Salmos 27 - Sharanahua: Diospan Tsain

Uhuun Ifoan ua chashapacufoanna shara nanfin uhuun Numamisicoinquin

¹ Uhuun Ifo Diosifin uhuun faro cuscaraquin. Uhuun chaca ua soashona un a fu nipanon. Uhuun Ifoanfin ua cushusharaquin un futsafoqui ratutiroma. Uhuun Ifoanfin ua numapacunacaquin. Uncai tsoaquin musutiroma.

² Nan yora chacafo ua noicasmamisifoan uqui fucashon ua rutupaishquin. Ua noicasmacaquin ua pacumapaicani. Ascafia nan ua chaca muran pacumapaiyaifofin nanfocaifin chaca muran pacucaniquin.

³ Ascan ranushumuafori uqui fucashon ua tarati huayacunafo ua rutupaicani. Un muacai uhuun nomuran un musuima. Un icanoshon ranushumuafoan ua rutupaifiaifoannocai uhuun nomuran un muacai un musuima uhuun Ifoan ua cushusharano. Uhuun nomurancai un ratuima.

⁴ Un niyoashu uhuun Ifoan pushu muran un ipai a oinpacushquin. Nanfin fasi sharacoinquin. Un shafatifi uhuun Ifo oinpai ahuun pushu muranshon oinquin ahuunoa shinanfafainshquin. Nan fusti un uhuun Ifo yocain ua ashonon.

⁵ Un nanno a fu icano un chaca finonfiaiton uhuun Ifoan ua cushushara un ahuuscanonma. Nanno ua onushquin. Nanton ua toquirininhuan camaqui ua nichishquin ahua chaca uqui nocononma.

⁶ Un icanoshon ua noicasmamisifoan ua tarati huayacufiashucai uquicai tsoa nocotiroma. Un cuya fomancayashon un ato ointiro. Ascan Ifon Diosin pushu murannoa un inafo rutushquin un uhuun Ifo ismashquin. Un unimaquin oi ashcafinin aichoran un huashquin. Ascatari un Ifo fanainshocain aqui unimaquin un manushoshquin.

⁷ Uhuun Ifon, un mia cunaiton ua nicapun. Uhuun ramapaipun un mia cufiain cuscan ua cumapun.

⁸ Ifon, uhuun nomuranshon min ua tsain yoiai cuscan un nicain, —Uqui ohuu un mi fu tsainon, —ishon mian yoiaiton un mia cuma isca huaquin, —Ifon, un miqui cai mi fu tsainshquin, —ishon un mia cumai.

⁹ Ascan uqui onuyamahuu, Ifon. Unfin min oinmatiquin. Uqui sinaquin ua potayamahuu. Minfin mirus fusti ua ashosharamisiquin. Uhuun Diosin, minfin uhuun Numamisi fustiquin. —Un mi fu afanan ipaimaran, —ishon ua yoiyamahuu. Ua potayamapun.

¹⁰ Uhuun upa futan uhuun uhua ua potacun uhuun Ifoan ua ihuishquin un a fu inon.

¹¹ Uhuun Ifon min amisi cuscan ua tapimahuu. Ua noicasmaifoan ua pacupaiquin ua manacaniquin. Min fain cayacafi ua iyohuu. Un min fain shara ano caiton ua tsoan ahuusca huanonma.

¹² Uhuun Ifon, ua cushuhuu ua noicasmaifoan ua tsoan achinonfoma. Nanfoan uhuunoa chani yoiafo isca huaquin, —Nanton chaca huaran, —ishon yoifiafocai uncai ahua chaca huama. Uhuunoa fasi tsain curush yoiafo ua chaca huashcaquin.

¹³ Ua asca huafiafo mun tapian un niyoshon uhuun Ifoan ua asho sharai cuscan un oinshquin.

¹⁴ Ascacun nocon Ifo funacaquima manasharacahuun. Ahuun curushhuunoashu maton nomuran ratuyamacahuun. Nocon Ifo funaquima mana sharacahuun.