Josué 4 - Sharanahua: Diospan Tsain

Unu Jordán mai muto ano doce toquiri uhuapa fishon fonifo

¹ Ascano nantifi Israelifoan unu Jordán pocusharafainifo nocon Ifo Diosin Josué yoini isca huaquin,

² —Nantian min caifo nan doce mani futsafo nocofunu fusti rasi catonhuun.

³ Ato yoihuun nan matohuunshon ua cufinmisifo unu nushmancayan mai mutoano niafo. Nannoa toquiri uhuapa fiipanonfo. Ascatan nan yamu nan oshaifoanno nan doce toquirifo putsainninonfo, —ishon nocon Ifo Diosin Josué yoini.

⁴ Nannori nicatan Josué nan doce nocofunufo cunani aqui funonfo.

⁵ Ascano ato yoini isca huaquin, —Rucu fotacahuun. Mato cachori nan nocon Ifo Diosin noco cunushoni cuscan casho muran noco Diosi cufinshomisifoan foifocani. Nan unu Jordán nushmancayanoa toquiri uhuapa fusti rasi fiipacahuun. Ascano manfin Israeli nocofunufoan nan manifotiton doce toquiri fusti rasifain man fitiroquin.

^6-7 Ascan chipo maton facufoan mato yocaiton isca huaquin yoicahuun, “¿Ahuuscai na doce toquiri nuno putsamuiniamun?” ishon mato yocaiton man ato tapimatiro isca huaquin, “Non unu Jordán pocufainnaitian nocon Ifo Diosin noco ashoai cuscan ahuun cunu casho muran non foaino unucai mananquirinoashu afanan afanima. Shaturiscatani. Ascacun non nuno nan doce toquiri putsamuinia nocon Ifo Diosin noco ashoni cuscan non ointiaquimapacunacamaran,” ishon non nocon facufo yoishquin, —Josué ato yoini.

⁸ Nan nicacatan Josué ato yoini cuscan huanifo. Israelifoan ato manifoti nan doce nocofunufoan unu Jordán nushmancayanoa doce toquiri uhuapa fiinifo nan oshaifoanno focashon nanno putsainishcaquin. Nannori nocon Ifo Diosin Josué yononi.

⁹ Ascan Israelifohuunshon nocon Ifo Diosi cufinmisifoan nan casho focani unu cusumun niafo. Nantianri nocofunu futsafoan doce toquiri fiinifo. Josué ato toquiri nannoshon putsainini. Nan toquirifo putsamuinia natianri nanno.

¹⁰ Nan nocon Ifo Diosin Moisés yononi cuscan nannori Moisés Josué yoini. Ascano nantifi nan yonoa cuscan huacoinnaino Israelifohuunshon nocon Ifo Diosi cufinmisifoan unu Jordán nushmancayan niafoanno Israeli futsafoan unu ocuma futsa pocufainifo. Ascatan nantifi Israelifoan unu pocurisca huafainifo.

¹¹ Ascano nantifi Israelifoan pocufainaino atohuunshon nocon Ifo Dios cufinmisifo nan cashoya ocuma futsa focashon nantifi I

¹² Nantianri Moisés ato yononi cuscan Israeli mani futsa rafu non fusti nan Rubén ahuun funafo non Gad ahuun funafo non atirifi Manasés ahuun funafo aton ashifo non aton piacatifoyashon ocuma futsa pocufainifo. Aton caifo Israelifoan ointaifi rucu pocufainifo.

¹³ Cuarenta mil yora cuana aton ashifoyashon futsafo rutui focaquin pocufainifo Jericó mai mispa ano noconifo.

¹⁴ Ascano nan shafata nocon Ifo Diosin aton nomuran shinanmana cuscan Josuéhuunoa Israelifoan shinansharanifo. —Noco murancai tsoa futsa Josué cuscaramaran, —ishon ahuunoa yoinifo. Nan Moiséshuunoa shinansharanifo cuscan huaquin Josuéhuunoari nan niyoano nannori ahuunoa shinansharanifo.

¹⁵ Ascan nocon Ifo Diosin Josué yoini isca huaquin,

¹⁶ —Matohuunshon ua cufinmisifo yoihuun uhuun tsain nan casho muran focaquin unu Jordán ano mapucahuun, —ishon nocon Ifo Diosin Josué yoini.

¹⁷ Ascashon Josué ato yoini, —Unu Jordán ano mapuyocahuun, —ishon ato yoini.

¹⁸ Nannori nicacatan Josué ato yoia cuscan anifo. Nan Diospan tsain na casho muran focatan mapunifo. Ascano nan mai mutoano niafoanno unu Jordán afanan afafuranaino unu yosiriscatani. Nantian faitanhuariscatani.

¹⁹ Ascano oshu fusti ahuun osha mucu rafuti Israelifo unu Jordán anoashu focani Gilgal mai ano noconifo. Nanno fari oaiquiri Jericó pushu rasi ini.

²⁰ Nan Gilgal anoshon Josué nan doce toquiri unu Jordán nushmancayanoa fiinifo putsainiishcaquin.

²¹ Ascano Josué Israelifo yoini, —Chipo fari ichapa finontan nocon funafoan aton apafo yocashquicani, “¿Ahuuscaimun nuno toquirifo putsamuiniaquin?” ishon yocashquicani,

²² Ascaiton aton apafoan cumatiro isca huaquin, “Maton shunifoan unu Jordán ano mai mutotanaino pocufainnifo,” ishon apafoan cumatirofo.

²³ Nocon Ifo Diosin nocohuunshon unu Jordán nutsoriscatani non nantifishon pocufainon. Nan ununhuan oshin noco nutsomashoni cuscari nan unu Jordán nanscarifi huaquin noco nutsoshoriscatani.

²⁴ Noco asca huashoaiton nantifi manifotifain tapinonfo nocon Ifo Diosi ahuun curushhuunshon ahuamamishti huatiro. Ascacun norifi nocon Ifo Diosihuunoa non shinansharapacunaca noco yonoai cuscan non anon, —ishon Josué ahuun caifofo yoini.