Salmos 130 - Sharanahua: Diospan Tsain

Non nocon Ifo Diosi icoinra huatiro

¹ Uhuun Ifo Diosin, uhuun nomuran un fasi omitsiscai. Uhuun nomuranshocai un shara muima. Ascacun uhuun Ifon un mia cufin.

² Uhuun Ifon, un mia cufiain cuscan ua nicapun. Ua nicain uhuun ramapaihuu.

³ Uhuun Ifon, non mia chaca hua cuscan min nantifi nocoqui cunuano non funo cuana. Mincai noco nica cuanama.

⁴ Ascafia mincai ascarama. Min noco rau huai non mia chaca hua cusca afanan min shinainma. Ascan non mihuunoa shinansharacoin. Tsoa futsa mia cuscarama. ¡Aicho, Ifon!

⁵ Ifon, un mia manai. Min ua amapaiyai cusca min ua tapimanon. Mun tapian min tsain cayacaficoin. Min noco yoimisi cusca un icoinra huatiro.

⁶ Pushu rasi cushumisifoan shafa manamisifo afanan shafanon. Unfin fasi finacaiaquin uhuun Ifo un manai ua shara huashonon.

⁷ Nocon Ifo Diosin nocohuun fasi noi. Noco noiai cusca unupacunacama. Ascan Diospan yora Israelifoan nocon Ifo icoinra huacahuun. Nonfin chaca huamisiquin. Ascafia nocon Ifoan noco numa afanan nocohuunoa chaca shinainma. Ascaino non Upa Diosi fu ipatiroquin.

⁸ Nan fustifin nocon Numamisiquin. Israelifo nan ahuun yorafo ato numa aqui chaca huamisi cuscan nantifi aton chaca soashona afanan ascara chacafo shinanonma.