Josué 7 - Sharanahua: Diospan Tsain

Nocofunun ahuun anu Acán chaca huani cuscan

¹ Ascatan Israelifoan yoinifo Jericó murannoa ahuara sharamishti Diosina fusti itiro. Ascafia nan mani futsa Judá ahuun yora Acán chaca huani. Acán apa Carmi ahuun shota Zabdi ahuun shota apa Zara. —Nocon Ifo Diosin non nantifi cuno sharafo non inain ahuuna inon, —ishon Israelifoan yoifianifo Acán nan ahuara futsa fini. Ascano nocon Ifo Diosin Israelifoqui fasi sinani.

² Josuécai tapinima nocon Ifo Diosin atoqui sinai ahuun caifofo Jericó anoshon pushu rasi ahuun anu Hai ano ato nichini. Nan Hai Bet-avén chaimashta. Fari oaiquiri pushu rasi Betel chaimashtari ini. Josué ahuun caifofo yoini isca huaquin, —Hai mai ano oinyotacahuun ahuu cuscaramainquin. Oinshon noco tapimai fucahuun, —ishon Josué ato yoini. Nannori ato huaiton nicacatan fonifo Josué ato yonoa cuscan oinfocani.

³ Ointani Josuéqui nasonifo aqui chani fucani. Yoiquin isca huanifo, —Nan Hai ano yora fusti rasi. Ascacun atirifoan nunoshon noco manatiro. Dos mil iyamarai tres mil fusti non Hai ano catiro ato rutuqui cuyoshquin, —ishon yoinifo.

⁴ Ascatan tres mil Israeli nocofunufo Hai ano fonifo. Ascafia nan Hai ano icafoan ato ichonifo.

⁵ Ascano Israelifo ichonifo Haifo icanoashu nan chai toquirifo ari ichonifo. Hai icanoafoan treinta y seis Israeli nocofunufo tunanmanrishon ato rutunifo. Ascano Israelifo fasi ratucoinifo.

⁶ Ascano nan nicatan Josué fasi shinancoinni. Ahuun sahuutifo fashnu fashnuani Diosin tsain nan casho muran nanua naman fuopacucahuani. Nan fari caitishon nanscai fuoshon nocon Ifo Diosi cufini. Israeli niaifo patasharinoafoanri nansca huanifo. Aton fuyamisi cuscan mai mapo aton mapomaqui huanifo nan shinancoiainfo cuscan ismashcaquin.

⁷ Ascashon Josué nocon Ifo Diosi cufini isca huaquin, —Nocon Ifo Diosin, min nantifi iquina. ¿Ahuuscai min noco unu Jordán anoshon nuquiri ihuuamun Amorreofoan noco rutunonfo? ¡Ohuashta! Non unimacuana unu Jordán ocuma futsa non nitua shara icuana.

⁸ ¡Ohua! Nocon Ifo Diosin, nan Hai ano icafoan noco yora ichofain nocon yora atirifo rutuafo. ¿Ascacun natianmun uhuun yorafo un raquiri yoitiroquin?

⁹ Nan Cananeofo non nan mai futsa icanoafoan nicacani Hai ano icafoan noco finoncoianfo nanfori nocoqui fucashon noco tarati huayacushquicani noco rutuqui futsashcaquin. ¿Ascano mani futsafoan mihuunoa raqui shinanshquicanimun? Min ahuamamishti huatirofiacun shinantirofo mincai noco cushusharatiroma. ¿Ascacun min ahuusca huatiromun min ahuamamishti huatiro afanan mihuunoa shinanonfo? —ishon Josué nocon Ifo Diosi cufini.

¹⁰ Ascatan nannori cufinfiaiton nocon Ifo Diosin cumani isca huaquin, —¡Funihuu! ¿Ahuuscai min fuopacuimun?

¹¹ Min caifofoan ua chaca hua. Un mato yoiyoa man ua nica sharaiton un nan mato noicasmafo nan mai anoshon un potashquin. Ascafia un mato yonoa cuscacai man aama. “Ahuara futsafo fiyamacahuun uhuuna fusti inon,” ishon un mato yoifia futsan man fia. Man chania. Nan mafofo man onua.

¹² Ascano nan mato noicasmaifo maton ranushumuafo ichofain atirifi rutuafo. Un afanan mato fu iyamaino nan mato noicasmaifoan mato finonshquin mato rutuqui futsashquin. Nan ahuara onuafo man rutuqui cuyoyamaino uncai afanan mato fu iishquima.

¹³ Ascacun min caifofo yoihuun itisharanonfo aton chaca shatushcaquin un funamari ato yoishquin ai cuscan nicasharanonfo. Ato yoihuun isca huaquin, “Nocon Ifo Diosin mato yoi isca huaquin, ‘Man ua inanshquiain cuscan mato murannoa futsan man fishon nan ahuara onua. Man nan yora chaca fuchiyamaino ato rutuqui cuyoshquin uncai afanan mato fu itiroma mato cushushquin nan mato noicasmaifoan mato rutunonfoma,’ ” ishon nocon Ifoan noco yoi.

¹⁴ Ascano funamari manifoti uqui fucahuun. Manifoti un oinfain ato murannoa yorafoti un oinfain nocofunufori un nantifi oinshquin.

¹⁵ Ascano nan rato nocofunun a mafo onua fuchishon rutucahuun cooashcaquin. Ua fasi chaca huaquin. Un mato yoiyoa cuscacai ua nicama. Manfin Israelifoquin nan nocofunun mato muranshon aca cuscan fasi chacacoin. Asca a non nantifi ahuun yorafori man ato rutushon cooatiroran, —ishon nocon Ifo Diosin Josué yoini.

Acán onaintima cuscan

¹⁶ Ascan iyoconaino Josué nantifi Israelifo nan manifoti nocon Ifo Diosi ointafin ato ichanan huaino aqui funifo. Judáfoan ahuun yora futsa nan chaca hua cuscan Diosin ato tapimani.

¹⁷ Ascano Judá yorafo Zarafo Diosin tapimani aton murannoa futsa chaca huani. Ascan nantifi nan Zarafo fucashon Diosin tapimani nocofunu ahuun anu Zabdi ahuun yora futsafo murannoa futsan chaca huani.

¹⁸ Ascano Zabdi ahuun yorafo nantifi Josué ointaifi funifo. Ascashon Diosin tapimani nan Carmi facu Acánfin chaca huaniquin.

¹⁹ Ascatan Josué Acán yoini isca huaquin, —Tsain icocoin fusti yoihuun nocon Ifo Diosi noco yononi cuscan. Min ascaifin minrifi min nocon Ifo Dioshuunoa yorafo shinanmasharatiroquin. Dioshuunoa yoisharahuun. Min aca cuscan noco yoihuun. Ua fomanyamahuun, —ishon Josué Acán yoini.

²⁰ Ascaiton Acán cumani isca huaquin, —Icon un nocon Ifo Diosi chaca hua. Unfin isca huaquin.

²¹ Non Jericó mai ano cuyoaitian un oian sahuuti fasi sharacoin mai futsa Babilonia anoshon futsan Jericó mai ano fuaiton un oian. Nan ahuara shara un oian nan doscientos toro cuno oshopa facafacaitsa oinfain oro medio kilo un oian. Un fasi nanfo fuchipaicoinquin un nanfo fishon un onua. Natian uhuun pano pushu muran un mai hua. Nan sahuuti fasi sharacoin un mai hua nonanmanri un oro medio kilo non doscientos toro oshopafo facafacaitsa un mai huaitaran, —ishon Acán Josué yoini.

²² Nannori yoiaiton nicatan Josué nocofunufo nichini. Pano pushu ano ichonifo Acán yoia cuscan nantifi ahuun pushu muran maiya fuchinifo.

²³ Ascano nan pano pushu murannoa fuafo cuscan Josué futan nantifi Israelifoan aton ointaifi Acán onuni cuscan machinifo nocon Ifo Diosin ahuun ointaifiri nantifishon oinonfo.

²⁴ Nanscacatan Josué futan nantifi Israelifoan Acán iyofain nan sahuuti fofain doscientos toro oshopa facafacaitsa fofain nan oro fofain Acán ahuun facufo non moifo non burrofo non chashoanfo non ahuun pano pushu non nantifi aya cuscan Israelifoan machi rafu nushmancayan ahuun anu Acor ano ato iyonifo.

²⁵ Ascatan Josué Acán yoini isca huaquin, —¿Ahuuscai min noco omitsisca huamun? Na shafatan nocon Ifo Diosin mia omitsisca huairan, —ishon yoini. Asca huatan nantifi Israelifoan Acán yafi ahuun yorafo non inafoya toquirinin tsacaquin futsaquin ato rutunifo. Ascashon ato coanifo.

²⁶ Man cooi cuyoafono ato acamaqui toquirifo machinifo. Nantianri nanno nan toquirifo Israelifoan ato camaqui asca huaafo oincai nocon Ifo Diosin afanan atoqui sinanima. Ascashon nanno anunifo isca huaquin, —Machi rafu nushmancayan ahuun anu Acor, —ishon anunifo. Nantianri nannori anumisifo.