Salmos 107 - Sharanahua: Diospan Tsain

Nocon Ifo Diosin noco noipacunaca

¹ Nan Ifo Diosifin sharaquin. Nanton nocohuun noipacunaca. Ascacun yoicahuun isca huaquin, —¡Aicho, Ifon! Min noco shara huafafainiran, —ishon yoicahuun.

² ¿Mato noicasmacaquin mato chaca huaifoan Ifo Diosin mato numamun? Mato numa cuscari futsafori yoicahuun.

³ Asca yora futsafo aton mai anoashu mai futsa pashcanain futsunifo. Ascaifoan nocon Ifo Diosin afanan nannosi ato ichanan huani. Nan fari oaiquirinoa ato ihuufain fari iquiaiquirinoa ihuufain fari oai istafarinoa ihuufain fari cai istafarinoa ihuufain nansca huashon atoti ichanan huani.

⁴ Ato ichanan huataima atirifi tsoa istaipama anoashu foanfafaincani funonifo. Tsoancai pushu rasi fuchinima ano ishcaquin.

⁵ Nanscashu nanfo fonainyanan nomicani naaquin rashquinifo.

⁶ Ascashon nocon Ifo Diosi cunanifo isca huaquin, —Ifon, man non omitsiscai naicai. Noco numapun, —ishon cunanifo. Ascaiton ato numani afanan omitsiscanonfoma.

⁷ Ascashon cayacafi pushu rasi ano nocon Ifo Diosin ato iyoni nannoashu isharanonfo.

⁸ Man mato numaqui nocon Ifohuunoa yoiquin isca huacahuun, —¡Aicho, Ifon! Min fasi nocohuun noiquin unupacunacama. Min noco sharahuafafainmisiran, —ishon yoicahuun.

⁹ Tsoa nomicoiaiton nocon Ifoan ato nomi shatuin afanan tsoa nominonma. Fonaincaifoanri ato ahuara shara inain piicani mayan sharanonfo.

^10-12 Atirififoan nocon Ifon Diosin ato yoiai cuscan nicacasmacaquin ahuun tsain potanifo. Ahuun tsain ahuamaran ishon shinanpaonifo. Ascashu nan faquish muran ica shinantsain aton nomuran tsoan muusharanifoma. Nan cunopan munushumuashu cunu murannoashu omitsiscai cafisca muunifo. Nan nocon Ifon Diosin ato curushcai omitsiscamaino nan pacui cafiscanifo. Tsoashtacain afanan funimanima.

¹³ Nanscara muucaquin nocon Ifo Diosi cunanifo isca huaquin, —Ifon, non fasi omitsiscaicain. Noco shinanfain noco numapun, —ishon yoiaifoan Ifo Diosin ato numani. Ato asca huaino afanancai tsoa omitsiscanifoma.

^14-16 Nan nocon Ifo Diosin ato faquish murannoa caimana cafisca huano aton ointi ihuucoin mufiafo afanan ato ointi ihuu muyamafain nan cunopan munushumua cuscaran muyamafain nan cunu murannoashu omitsiscai cafiscai afanan tsoan munifoma. Nanscara muuaifoan nocon Ifo Diosin ato numani. Nan cunu muran icafocun nocon Ifon Diosin cunu caincaiti ahuun anu bronce arasaqui futsani. Caincaiti futsa cuno ahuun anu hierrori arasaqui futsani ato caimashquin. Ascacun nocon Ifohuunoa yoiqui isca huacahuun, —¡Aicho, Ifon! Mincai nocohuun noicoinquin unupacunacama. Min noco sharahuafafainmisiran, —ishon yoicahuun.

¹⁷ Futsafoancai nocon Ifo Diosi shinantama nicacasmashon afanan cayacafi shinantiroma. Nanscashu aton chacahuunoashu omitsiscapaonifo aton nicayosmapan.

¹⁸ Ascashu afanan imis cuscan piipai sharatama naaqui rashquinifo.

¹⁹ Nanscai omitsiscacaquin nocon Ifo Diosi cunanifo isca huaquin, —Nocon Ifon, man non nai omitsiscaicain. Nocon numapun, —ishon cunanifo. Cunaquin asca huaifoan ato numani afanan omitsiscanonfoma.

²⁰ Nocon Ifo Diosifin ahuun tsainmansi ato caya huaniquin. Man naaqui rashquiaifoan ato numani omitsiscanonfoma.

²¹ Asca huatan nocon Ifo Dioshuunoa yoiqui isca huacahuun, —¡Aicho, Ifon! Min nocohuun fasi noiquin unupacunacama. Min noco shara huafafainmisiran, —ishon yoicahuun.

²² Inafo rutucashon nocon Ifo Diosin mato sharahua cuscari marifin ismacahuun, —¡Aicho, Ifon! Min noco fasi shara huamisiran, —ishon yoisharacahuun. Asca huafain nocon Ifoan mato fasi shara huashoa cuscan unimayanan fanaincahuun.

²³ Ascan atirififoan unuhuan mai yamai ano aton shashohuanun pocufainifo ahuarafo inanmitsai focani ahuun rafanan pui fiishcaquin.

²⁴ Focaquin unuhuan oianfo nocon Ifo Diosin oni huani cuscan fasi ununhuan noacoin oinnifo. A muran ahuara futsa futsatapafo sharacapacoinfo Diosin onihuani cuscan oinnifo.

²⁵ Ascaifoanno nocon Ifoan ahuun tsainmansi fuuhuan huaquin unu fuchomanhuan huani.

²⁶ Ascan ununhuan fuchomanhuaino shashohuan nonoinacahuatan naman pacucahuancacaini. Ascaino shashohuan murannoafo fasi ratucoinifo.

²⁷ Ascaino yorafo nan pauin cafiscai ocurafunoashu cushcacunfaincani pacu cuanifo. Tsoancai tapinima ahuuscashumain asatirofomaquin.

^28-29 Ascashu omitsiscacaquin nocon Ifo Diosin cunanifo isca huaquin, —Ifon, man non asain futsuicai. Nocon numapun, —ishon oiashcafinin cunaquin yoinifo. Asca huaifoan nocon Ifo Diosin ahuun tsainmansi fuu nishma huafain fuchomanhuanfiain afanancai furo inima nan ununhuan pusiquima racani.

³⁰ Ascan nan shashohuan muranshon oianfo ununhuan pusiquima racani cusumun fopaiyaifoan nocon Ifo Diosin ato iyoni. Ascaino fasi unimanifo.

³¹ Ascacun Ifohuunoa yoiqui isca huacahuun, —¡Aicho, Ifon! Min fasi nocohuun noiquin unupacunacama. Min noco shara huafafainmisiran, —ishon yoicahuun.

³² Yorafoya niaifofo ichanaintian nocon Ifo Diosihuunoa yoi sharacahuun isca huaquin, —Nocon Ifo Diosin fasi sharacoinran. Tsoancai Diosi finontiroma. Nantofin ahuamamishti huatiroquin, —ishon nocon Ifo Dioshuunoa yoisharacahuun.

^33-34 Nan yora chacafo icano nocon Ifo Diosin unu nutsofain mai mutocoin huatiro. Pozo cuscaran mai poquimua murannoari nutsomatiro mai muto inon. Fana ahuun fimi ichapayari Diosin fiananan huatiro mai saoya osiano afanan fimi foaisharatiroma,

³⁵ Asca huashon nan mai chaca afanan Diosin fiananan huaquin shara huatiro unu afaino afanan mai muto inonma.

³⁶ Nocon Ifo Diosin nan fonaincaifo iyotiro nanno inonfo. Pushu rasi huanifo a muran isharanonfo.

³⁷ Nan mai shara ano mau huatan aton fimifori fanacani. Ascashon chipo aton yonofo foaisharacun chitutirofo.

³⁸ Nocon Ifo Diosin ato shara huafafainni aton facu ichapa cainon. Nocon Ifo Diosin yonoa cuscan aton moifori ichapa cainon.

³⁹ Nocon Ifo Diosin ato asca huafiaino aton niaifofoan ato chaca huaino yorafo omitsiscai aton nomuran afanan shinansharacoincanima. Ascaifoannori afanan aton yono ichapama yorafori ichapama ifafaincani.

⁴⁰ Ascan nocon Ifo Diosin yononi cuscan aton caifo niaifofohuunoa shinanchacanifo. —Nocon niaifofocai ahuamaran, —ishon yoicani. Ascaino Dioshuunshon niaifofo tsoa istaipama ano ato nichini nannoashu foanfafainnonfo.

⁴¹ Ascafiaifoan nocon Ifo Diosin yora ahuuomafo omitsiscaifoan ato numai. Ascashon nan chashoan facu ichapa caintiro cuscai nanforifi aton facufo ichapa caincaniquin.

⁴² Nan isharamisifoan oincani fasi unimaifoan. Ascan nan chaca huamisifocai tsoa puusiquima.

⁴³ Ascan nan ratora shinansharamisiton un yoimisi cuscan maton nomuran nanusharacahuun nocon Ifo Diosin nocohuun fasi noiai cuscan shinancahuun.