Números 13 - Sharanahua: Diospan Tsain

Moisés nocofunufo nichini Canaán mai ari ointanonfo

¹ Ascano nocon Ifo Diosin Moisés yononi isca huaquin,

² —Un min caifo mai inain ahuun anu Canaán. Nanri nocofunufo nichihuun nan mai oinsharayotanonfo. Nan icafo manifoti nocofunu niaifo fusti rasi ato catonhuun. Ascashon ato nichihuun, —ishon nocon Ifo Diosin Moisés yoini.

³ Nan nocon Ifoan yoia cusca Moisés doce nan icafoti Israelifo manifoti ato niaifofo fusti rasi catonni. Tsoa istaipama ahuun anu Parán anoshon ato Canaán mai ano nichini.

⁴ Ascashon na manifoti aton niaifofo cunushoni isca huaquin. Mani futsafoan ahuun anu Rubén aton niaifo Samúa catonni. Nan Samúa Zacur facu ini.

⁵ Mani futsafoan ahuun anu Simeón aton niaifo Safat catonni. Nan Safat Horí facu ini.

⁶ Mani futsafoan ahuun anu Judá aton niaifo Caleb catonni. Nan Caleb Jefone facu ini.

⁷ Mani futsafoan ahuun anu Isacar aton niaifo Igal catonni. Nan Igal José facu ini.

⁸ Mani futsafoan ahuun anu Efraín aton niaifo Oseas catonni. Nan Oseas Nunpan facu ini.

⁹ Mani futsafoan ahuun anu Benjamín aton niaifo Palti catonni. Nan Palti Rafú facu ini.

¹⁰ Mani futsafoan ahuun anu Zabulón aton niaifo Gadiel catonni. Nan Gadiel Sodi facu ini.

¹¹ Mani futsafoan José facu ahuun anu Manasés aton niaifo Gadi catonni. Nan Gadi Susi facu ini.

¹² Mani futsafoan ahuun anu Dan aton niaifo Amiel catonni. Nan Amiel Guemalí facu ini.

¹³ Mani futsafoan ahuun anu Aser aton niaifo Setur catonni. Nan Setur Micael facu ini.

¹⁴ Mani futsafoan ahuun anu Neftalí aton niaifo Nahbi catonni. Nan Nahbi Vapsi facu ini.

¹⁵ Mani futsafoan ahuun anu Gad aton niaifo Geuel catonni. Nan Geuel Maqui facu ini.

¹⁶ Nan nocofununfoan aton anufo catoan cusca Moisés ato mai futsa ointanonfo ato nichini. Nunpan facu Oseas Moisés anu futsa tuqui huani Josuéran huani.

¹⁷ Ascatan Moisés ato nichini mai Canaán ari ointanonfo. Ascano ato yoini isca huaquin, —Fari oai istafari Néguev mai anori fotacahuun. Nanno machifo ano oinshcaquin.

¹⁸ Ahuu cuscaramainquin oinyotacahuun. Yora ano icafomain ahuu cuscarafoquin mutsisipafo iyamaraimain tsoan mutsisipamaquin nanfo oinfain yora ichapa iyamaraimain yora ichapamaquin oinsharatacahuun.

¹⁹ Ascatan aton maihuunoari oinsharacahuun. Shara iyamaraimain chacaquin. Ascashon aton pushu rasi cunu cuyacoin tarati huayacunafo iyamaraimain tsoan aton pushu rasi ano cushuamaquin.

²⁰ Oinfain aton mai anomain yono foaisharatiro iyamaraimain yono foaisharatiromaquin. Ascatari nannomain nii ichapa iyamarai nii yamaicain. Ratuquima nan mai ari fotacahuun aton yonofo non aton fimifo noco fushoshcaquin non oinon, —ishon Moisés ato yononi. Nantianri uva rama oshi futsui ini.

²¹ Ascano Israelifo icanoashu fonifo tsoan istaipama ahuun anu Sin ano nocoshon oinnifo Rehob nan chaima Hamat ini.

²² Ascano nan mai ahuun anu Néguev anoashu focani pushu rasi ahuun anu Hebrón ano noconifo. Nan Hebrón ano nocofunu ahuun anu Anac ipaoni. Nantian ahuun funafo nan nocofunufo Ahimán non Sesaí non Talmai non afo icafo ini. Nan pushu rasi Hebrón oni huanitian siete fari finontan chipo nan pushu rasi ahuun anu Zoán mai Egipto ano oni huani.

²³ Ascano Israelifo focani machi rafu nushmancayan ahuun anu Escol ano noconifo. Nannoshon nan fimi uva ahuun poyan poshtunifo ahuun fimifo tushca fasi uhuapacoin yora rafutan ihuiquin iyashon aton mai ari fonifo. Nantianri fimi futsafori fonifo. Futsan ahuun anu granada futsari ahuun anu higos.

²⁴ Nannoshon Israelifoan uva poyan poshtushon aton mai ari fonifo. Ascano afanan nan mai anu futsa tuqui huanifo Escolran huashon anunifo.

²⁵ Cuarenta dia oshatan nan mai ano foanfafainnifo nantio oinsharacani. Oinfoafafaicatan aton pushu rasi ano nasonifo.

²⁶ Ascano Moisés yafi Aarón non aton caifo Israelifo tsoa istaipama ahuun anu Parán nanno pushu rasi Cades ano inifo. Nanno nan doce nocofunufo atoqui nasonifo nan oianfo cusca ato tapimanifo.

²⁷ Ascano Moisésqui nocotan yoiquin isca huanifo, —Min noco mai futsa ari nichiyamua. Non ointanon nanno non nocoa. Icon nan mai fasi sharacoin. Nanno yono futsa futsatapafo fasi shara. Nanno icafocai ahua yopacanima. Nonfin mato fimi fushoaquin man oinon. Ahuu cuscaramain nan fimifoquin oinshon man noco icoinra huanon.

²⁸ Ascafia nanno icafo yorafo fasi mutsisipacoinfo. Aton pushu rasi uhuapacoin. Ascanori cunu cuyacoin tarati huayacunafo. Tsoacai ato muran iquitiroma. ¡Musucoin! Ascatari non oian Anac ahuun funafo. Aton shuni cuscarafo fasi uhuapacoinfo.

²⁹ Ascano nan Amalacitafo Néguev mai ano icafo. Hititafo non Jebuseofo non Amorreofo nan machifo ano icafo. Ununhuan cusumun non unu Jordán cusumunri nan Cananeofo icaforan, —ishon yoinifo.

³⁰ Ascano Israelifo Moisés ahuun ointaifi nantifi ahuun caifo ichanannifo nan rama ointafo cuscan ato yoiaifoan nicanifo. Ascano nantianri Caleb ato yoisharani ratunonfoma. Ato yoiquin isca huani, —¡Ratuyamacahuun! Non afanan nan mai shara ano fononfocahuun. Nan icafo ano non ato rutushon non aton mai fiinon, —ishon Caleb ato yoini.

³¹ Nannori Caleb yoifiaiton nan futsafo rama nan mai anoashu nocoafoan tsain futsa yoiquin isca huanifo, —¡Ma! Na mai ano icafo non ato rutuqui cuyotiroma. Nanfo fasi mutsisipacoinfo. Noncai ato cuscarama. Non ato rututiromaran, —ishon yoinifo.

³² Nan nicacani Israelifo fasi ratucoinnifo. Ascashon nan rama mai futsa ariashu nocoafoan afanan yoinifo, —Ma. Nonfin oianquin tsoa nanno ipaiyaiton samamashta nanno icafoan ato rutushquin. Nanno icafo fasi uhuapacoinfo.

³³ Ascatari non oian Anac ahuun funafo nocofunufo uhuapacoin fasi cuyamasocoian. Non atoqui nococun noco oinshquicani nan ocutsuru ointsafo. Non ato ointan nofiri non oinmua nan ocutsuru ointsamishti non oinmushquiran, —ishon yoinifo.