Salmos 16 - Sharanahua: Diospan Tsain

Nocon Ifo Diosi fu non rafupacuaino shara ipanaca

¹ Nocon Ifo Diosin, ua cushusharahuu. Un miqui oaqui ua mian cushusharanon un ahuara chaca finononma.

² Unfin uhuun Ifo yoia isca huaquin, —Minfin uhuun Ifoquin. Min ua shinansharamayamainocai ahuara shara un shinantiromaran, —ishon un nocon Ifo Diosi yoini.

³ Nan mia icoinra huafoti nan mai anoafo un fasi ato fuchipaicoin. Un ato cuscaran ipai. Un atoqui unimai.

⁴ Tsoa dioscoinma fu ipaiyai nanfin fasi omitsiscai finashquiquin. Nanfoan aton dioscoinma nan rami huafo yoina rutushonafo cuscan uncai ato futan ashquima. Nan dioscoinfomahuunoacai un yoisharashquima. Uncai ato anufo yoipacunacama.

⁵ Ifon, un ashquiai cuscan min ua catonshona. Mian shara huashoa. Nantifi uhuuna min ua cushushomisi.

⁶ Min ua amamisi cuscan fasi sharacoin. Min ua inain cuscan mian fasi unimamashquin.

⁷ Uhuun Ifo Diosin ua tapimasharamisi. Nanscacun un mihuunoa yoi sharashquin. Yamuri uhuun nomuran min ua cayacafi tapimashquin.

⁸ Mun tapian uhuun Ifo ufu ipanaca. Ufuri rafupacunaca. Uacai potapacunacama. Ua cushushara. Ascacucai tsoan ua ahuusca huatiroma ua ratupaiquin.

^9-10 Ascacufin uhuun nomuran un fasi unimacoin. Uhuun Ifoan ua cushuaino un fasi unimai. Uhuun Ifon, mincai namisifo muran min uhuun yoshin potaima. Nan yora sharacai min ahuun caya mai murannoa payocomaima. Ascan uhuun cayari min ua cushusharashomisi.

¹¹ Ahuuscashumain un mi fu nipasharatiroquin minfin mian tapimanaquin. Un miqui nocoaitian mian unimamacoinshquin. Mian oinmamisi un niyocun ahuuscashumain un mi fu ipasharatiroquin. Un mi fu rafuaino min uqui fasi unimashquin. Minhuunnoashu un fasi unimai mi fu isharapacunaca.