Salmos 119 - Sharanahua: Diospan Tsain

Diosin yononi cuscahuunoa yoisharahuun

¹ Nan nocon Ifo Diosin ato yonoa cuscan huafain tsoan chaca huamisimafin fasi unimashquicaniquin.

² Ascan tsoan nan nocon Ifoan ahuun tsain yoia cuscan amisifin ahuun nomuran nocon Ifon onanpaifain a fu rafucain fasi unimashquiquin.

³ Nanscarafoancai ahua chaca huamisifoma. Ascacun Ifoan ato iyopayiaiquiri fotirofo.

⁴ Uhuun Ifon, min noco yononi cuscan non mia nicasharanon.

⁵ Un fasi min tsain tanasharapai. Uncai shinanquin futsa futsa huapaima. Mia fusti un tanasharapai.

⁶ Un ascara shinaincai un rafipaima. Min ua yonoa cuscan fusti un shinain.

⁷ Min noco yononi cuscan fasi shara. Ascacun un nanfo tapishon uhuun nomuran un shinansharai minhuunoa yoiquin shara huashquin.

⁸ Min ua yononi cuscan un aicai. Ua potayamapun.

⁹ ¿Ahuuscashomain pushcopan ahuun nomuran shinansharatiroquin ahua chaca huashquima? Min tsain yoia cuscan tanacoianshu pushco isharatiro.

¹⁰ Uhuun Ifon, uhuun nomuranshon un mia fasi funai mi fu rafushquin. Ascacun ua cushupun min tsain un potanonma.

¹¹ Uhuun nomuranshon min tsain shara un nanua mia chaca huashquima.

¹⁸ Ua cayacafi shinanmasharahuun min tsain shara un fasi tapisharanon.

⁸⁹ Ifon, min tsainfin ipanacaquin. Nan nai muran mi fu icafoan yoimisifo cuscan min tsaincai fianananpacunacama.

⁹⁷ Uhuun Ifon, min tsainfin un fasi noicoincain. Shafatisho min tsainhuunoasi un shinanfafaini.

⁹⁸ Min noco yononi cuscan min ua yoifafainni un nanscacoin huanon. Ascan nan min tsainhuunshon un tapia cuscacai ua noicasmaifoan tsoan tapiama.

¹⁰³ Un mua min tsain fata cuscara shara. Nan fona fata sharafia min tsaincaifin fasi fata sharacoin un muicai.

¹⁰⁵ Min tsainfin nan uhuun lampara cuscaraquin. Nanhuunshon faquishi muran un oinsharatiro min fai tanasharashquin.

¹³⁰ Ascan futsan min tsain tapisharashon futsafori tapima sharatiro ahuuscashumain non isharatiroquin. Tapisharamafoanri min tsain nicacaquin tapisharatirofo.

¹³¹ Un fasi min tsain shara fuchipaicoin. Nan chashoanun nomicoinquin unu ayapai ashashaitiro cuscan nanscarifi ai min ua yonopaiyai cuscan un fasi nanscara shara un tapipai.

¹³² Asca tsoan mia noicoiaifin min ahuun ramapaicai. Uhuunoari shinantan uhuun ramapaipun.

¹³³ Min tsainman ua iyosharahuu un mia tanasharanon chaca uhuun ifo inonma.

¹⁶³ Nan chanifofin un noicasmacoin. Uncai nan chanifohuunoa nicapaima. Ascan min tsain fustifin un fasi noicoinquin.

¹⁶⁵ Asca tsoan min tsain noiaifin nantofin ahuun nomuranshon chacafohuunoa shinainmaquin. Nanscara yoracai ahuara chacapan ato pacumatiroma.

¹⁷⁶ Nan chashoan funotiro cuscan urifi mun funoa. Uhuun Ifon, ua funapun un afanan mi fu inon. Min ua yonoa cuscan un ointiaquimamaquin.