Salmos 103 - Sharanahua: Diospan Tsain

Nocon Ifohuunoa yoisharacahuun

¹ Uhuun nomuranshon un shinan isca huaquin, —Nocon Ifo Diosihuunoa yoisharahuu, —icashu un yoimua. Uhuun nomuranshon un yoia nan nocon Ifo Diosi fusti sharacoin. Tsoa futsacai a cuscarama.

² Uhuun nomuranshon un shinan isca huaquin, —Nocon Ifo Diosihuunoa yoisharahuun. Nanton nantifi ua shara huashoan cuscan ointiaquimayamahuun, —ishon uhuun nomuranshon un shinan.

³ Un chaca hua cuscan nantifi Diosin ua rau hua afanan afohuunoa shinanonma. Un pau futsa futsatapafo fuchia cuscan nantifi Diosin ua caya huamisi.

⁴ Un omitsiscapanacafo muran cacuana nanton ua numa. Nan u fu ishon ua noitan uhuun ramapaimisi.

⁵ Nanton ua fasi ahuara ichapa sharafo ashomisi. Tutucai cuyacoin noyai atsanamisima. Nanscarifi aquin nocon Ifo Diosin ua afanan pushco cuscaran shara ima un atsananonma.

⁶ Yora futsafoan chaca huaquin omitsiscamatirofo. Ascan nocon Ifo Diosicai ascarama. Nantofin noco cayacafi ashosharamisiquin.

⁷ Nocon Ifo Diosin imisi cuscan Moisés tapimapaoni. Ascan ato asho sharamisi cuscan nan Israelifo tapimani.

⁸ Nocon Ifo Diosin nocohuun ramapaicain noco shara huashomisi. Nancai nocoqui funa sinaima. Nocohuun noicai unupacunacama.

⁹ Non chaca huai cuscacai noco yoipacunacama. Nocoquicai sinapacunacama.

¹⁰ Non chaca huai cuscan noco onaintimapaiquin noco onaintimatiro. Ascafiacai noco asca huapaimisima.

¹¹ Noncai nai muran cuyacoin non finontiroma. Nanscarifi aquin non Ifo Diosihuunoa shinansharai nocohuun noiai cusca fasi shara finacaia.

¹² Fari oaiquiri chashainacahuatiro. Ascatan iquipacutiro. Afanancai noconantirofoma. Nanscarifi ai nocon chaca noco soashonano afanan nocon chaca no fu ipanacama.

¹³ Apan ahuun facuhuun ramapaiquin shinansharatiro cuscan. Nanscarifi ai tsoan Ifo Dioshuunoa yoisharamisifin nocon Ifon Diosiri atohuun ramapaiquin.

¹⁴ Nan nocon Ifo Diosifin tapiaquin noco maihuunoa onihuani cuscan. Ascashu nocohuun ramapai.

¹⁵ Nonfin nan fasi yafi charo cuscaraquin. Nanfo samamashta tsasitiro. Nanscarifi ai norifi non samamashta natiro.

¹⁶ Fasi yafi charo tsasicun fuu foanquin yamarisca huatatiro. Nanscarifi ai non nai yamariscatatiro.

^17-18 Asca tsoan nocon Ifohuunoa shinansharamisifin atohuuncai noiquin unupacunacama. Aton facufo yafi aton funafori ato yoiyoni cuscan huafain ato yononi cuscari huaifoan ato numashquin nanfo a fu nipanonfo.

¹⁹ Nocon Ifon Diosin nai muran icaton nantifi iquina. Nannoshon nantifi nai muran icafo non mai ano icafori nantofin aton niaifocoinshon ato yonoaquin.

²⁰ Manfin Diospan oinmatifoquin man a fu nai muran imisi manfin mutsisipacoinquin. Mato yoimisi cuscan man amisi. Maton Ifohuunoa yoisharacahuun.

²¹ Nan man a fu nai muran icafoti manrifi ahuun oinmatifo. Mato yoia cuscan man amisi. Marifi ahuunoa yoisharacahuun.

²² Nantifi nocon Ifo Diosin oni huafoti ahuunoa yoisharacahuun. Unrifi un ahuunoa yoisharaiquin.