaquin uhuun Ifo yopacoinquin un cufian. Un cufiain cuscan ua nicaquin uhuun nomuran ua fucash huamisi cuscan uhuun Ifoan ua numa un afanan omitsiscanonma. Ahuara chacafo uhuun nomurannoa nantifi uhuun Diosin ua numa.

⁷ Asca tsoan Ifohuunoa yoisharafafainmisifin naanquifin Ifo Diosin ahuun oinmati nai muran a fu icano aqui nichishquiquin nan cushusharanon.

⁸ Nocon Ifo Diosin fasi sharacoinquin tapicahuun. Tsoan nocon Ifo icoinra huacun nan cushusharafain fasi unimamashquin.

⁹ Man Diospan yorafoquin ahuunoa yoisharafafaincahuun chaca huashquinma. Man ascaitofin man yopai cuscan nantifi mato inainquin afanancai man ahua yopashquima.

¹⁰ Asca yora ahuara ichapaya chipo afanan ahuara ichapa aya itiroma. Ascashu chipo nanfo fonaintirofo. Asca tsoan Ifo Diosi icoinra huaashufin ahuara sharafocai afanan tsoa yopapacunacama.

¹¹ Uhuun facufoan uqui fucahuun un mato tapimanon ahuuscashumain man Ifoqui musutiroquin chaca huashquima.

^12-13 Chai nipapaiquin shara fustisi huafafaincahuun. Ahuara chaca huayamafain futsafo chani yoiyamacahuun. A yoia cuscan acoinpaicaquin.

¹⁴ Ahuara chaca potacahuun. Ascatan futsafo sharahuacahuun. Futsafo fu isharapaicain fochishmanantananyamacahuun.

¹⁵ Tsoan nocon Ifoan yonoa cuscan huamisifo ato cushusharamisi nan cufiainfo cuscan ato ashoshquin.

¹⁶ Ascan nan chaca huamisifo nocon Ifoan ato oincasmai. Ascashon ato cuyoshquin. Rato mai anoshocai tsoanshta atohuunoa afanan shinanshquinma.

¹⁷ Ahuun yorafoan cufiainfo cuscan Ifo Diosin nicaquin ato ashoi. Nanfoan ahuara chaca finoainfoan nantifi atohuunoa Ifo Diosin ato numai.

¹⁸ Futsan ahuara chaca finoain cuscan ahuun nomuran mui fasi omitsiscai. Ascaino Ifo Diosin ahuun ramapaicoin a fu rafui. Nanscara yorafin Ifon Diosin ato numashquiquin afanan tsoa omitsiscanonma

¹⁹ Nan ratora futsan Ifo Diosi yonoa cuscan huamisifofia nantori ahuara chaca ichapa finontiro. Ascafia Ifo Diosifin nantifi chaca finoan cuscan numaiquin.

²⁰ Asca nocon Ifoan nan cushusharainocai ahuun shao fusticai tucuima.

²¹ Ascan nan chaca huamisifo atoqui ahuara chacacoin nocotiro omitsiscanonfo. Tsoan Diospan yorafo noicasmaiton nocon Ifoan ato onaintimaquin finacoin.

²² Ascan tsoa nocon Ifoan ahuun oinmatishon nan yoia cuscan aiton nanfin nocon Ifo Diosin numafain ahuun chaca soashoshquiquin a fu nipanon. Ascatari tsoan Ifo icoinra huacoinnaiton Ifo Diosin ahuunoacai ahuara chaca yoipacunacama.