Salmos 19 - Sharanahua: Diospan Tsain

Diosin oni huani cuscan oinquin non tapitiro naanfin fasi shara ahuamamishti huatiro

¹ Non nai aria oinquin non tapitiro fishifo non fari non oshuri noco tapimai Diosin fasi shara ahuamamishti huatiro. Nan oinquin non tapitiro nantofin nantifi onihua sharaniquin.

² Shafatifi yafi yamutifiri nan nai murannoafoan noco Dioshuunoa tapimai.

^3-6 Nan nai ariafo fari non oshu non fishifo tsaintiroyamafia atohuunoashu nantifi manifoti Dioshuunoa tapitirofo. Nan fari Diosin nai muran oni huani nanno ipanon. Fari oaino fasi punai chashacoin sharaquin. Shafatifi fari oaino cahuancui iquicaitiro. Fari cahuancai funamari afananri cahuancui. Shafatishon fari cahuancui. Fari nantishon cahuanscai maitio coshi finontiro. Atsanatiroma. Nan farihuunshon maifoti ahuun shana mutirofo. Rato maicai onutiroma ahuun shana munonma.

⁷ Nocon Ifo Diosin ahuun tsain nan noco yononi cuscan fasi shara. Noco yononi cuscan fustishtacai chacama. Ahuun tsainhuunshon non tapisharatiro noco nantifi cushusharafain oinmasharafain noco unimamaiton. Ahuun tsainmansi noco nimapacutiro.

⁸ Nocon Ifo Diosin tsain cayacaficoin. Non tanaiton nocon nomuran unimamasharatiro. Nocon Ifoan noco yononi cuscan shafacaficoin. Noco tapimanaino non isharatiro funopacushquima.

⁹ Non shinain isca huaquin, —Uhuun Ifo Diosin ua yononi cuscan ayamaifin un funo cuana. Ascan uhuun Ifo noiquin un tanasharairan, —ishon nannori shinainfin man isharapacutiroquin chaca huashquima. Nocon Ifo Diosin noco yononi cuscan shara fustisi. Nantifi cayacaficoin.

¹⁰ Oro fasi chicoin non fuchipaitiro. Ascafia nocon Ifoan yononi cuscan fasi shara finacaia. Nan oro fusti osiyama fasi chicoin. Ascafia Diosin tsainmanfin fasi oro finoncoianquin. Nanscarifi ai fona non mutiro fasi fata shara. Ascafia Diospan tsaincaifin fasi fata finoncaiaquin.

¹¹ Tsoan Diosin yononi cuscan nicaquin tapitiro ahuara chaca huai fasi musu itiro. Ascan Diosin yononi cuscan nicasharaino noco fasi shara huatiro non funopacunonma.

¹² Nocon nomuran non ahuara chaca shinaintocai tsoashtan tapitiroma. Futsafoancai un ahuara chaca hua cuscan tapiama. Ascafia uhuun Ifo Diosin minfin uhuunoa tapiaquin. Ascacun un chaca hua cuscan ua rau huapun.

¹³ Ifo Diosin, un ahuara chaca huapaiyai cuscan ua amatima huahuu un anonma. Ua cushuhuu nan chacafo un ifo huanonma. Nan fasi chacafo un ifo huayamaino un shara fusti itiro.

¹⁴ Uhuun Ifo minfin toquirininhuan cuscaraquin. Tsoancai mia shucatiroma. Ascan un mi fu rafuainocai tsoashtacai ua shucatiroma un mi fu rafunonma. Min ua numa un Upa Dios fu ipanon. Un yoia cuscan huafain uhuun nomuran un shinain cuscan min uqui unimapainon.