Josué 3 - Sharanahua: Diospan Tsain

Israelifoan unu Jordán pocufainnifo

¹ Ascatan iyoconaino Josué fu nantifi ahuun caifo Israelifo pushu rasi ahuun anu Sitim anoashu unu Jordán cusumunri fonifo. Nanno pocuafotaima nanno iyopaonifo.

^2-3 Osha rafu non fusti finontan Israelifo ato niaifo patasharinoafo pano pushuti ano fonifo nantifi aton caifofo tapimashcaquin isca huaquin, —Diosin noco yononi norifi non nannori shinanoncahuun. Noco yononi cuscan toquiri sapa rafuqui noco cunushoni. Nan toquiri sapa rafu casho muran nanuni. Ascano nan Levitafoan nocohuunshon nocon Ifo Diosi cufinmisifoan nan casho unu cusumun iyashon foaifoan oinquin ato mufaintacahuun.

⁴ Mancai nunoashu raqui fomisima. Ascacun ato mufainfafaincahuun. Man caiquiri marifi man ato fu catiro fai tapishcaquin. Ascatari nan casho chaimashta fishtayamacahuun. Kilometro fusti nitucahuun. Nan casho chaima shara man nitiroran, —ishon niaifo patashinoafoan yoinifo.

⁵ Ascatan Josué Israelifo yoini isca huaquin, —Funamari man ahuara sharafo man oinyomisima cuscaran nocon Ifo Diosin ahuun curushhuunshon mato ismashquin. Ascacun itisharacahuun. Diosi ismacahuun manfin ahuun yoracoinfoquin. Mato yonoa cuscan acahuun, —ishon Josué ato yoini.

⁶ Nantianri Israelifohuunshon nocon Ifo Diosi cufinmisifo Josué ato yoini isca huaquin, —Nan casho iyashon maton yorafo ano rucu fotacahuun, —ishon ato yoini. Ascatan nan Josué ato yonoa cuscan nan nocon Ifo Diosi cufinmisifoan aton yorafo finonfaitan rucu fonifo.

⁷ Ascatan nocon Ifo Diosin Josué yoini isca huaquin, —Na shafata un min caifofo ismai min aton niaifo sharacoincun. Un asca huaiton tapitirofo un Moisés fu ipaoni cuscan un mi furi ipanaca.

⁸ Nan nocofunufo matohuunshon ua cufinmisifo nan casho foaifoan ato yoihuun isca huaquin, “Man unu Jordán cusumunri nocotan unu muran niiyocahuun,” —ishon nocon Ifo Diosin Josué yoini.

⁹ Ascano Josué Israelifo yoini, —Uqui fucahuun nocon Ifo Diosin ahuun tsain nicasharashcaquin.

¹⁰ Nantofin na mai shara noco inanshquiquin nan mai anoshon caifo futsafo nocomaquishon potashquin. Cananeofo potafain Hititafo potafain Heveofo potafain Ferezeofo potafain Gergeseofo potafain Amorreofo potafain Jebuseofo potashquin. Nan ato potacun man tapitiro maton Diosi nan niafin mato fu icaquin.

¹¹ Ascan Diosin noco yononi cuscan norifi nannori non shinanon. ¡Shinancapon! Nocon Ifo Diosin maifoti ato Ifo icano nan toquiri sapa rafuqui noco cunushoni cuscan nan casho muran nanua. Levitafoan rucu foyoifocani unu Jordán ano taui iquiyoi focani.

¹² Ascacun natian maton caifo nan doce mani futsafoti nocofunu fusti catonhuun.

¹³ Ascano Levitafoan nan casho muran nocon Ifo Diosin tsain foifocani unu Jordán iqui tauaifotiancai nan unu afanan mananquirinoashu afashquima. Natian shaturiscatashquin unu ano machihuan iriscatashquiran, —ishon Josué ato yoini.

¹⁴ Ascano Israelifo icanoashu foaifotian unu Jordán pocufainaifotian nan Israelifohuunshon nocon Ifo Diosi cufimisifo rucu fonifo. Nan casho ato rucu foshonifo.

^15-16 Nan ato yono chituaifotian nantianri faitanhuanmisi ini. Ascafiacai nan Israelifohuunshon nocon Ifo Diosi cufinmisifo nan casho foaifoanno nan unu ano iquitauaifoannocai mananquiri afanan unu afanima. Nantian shaturiscaino nan unu ano machin huariscatani. Pushu rasi ahuun anu Adam nan mai Saretán chaimashta unu Jordán nannocai afanan unu afanima. Nan maiquiri unu Jordán ununhuan ahuun anu Arabá murancai afanan unu afanima. Ascano nan unu Jordán nutsotan mai mutotanaino nantifi Israelifoan pocufainifo ocuma futsa Jericó chaimashta mapunifo.

¹⁷ Ascan nantianri nan Israelifohuunshon nocon Ifo Diosi cufinmisifo unu Jordán nushmancayan mai mutoano nan cashoya ninifo. Nanno niyoafoanno nantifi Israelifoan pocufainquin ato finonfainnifo. Ascano nannoshon nan Israelifohuunshon cufinmisifoan niishon manayonifo nantifi aton caifofo unu Jordán ocuma futsa nocosharanonfo.