Números 12 - Sharanahua: Diospan Tsain

María futan Aarón aton ushto Moisés yoiti huanifo

¹ Nantian María futan Aarón ahuun ushto Moisésqui tsain chaca huanifo. Moisés ainfo Etiope caifo fiini. Nanscacun aqui tsain chaca huanifo.

² —¿Nocon Ifo Diosicai Moisés fustihuunshon ahuun tsain futsafo yoiamun? ¡Ma! Nocohuunshonri ahuun tsain futsafo yoimisiran, —ishon María futan Aarón Moisésqui tsain chaca huanifo. Nan yoiti huaifo cusca nocon Ifo Diosin nicani.

³ Moiséscai curafiapaimisima. Tsoa futsacai Moisés cuscarama. Nantocai futsafo finonpaimisima. Manifoti anoacai tsoa a cuscara sharama. Nantofin Diosi fusti tanapaisharaiquin.

⁴ Ascatan nantian nocon Ifo Diosin Moisés non Aarón non María yoini isca huaquin, —Ichananti pano pushu ano matotisi fotacahuun, —ishon ato yoini. Ascano nan rafunon fusti nannoashu ichananti pano pushu ano fonifo.

⁵ Nantianri nocon Ifo Diosin nai coinmanhuan muran atoqui fotoni. Nan ichananti pano pushu caincaiti ano nia ini. Ascashon, —Aarón yafi María nuno fucahuun, —ato huani. Ascano nan rafu aqui funifo ahuun ointaifin nitishonifo.

⁶ —Na un mato yoiai cusca ua nicasharacahuun. Uhuun tsain yoimisi mato muran ica umain ahuu cuscaraqui un yoitiro. Ahuun namapanhuunshon iyamarai namapan cuscarahuunoa un yoipaiyai cusca un nan yoimisi.

⁷ Ascanfia nan uhuun oinmati Moisés fu un tsaincaitiancai un namapanhuunoa yoimisima. Tsoa futsacai Moisés cuscarama. Un Moisés yoimisi cuscacoin samamashta ua huashomisi. Uhuun oinmati futsafocai Moisés cuscarama. Nantofin nantifi finoncoianquin.

⁸ Unfin a fu tsainmisiquin uncai ahuara futsahuunoa yoitamarocon un ahuun ointaifin shafacaficoin yoimisi. Unfin Moisés ismamisiquin unmain ahuu cuscaraquin. Nanton ua oinmisi. ¿Ascacun ahuuscai man uqui ratuamamun nan uhuun oinmati Moiséshuunoa tsain chaca huai? —ishon ato Upa Diosin yoini.

⁹ Nocon Ifo Diosin Aarón yafi Mariaqui fasi sinacaini atomaquinoashu cani.

¹⁰ Ascatan nai coinmanhuan muran nocon Ifo Diosi ichananti pano pushu manaon inainacahuan cani. Catapaiyaino María ahuun caya fiananriscatan fasi oshopacoin nan yoa rama furoahuamua ointsacoin ini. Nocon Ifo Diosin yonoa cusca María pau ahuun anu leprosa fuchiriscatani.

¹¹ Nanscaiton oinquin Aarón ahuun ushto Moisés yoini isca huaquin, —¡Ohuashta! Ushton, non fasi amaquiri shinancoian. Non mia chaca huahuunshon noco onaintimayamapun.

¹² ¡Nocon chipi shinanpun, ushton! Nan facu cainpai ahuan shaqui murannoashu naashu samamashta chacanai payocotiro cusca nocon chipi ascanonma, —ishon Aarón Moisés yoini.

¹³ Nannori Aarón yoiaiton nicaquin Moisés nocon Ifo cufinni isca huaquin, —Uhuun Diosin, uhuun chipi caya huapun, —ishon nannori ahuun chipi cufinshoni.

¹⁴ Nannori cufiainton nicaquin nocon Ifoan Moisés yoini, —Min chipi ahuara fasi chaca huaiton maton upa ahuun fusoqui cumo micho cuana. Ascan min yorafo tapiquin chipi chaca huacun ahuunoa shinanchacatiro. Ascan chipi rafipaiyaino man chipi matomaquishon pushu rasi pasoato pota cuana. Ascano siete dia oshatan finoanno afanan matoqui naso cuana. Ascan natian nanscarifi huaquin man icanoshon chipi potayocahuun. Siete dia osha finoanno afanan matoqui nasotiroran, —ishon nocon Ifo Diosin Moisés cumani.

¹⁵ Ascano siete dia oshatacai María pano pushu rasi ahuun yorafo icano ato fu iyonima. Ascashon ahuun yorafoan siete dia oshatan mananifo nan atoqui afanan nasoaitian. Nan atoqui nasoano afanan a fu fonifo.

¹⁶ Hazerot mai anoashu tsoan istapaima ano fonifo. Ascashon nanno anunifo Paránran huanifo.