Salmos 145 - Sharanahua: Diospan Tsain

Nantififain nocon Ifo Dioshuunoa yoisharapainonfo

¹ Uhuun Diosin min uhuun niaifocoin. Minfin uhuun Ifoquin un mihuunoa yoiquin shara huapacunaca.

² Shafatifi un mihuunoa yoisharashquin. Un nantifin yoipacunaca isca huaquin, —Minfin, nocon Ifoquin. Tsoa futsacai mia cuscarama. Minfin fasi sharacoinquin.

³ Minfin nantifi finoncoianquin. Ascan nantifi yorafoan mihuunoa yoisharatiro. Min nantifi finoain cuscan tsoa futsancai tapicointiroma.

⁴ Nantifi yorafoan aton funafo mihuunoa yoisharashquicani. Yoitirofo min acai cuscan fasi shara. Yoicaquiri min ahuamamishti acai cuscan aton funafo yoishquicani tapinonfo.

⁵ Ratoran niaifo isharamisi. Ascan mincaifin nantifi finoncoianquin. Ahuara chacacai mi fu itiroma. Mincaifin fasi sharacoinquin. Min chashai cuscan tsoan futsacai ascara oinyomisima. Nannori aton funafo nantifi yoipacunacafo. Urifi uhuun nomuran min fasi shara huamisi cuscan un shinanshquin.

⁶ Asca nanfoan aton funafo yoishquicani isca huaquin, “Nocon Ifo Diosin ahuun curushhuunshon ahuamamishti noco ismamisiran,” ishon ato yoishquicani. Urifi nan min amisi cuscan nantifi yoishquin. “Nocon Ifo Diosin fasi sharacoin noco ashomisi cuscan tsoan ascara oinyomisima cuscaran,” ishon un ato yoishquin.

⁷ Min fasi sharacoin min noco ashofafainai cuscan nantifi yorafo yoinonancani. Minhuunoa shara fusti shinancani unimacani fanainfafaincani, —ishon non yoipacunon.

⁸ Nocon Ifo Diosin noco shara huashomisi. Nocohuun ramapaicain nocoquicai funa sinamisima. Fasi nocohuun noicoin.

⁹ Nocon Ifo Diosin nantifi yorafo ato shara huamisi. Nan fustitofin ato oni huaniquin. Atohuun ramapaiquin.

¹⁰ Nocon Ifo Diosin, min nantifi onihuani cuscan mihuunoa yoi sharashquicani. Min yorafoanri futsafo mihuunoa yoisharashquicani.

¹¹ Min nantifi iquina cuscan tsoan futsancai ascara oinyomisima fasi sharacoin yoifain min curushhuunoari yoishquicani.

¹² Ascan minhuunoa nannori yoiaifoan nantifiton tapitirofo min ahuamamishti huamisi cuscan min nantifi iquinan. Tsoa futsancai ascara oinyomisima fasi sharacoin.

¹³ Nocon Ifo Diosin minfin nantifi yorafo iquipacuquin unupacunacama. Nantishotapiquin min yorafo min aton Ifo iquicai min unupacunacama. Min noco yoiyomisi cuscan nanscara min huamisi. Nantifi min oni huafoti min atohuun noicoin.

¹⁴ Ratora futsan ahuun nomuran isin mui nan ahuara ihuu papiashu cacotio cuscan afanan tunuyamacai pacutiro. Nocon Ifo Diosifin nanscarafo afanan ato funimatiroquin afanan chaca shinannonfoma.

¹⁵ Nantifi yorafoan mihuunoa shinain nan yopaifo cuscan min ato inain. Tushu yopaifo cuscari min ato inain.

¹⁶ Nan niyoafoti fuchipaiyaifo cuscan min ato inanshquin unimanonfo.

¹⁷ Nocon Ifo Diosin nantifi acai cuscan cayacafi shara. Nantifi nan oni huani cuscan huaquin noicoin.

¹⁸ Tsoan Diosi iconcoin cufiaiton naanfin a fu ipanacaquin.

¹⁹ Ratora futsan nocon Ifohuunoa yoisharamisicun naanfin fuchipaiyai cuscan ato inainquin. Nanfofin ato nicafain ato numashquiquin.

²⁰ Ratora futsan nocon Ifo noicoianfin nantofin ato cushuiquin. Asca nan chaca huamisifo nocon Ifo Diosihuun noiyamafin ato namaquin cuyoshquiquin.

²¹ Ascan unfin nocon Ifohuunoa yoiquin shara huaiquin. Nantifi yora manifoti anoafo nocon Ifo Diosihuunoa nantishotapiquin yoisharapacupainonfo.