Salmos 139 - Sharanahua: Diospan Tsain

Diosin nantifi tapicoian

¹ Uhuun Ifo Diosin, man min ua onancoian. Uhuun nomuran un shinain cuscan man min tapian. Min uhuunoa nantifi tapicoian.

² Un tsaocain nicun man min tapian. Uhuun shinanpan un shinantaima man min tapian.

³ Un acataima man min uhuunoa tapian. Min ua tapimatiro ranishomain un tunuyotiroquin. Shafatisho yafi yamutishori un acai cuscan man min tapian.

⁴ Un ahuara yoiataima man min tapian ahuamain un yoicain.

⁵ Minfin ua rucu cashoicaicain. Ascatafin min ucachori caicain. Ascashofin mian manmaincain uhuunoa yoisharashquin.

⁶ Nan min ahuarafo huai cuscacai un tapitiroma. Ahuara sharafo min onain cuscacai uncai onantiroma.

⁷ Uncai raqui onutiroma min Yoshin Sharapan ua fuchinonma. Ascataricai uncai raqui ichotiroma min u fu inonma.

⁸ Un nai muran caino minrifi min nanno ica. Nan yora namisifo icano un caino mirifi min nannori ica.

^9-10 Nan fari oaiquirinoashu un chai cayamarai fari iquipacuaiquiri un icaino nannoshori min ua mutsoi ua iyoshquin. Min curushuhuunshonfin ua mian mutsoinifoannaquin un pacunonma.

^11-12 Un yoiquin isca hua, —Faquishiainocai shafa itiroma. Ascan un faquish muran onucuraca Diosin ua fuchitiromaran, —ishon un shinan. Ascafia min ua ointiro. Faquish yafi shafa nanscara rafu min ointiro. Yamu min chashai ointsa. Faquishiri mina shafa ointsa.

¹³ Uhuun uhuan ahuun shaqui murannoa min ua nantifi uhuun cayafoya min oni huani.

¹⁴ Ascacun un mia aicho huai mian oni huaquin shara huani. Tsoan futsacai min acai cuscan atiroma. Nanfin mun tapicoianquin.

¹⁵ Uhuun uhuan shaqui muran faquishfiano un yosiaiton min nantifi oinni.

¹⁶ Un caiantaima min ua onanni. Ascan inonpacoai cuscan shafatifi un acai cusca min libro muran min cunuyoni.

¹⁷ Upa Diosin, min uhuunoa shinain cuscan fasi shara. Min shinanpan min shinanquin shara huai. Uhuunoacai min shinanshara cuscan tsoashta nanfo tanan huatiroma.

¹⁸ Urificai un ato tanan huatiroma. Mainfin ahuun furomishticai tsoan tanan huatiroma. Nanscarifi ai uhuunoa min shinanpan min shinansharai cuscacai un tanan huatiroma. Un moiainori min u fu ica.

¹⁹ Upa Diosin min nan yora chacafo cuyoa shara icuana. ¡Yora chacafoan man futsafo rutumisiquin umaquinoashu fotacahuun!

²⁰ Uhuun Ifo Diosin, nan chacafoan miqui tsain chaca huafo. Nan mia chaca huamisifoan min anuhuunoa yoiquin tsain chaca huamisifo. Mihuunoa ipaitsi yoiafo.

²¹ Ratora futsan mia noicasmai urifi un ato noicasmatiro. Ratotoran mia chaca huamisi nanfori un ato oincasmatiro.

²² Mia noicasmaifoan un atohuunoa shinanchacamisi. Ascacun urifi un copiquiri ato noicasmamisi.

²³ Upa Diosin, uhuun nomuran ua onanhuun. Un shinanquin shara huayamaraquimain un shinanquin chaca huaiquin ua tapimahuun.

²⁴ Ascan un ahuara chaca huacun min oinquin ua tapimahuu un afanan ahua chaca huanonma. Nan min ua amapaiyai cuscan ua tapimahuu. Uhuun Ifo Diosin, nan min ua iyopaiyaiquiri ua iyohuu.