Salmos 32 - Sharanahua: Diospan Tsain

David ahuun chaca yoiaiton Diosin rau hua

¹ Tsoan ahuun chaca yoiaiton nocon Ifo Diosin samamashta rau huatiro. Nocon Ifo Diosin rau huanocai afanan ahuun chacahuunoa shinainma. Ascashu fasi unimacointiro.

² Tsoan nocon Ifon chaca huashon ahuun chaca yoiaiton soashotiro. Ascan Diosicain afanan ahuun chacahuunoa shinanpacunacama. Nan ahuara chaca fomantamarocon ahuun nomuran icon fustisi shinain. Nanscara yorafin Diosin unimamaiquin.

³ Ascan un chaca huai cuscan yoiamai un puusimisima uhuun chaca fomain nan shaca fuai mutsai un muupaoni. Uhuun nomuran un omitsiscamisi icain shafatisho un pashapaipaoni.

⁴ Ascatari shafatifi non yamutifiri min ua onaintimamisi un chaca hua cuscan un afanan fomantama yoisharanon. Ascan non fari muran yonoaiton noco farin fasi tsacaino non atsanacointiro. Nanscarifi ai un ahuara chaca fomaino un fasi shaca fuai cafiscai.

⁵ Upa Diosin ipaitama un chaca hua cuscan mun mia yoia. Uncai afanan mia fomainma. Mun yoia isca huaquin, —Natian un chaca hua cuscan uhuun Ifo un yoiquin, —ishon un yoiaiton min uhuun chaca ua soashona. Minfin ua rau huaquin afanancai uhuun chacahuunoa min shinainma. Urifi uncai afanan uhuun chacahuunoa shinainma. Uhuuncai afanan chaca nuama.

⁶ Unu faitanhuan nocoriscaino yorafo machi cuya ano foriscatirofo unu atoqui nocononma. Ascashu tsoanshtacai asatiroma. Nanscarifi ai Ifo Diosin tanamisifoan chaca huashu miqui focashon mia yoiaifoan oinquin min ato chaca soashotiro. Ascan nan mia chaca huamisifo min ato onaintimaitiancai nan mia tanamisiforicai min ato onaintimaima.

⁷ Uhuun Ifon, un miqui catiro ua mian cushusharanon ua noicasmaifoan ua fuchinonfoma. Ahuara chaca ua finonfiaiton min ua cushushara ua tsoan ahuusca huanonma. Ahuara ahuuscarafiaino min ua cushua. Ascacun min yorafo fu non fanaincacainni man minmain ua numacufin.

⁸ Uhuun Ifo Diosin min ua yoia isca huaquin, —Min ahuara huai cuscan un mia tapimai min icoinsharanon. Un min nomuran yoi rato fainmain min caicain ahuara chaca huashquima. Unfin mia cushuaquin.

⁹ Caballo yafi burro cuscara iyamahuun. Nanfoancai ahua cayacafi shinansharatiroma. Non ato raquiran iyopaiqui non ahuun cuno anushumuti fichiqui yafi rusfi tuchishon non ninifoquin cayacafi shara non iyotiro. Non asca huayamainocai non ato iyopaiyaiquiri catiroma. Nanscacun burrofo cuscaran iyamahuun, —ishon nocon Ifo Diosin ua yoia.

¹⁰ Ascan tsoan Ifo Diosi chaca huamisishaquin fasi omitsiscashquiquin. Asca tsoan nocon Ifo icoinra huatan a fu icacainaifin atohuun noiquin unupacunacamaquin.

¹¹ Asca nocon Ifo Diosin yoia cuscan man huamisifo aqui unimacahuun. Asca maton nomuran shinanchacatamarocon nocon Ifo Diosin yonoa cuscan huamisifoan aqui unimai fanainshofafaincahuun.