Números 14 - Sharanahua: Diospan Tsain

Nocon Ifo Diosin Israelifo yoini cuscacai afanan nicapainifoma

¹ Ascano nantian aton caifofo Canaán mai anoashu nasonifo yoiafo cusca nicacanashu Israelifo fasi oiashcafinin uaishinifo.

² Ascashon nantifishon Moisés yafi Aarónqui tsain chaca huanifo. Yoiquin isca huanifo, —Non Egipcio mai anoashu iyamarai tsoan istapaima anoashu non naa shara icuana.

³ ¿Ahuuscaimun nocon Ifo Diosin na mai ano noco ihuuaquin noco ashin rutushon? Nocon ahuinfo non nocon facufori achishcaquin aton yonomati inonfo. Non nunoashu fononfocahuun non afanan Egipcio mai ano nasononcahuun, —icashu Israelifo yoinannifo.

⁴ Ascashon nan shinainfo cusca afi ranan yoinonannifo, —Non niaifo futsa catononcahuun noco afanan Egipcio mai ano iyoicanon, —icashu yoinannifo.

⁵ Nan nicacatan Moisés futan Aarón aton caifo Israelifo nanno ichanainno aton ointaifin fuopacucahuani nantifishon ointaifin.

⁶ Ascano Josué yafi Caleb nanfoan futsafo futan nan mai shara oinnifoan aton sahuuti fashnunifo aton ointi ihuumanaifoan ato ismashquin.

⁷ Ascashon nan rafutan nantifi aton caifofo yoini isca huaquin, —Nan mai non rama oinfainnita nan mai fasi sharacoin iquita.

⁸ Nan maifin sharacoinquin. Anoashucai non ahuashta yopatiroma. Nantifi fanafo non yoinafo non fona fata sharacoinfo non nantifi non yopai cusca nanno. Ascancun nocon Ifo Diosin nocoqui unimaquin nan mai ano noco iyotiro nanno nocona inon.

⁹ Ascacun nocon Ifoan noco yonopaiyai cusca potayamacahuun. Ahuun tsainri icoinra huacahuun. Nan mai ano yorafo icafoqui ratuyamacahuun. Nonfin ato finontiroquin ato rutuqui futsashquin. Nocon Ifo Diosin no fu ica. Nanscacun nanfoancai noco ahuusca huatiroma nococai tsoan rutuima. Ascacun ratuyamacahuun, —ishon Josué futan Caleb ato yoini.

¹⁰ Nan rafutan ato yoisharapaifiaino nan Israelifoan yoinifo, —Non ato toquirinin tsacanoncahuun naanonfo, —icashu yoinannifo. Nantian nan nocon Ifo Diosin nan sharacoinshon chashariscatani nan ichananti pano pushu caincaiti ano Israelifoqui ato ointaifin noconi.

¹¹ Atoqui nocotan nocon Ifo Diosin Moisés yoini isca huaquin, —¿Ahuutianmun na yorafoan uqui tsain chaca huaquin unucaniquin? Diosincai ahuamaran, ishon aton nomuran shinanquin shatuyamacaicani. Un ato tsoan atiroma cusca ismafiamisi uacai icoinra huapaicanima. ¿Ahuutianmun ua icoinra huacaniquin?

¹² Natianfin un ato potaicain afanan uhuun yora inonfoma. Un pau isincoin ato fuchimani nantifi nai futsunonfo. Un asca huatan un minhuunshon caifo futsafo un oni huashquin. Nan min yorafoanfin Israelifo finoncoianfo fasi mutsisipacoin iishquicaniquin. Israelifocai ascarafo imisimaran, —ishon nocon Ifo Diosin Moisés yoini.

¹³ Nannori yoiaiton nicaquin Moisés cumani, —Ifon, min noco Egipcio mai anoshon min curushhuunshon min noco ihuuni non aton yonomatifo afanan inonma. ¿Ascacun min natian uhuun caifo Israelifo cuyoshquinmun? ¿Ascano Egipciofoan mihuunoa raquiri shinanshquimun?

¹⁴ Nan mai shara icafoannoshon mihuunoa nicamisifo. Min no fu imisi cuscan nan yorafoan nicamisifo. Man mia yora futsafoan nica min noco ashoan cusca. Min nai coinmanhuan rufofo noco iyoshonaino acachori non shafata cani. Ascanori yamu chii urumanhuanri noco iyoshoni. Nan manifotiton min noco ashoain cusca nicamisifo.

¹⁵ Ascan min uhuun caifo natian namaquin cuyocun caifo futsafoan min noco ahuamamishti huashomisi cusca nicafiashon yoishquicani isca huaquin,

¹⁶ “Aton Ifon Diosin nan Israelifo yoiyoni mai futsa shara ato inanshquin. Ascafiashocai nan mai ano ato iyotiroma. Ascano tsoa istaipamashon ato rutuquin futsaran,” ishon yoishquicani.

¹⁷ Ascacun natian ato ismahuu min ahuamamishti huatiro. Min yoimisi cusca huahuun.

¹⁸ Nocon Ifo Diosin, nocoqui funa sinayamapun. Min yorafohuun fasi noicai unupacunacama. Uhuun yorafoan miqui chaca huaifo cusca min ato yonoa cusca ayamafiaifoan aton chaca soashofain ato rau huahuu. Min yoiquin isca huani, “Un ato rau huafia aton chaca shatuyamaifoan un ato onaintimai. Ua chaca huaifoan un atohuunshon aton facufo non aton chatafo non aton shotafoan ahuun facufoya un ato onaintimacoinran,” ishon min yoini.

¹⁹ Min yorafohuun noiyai cuscacai tsoa futsafohuun noi ascamisima. Uhuun yorafo Egipcio mai anoashu caitian nantianri mia chaca huamisifofia min aton chaca rau hua afanan aton chacahuunoa shinanonma. Ascacun afanan natianri ato chaca rau huashopun, Ifon, —ishon Moisés yoini.

Nocon Ifo Diosin Israelifo onaintimani

²⁰ Ascaiton nocon Ifo Diosin Moisés cumani isca huaquin, —Mian yoiai cusca un ato chaca rau huashotiro.

²¹ Ascafia un amisi cusca man ua icoinra huatiro. Un fasi sharacoincun ua manifotiton ointirofo. Ascacun nanrifi man icoinra huatiro.

²² Nanscarifi aquin tsoa istaipamashon un ahuamamishti ato ashomisi cusca oinfiashocai ua icoinra huamisifoma. Nantishotapiquin ua nansca huamisifo. Ascatari ua nicacasmamisifo.

²³ Ascafiacai tsoashtan nan mai shara ano itiroma. Nan maicai tsoan oinpacunacama. Un aton shunifo yoiyoni cusca un aton funafo nan mai shara inanfiano aton funafo fasi yoitimamisifo. Nanscashocai nan maicai tsoashta oinpacunacama. Uhuunoacai shinansharamisifoma. Nanscacun nan mai tsoan oinpacunacama.

²⁴ Ascafia nan uhuun oinmati Calebcai nicayosmamisifo cuscarama. Nantofin ua icoinra huafain ua tanasharamisiquin. Ascacun nan mai shara rama oianfin un nanno imaiquin nan ahuun mai inon. Ascano ahuun funafori nanno ishquicani. Unfin nan mai ato inanshquiquin nanno inonfo.

²⁵ Ascacun natian min caifo Israelifo yoihuun nasononfo. Nan Amalecitafo non Cananeofo icari foyamacahuun. Funamari unuhuan ahuun anu oshinhuuri fotacahuun. Nan tsoa istaipama ano fotacahuun, —ishon nocon Ifo Diosin Moisés yoini.

²⁶ Ascashon nocon Ifo Diosin afanan Moisés yafi Aarón yoini isca huaquin,

²⁷ —Nan min yorafoan uhuunoa tsain chaca huafain uqui tsain chipumisifo. Nan tsain uqui chipuyanan tsain chaca huaifo cusca mun nantifi nicamisi.

²⁸ Nanscacun natian ua ato yoishohuun isca huaquin, “Un niimisi cusca man icoinra huatiro. Nanscarifi ai un mato natian yoiai cusca man icoinra huatiro. Man shinanchacaquin man yoimisi isca huaquin, ‘Nuno tsoa istaipama anoashu man non nai cuyoshquin. Nocon Ifo Diosicai noco cushuimaran,’ ishon man nannori shinanchacamisi. Man yoimisi cusca mun nica. Icon natianfin man nai cuyoshquicai.

²⁹ Ascacun un mato tsoa istaipama anoshon un mato namashquin. Nan maton caifo man tanan huafo. Nantifi aton fari tapishquin. Ascacun nan uhuunoa tsain chipumisi veinte fariya iyamarai veinte fari finoanfo nanfo nai futsushcani.

³⁰ Un mato yoiyoni cusca nan mai sharacoin un mato inain. Ascafia nan ua nicacasmai ratora futsacai nan mai ano ipanacama. Ascafia nan Caleb yafi Josué fusti nanno itirofo.

³¹ “Ascafia man yoimisi maton facufoan caifo futsafo aton yonomatifo iishquiran ishon man yoimisi. Ua icoinra huayamashucai man ano itiroma. Ascafia un maton facufo nan mai shara ano un imashquin nannoashu fasi unimanonfo.

³² Manfin tsoa istaipama anoashu nai futsushquicain. Ascano nanno mato mai huashquicani.

³³ Matohuunoashu mato facufori cuarenta fari tsoa istaipama anoashu omitsiscai. Un mato yonomisi cuscacai man aama. Nanscacun nannoshon maton facufoan chashoanfo cushumisi iishquicani. Nan man nantifi nai cuyoaitian maton facufo nan mai shara ano fotirofo.

³⁴ Man manfin cuarenta dia oshatan nan mai sharano oianquin. Unfin mato yoimisi nan mai shara un mato inain. Ascafiacai ua icoinra huafoma. Man ua chaca huaa. Nanscacun natian man cuarenta fari tsoa istaipama ano foafafainshquin. Uncai afanan mai shara ano mato iyoi caima. Natian un mato onaintimai cusca man mutiroran,” ishon ato yoihuun.

³⁵ Unfin mato Ifo Diosiquin nan un ato yoia cusca nan yorafo chaca huamisi. Ichanaintian man uhuunoa tsain chaca huamisi. Ascacun un ato yoia cusca nanfohuunshon un ato nantifi onaintimashquin. Ascano tsoa istaipama anoashu nai futsushquinran, —ishon nocon Ifo Diosin Moisés yafi Aarón yoini.

Nan mucu rafuti nocofunu chaca yoiquin Diosin ato namani cuscan

^36-37 Ascano nan Israelifo cuarenta dia oshatan mai shara ano foanfafaincaquin oinnifo nan mai sharafiacun aton caifo ano nasoaifotian ato ratumatoshinifo. Yoiquin isca huanifo, —Noncai na mai shara ano itiromaran, —ishon ato yoicaquin Israelifo ratumanifo. Ascaifoan nocon Ifo Diosin yononi nanfo pau isininpa fuchiashu nai futsunonfo.

³⁸ Nan doce nocofunun mai shara ano oinfoanfafainnifo. Nan ato muran Josué yafi Caleb tsoan istaipama ano ifiashucai nan rafu nanima.

Amalecitafo futan Cananeofoan Israelifo rutuqui futsanifo

³⁹ Ascashon nocon Ifo Diosin yoini cusca Moisés Israelifo ato yoipacuni. Ato yoiaiton nicacanashu fasi aton nomuran shinancoinnifo.

⁴⁰ Nan iyoconaino funamari Israelifoan shinannifo nan mai ahuun anu Canaán ano foshcaquin. Nanno machi ichapa rasi ini. Ascatan yoinancani iscanifo, —Non canon. Nonfin nocon Ifo Diosi chaca huaitaquin. Ascafia natian noco yoiyoni cusca nan mai shara ano non itiro. Diosin noco yoiyoa cusca noco inainran, —icashu yoinannifo.

⁴¹ Nanscaifoan oinquin Moisés ato yoini isca huaquin, —Nocon Ifo Diosin mato yoia, “¡Ari afanan foyamacahuun!” ¿Ascacun ahuuscaimun Diosin mato yonoa cusca man nicacasmaicain? Mancai na mai shara ano itiroma.

^42-43 Man ari cafiainocai nocon Ifo Diosin mato fu caima. Ascacun ari foyamacahuun. Man ari foaitian nanrishon Amalecitafo futan Cananeofoan mato rutuqui futsashquin. Manfin nocon Ifo Diosi cachiquiri huaaquin. Ascacucai mato fu caima. Man ari foaiton nan maton noicasmaifoan mato rutushquicaniran, —ishon Moisés ato yoini.

⁴⁴ Nannori ato yoifiainocai tsoan Moisés nicapaitama fonifo. —Nocon Ifo Diosin no fu cairan, —ishon shinannifo. Ascashu nan machifo Canaán maihuuri fonifo. Ascafia nan Israelifo foaifoannocai Moisés ato fu canima. Nan Diosin ato yonoa cusca nan toquiri sapa rafuqui cununi cusca casho muran nanua rafucai tsoan fonima.

⁴⁵ Ascano nan machifoanno Amalecitafo fu Cananeofo machi tunanmanri fonifo Israelifo rutushcaquin. Ascashu ato Horma mai ano ichonifo.