Josué 24 - Sharanahua: Diospan Tsain

Josué afanan ahuun tsain unutaqui Israelifo yoini

¹ Ascano Josué ato yoini nantifi Israeli manifoti Siquem ano ato ichanan huani. Aton niaifo patasharinoafori ichanan huani Diosi ointaifi funifo.

² Ascashon Josué nantifi Israelifo yoini isca huaquin, —Israelifoan nocon Ifo Diosin mato yoi isca huaquin, “Fari ichapacoin finonni maton shunifoan unu Eufrates ocuma futsa icafo ini. Ua cufintamarocon nan rami huafo cuscan cufinnifo. Nanno maton shunifo Taré yafi furun rafu Abraham yafi Nacor ini.

³ Ascafia un maton shuni Abraham nan mai anoshon ihuuni mai Canaán ano cahuacacaini. Unfin Abraham ahuun funafo ichapacoin inan. Unfin Abraham Isaac inanniquin.

⁴ Ascatari un Isaac furun rafu inanni Jacob yafi Esaú. Un mai machifo ahuun anu Seir Esaú inanni. Ascafiano Jacob fu ahuun furunfo Egipcio mai ari fonifo.

⁵ “Ascano un Moisés yafi Aarón atoqui nichini. Nantian un Egipciofo omitsisca huashon un mato Egipcio mai arishon ihuuni.

⁶ Un mato shunifo Egipcio mai anoshon ihuuni ununhuan oshin ano noconifo. Ascan Egipciofoan aton caballofo non aton taramutifoyashon ato mufaini ununhuan oshi ano atoqui noconifo.

⁷ Ascan maton shunifoan ua fasi cufinnifo un ato numanon. Ascano un ato yafi Egipciofo faquishihuan nushmancayan huashoni Egipciofoan ato oinnonfoma. Ascashon un unuhuan oshi muran Egipciofo asamani nai futsunonfo. Un Egipciofo asamani cuscafin man man oinniquin. “Ascano man fari ichapa tsoa istaipama ano iyopaoni.

⁸ Nan Amorreofo unu Jordán fari oaiquiri icafo ini. Un ato mai ano mato iyoni. Nanfo matoqui funifo mato rutushcaquin. Ascafia uhuunshon man ato rutuqui futsani. Uhuun curushhuunshon man ato rutuqui cuyoshon aton mai fianni.

⁹ Chipo Zipor facu Balac nan Moab mai anoa niaifoan mato rutupaini. Ascano niaifo Balac Beor facu Balaam cunani ua cufinon un mato chaca huanon.

¹⁰ Ascafiacai un Balaam nicapainima. Ascan Balaam matohuunoa tsain chaca huatamarocon matohuunoa tsain shara yoifafainni. Balaam mato chaca huapaifiacai un yonoa cuscan huanima. Un mato numani mato chaca huanonma.

¹¹ “Ascan nan man unu Jordán pocufainni Jericó mai ano man noconi. Nan Jericó anoafo matoqui funifo mato rutupai. Jericó anoafoan mato rutupai cuscan nanscari huaquin Amorreofo non Ferezeofo non Cananeofo non Hititafo non Gergeseofo non Heveofo non Jebuseofori mato rutupainifo. Mato rutupaifiaifoan un ato nitumani nan mato rutuafomarocon man uhuunshon ato rutuni aton mai fiishquin.

¹² Man aton mai ano nocoataima un tau huaquin ato ratumani. Aton niaifo rafu man ato mai anoshon man potanon. Ascano mancai maton nopu non mato piacatifoyashon ato potamarocon unfin ato mai anoshon ato rutui cuyoniquin.

¹³ “Ascan mancai aton mai anoshon yonopaonima. Nan pushu rasi huayamafiashu man ato mai ano ica. Man aton fanafo fanayamafiashon man aton fanafo pifafainni. Unfin aton mai mato inan. Ascacun natian matonaran,” ishon nocon Ifo Diosin noco yoini.

¹⁴ Nocon Ifo Diosin noco yoia cuscan man man nican. Ascacun Diosihuunoa shinansharafain a nicasharacahuun noco yonoai cuscan non huanon. Unu Eufrates fari iquiaiquirinoa yafi Egipcio ano nocon shunifoan dioscoinma cufinnifo. Manrifi asca huayamacahuun. Nan rami huafo potacahuun. Nocon Ifo Diosi fusti cufinfain mato yoiai cuscan fusti huacahuun.

¹⁵ Ascan man nocon Ifo Diosi tanapaiyamaquin catoncahuun tsoan oinmatimain man ipaicain. Unu Eufrates fari iquiaiquirinoa maton shunifoan dioscoinfoma aton oinmati ipaonifo. Ascano nan Amorreofoan aton dioscoinfoma man aton oinmati ipairaca. Nantian Amorreofo mai ano man ica. Ascacun catoncahuun rato diosmain matona itiroquin mato yoia cuscan man anon. Ascafia un non uhuun yorafoan non nocon Ifo Diosi fustiton noco yonoa cuscan non huairan, —ishon Josué Israelifo yoini.

¹⁶ Nannori nicatan Israelifoan Josué cumani, —Noncai nocon Ifo Diosi potanacama. Dioscoinfomafoancai noco yonotiroma.

¹⁷ Nocon Ifo Diosin noco yafi noco shunifo nan mai Egipcio anoshon noco ihuuni. Egipcio mai anoashu non fasi omitsiscapaoni aton yonomatifo non ipaoni. Ascacun nocon Ifo Diosin noco Egipcio mai anoshon noco numani. Nocon Diosin ahuamamishti tsoa futsa atiroma cuscan noco ismani. Non Egipcio anoashu nuno non oaitian caifo futsafo aton maifo finon fuaiton nocon Ifo Diosin nantishotapiquin noco cushusharamisi.

¹⁸ Nan caifo futsafo Amorreofo aton mai anoshon nocon Ifo Diosin ato potani nococai ahuusca huanifoma. Aton mai nocon Ifo Diosin noco inanni. Nanscacufin norifi nocon Ifon Diosi noco yonopaiyai cuscan non acoinnicain. Arus fustifin nocon Diosiquin, —ishon Israelifoan yoinifo.

¹⁹ Ascaiton Josué ato cumani isca huaquin, —Mancai nocon Ifo Diosin ahuun oinmatifo itiroma. Mato yonoai cuscan man atiroma. Aafin shara fustiquin. Ahua chacacai a fu itiroma. Arus fustifin maton ifo ipaiquin. Man ahuara futsafo ifoaino matoqui sinatiro. Mato yonoai cuscan man huayamaino man aqui chaca huaitoncai mato rau huashquima.

²⁰ Man nocon Ifo Dios potashon caifo futsafoan aton dioscoinfoma nan rami huafo man aton oinmati icai mato yonoai cuscan man aiton. Man ascaiton nocon Ifo Diosin mato shara huamisifiashon mato omitsiscamashquin mato namaquin cuyoshquiran, —ishon Josué ato yoini.

²¹ Nannori nicacatan Israelifoan Josué cumanifo, —¡Ma! Noncai dioscoinmafoan aton oinmati iquima. Nonfin nocon Ifo Diosi fustiton ahuun oinmati iquicai noco yonoai cuscan non huairan, —ishon cumanifo.

²² Ascatan Josué afanan ato yoini isca huaquin, —Man yoia cuscan nocon Ifo Diosin man nican. Man yoia cuscan marifi man tapia. Ascacun nanscahuapacucahuun. Man yoimisi, “Nocon Ifo Diosin ahuun oinmatifin non iquicai noco yoiai cuscan non aquiran,” —ishon man yoia. Ascaiton cumanifo isca huaquin, —Icon. Nannori man non yoia nocon Ifo Diosi noco nicaino man non tapiaran, —ishon Israelifoan yoinifo.

²³ Ascaiton Josué ato cumani isca huaquin, —Man yoia cusca iconmainquin caifo futsafoan aton dioscoinfoma potacahuun. Nocon Ifo Diosi yoicahuun isca huaquin, “Ifo Diosin, nonfin min oinmatiquin. Min noco yonopaiyai cuscan non mia ashoshquin. Min nocon Ifo. Min nocon Diosin. Nocon nomuranshon non mia fasi noicoin,” nannori nocon Ifo Diosi iconcoin fusti yoicahuun, —ishon Josué ato yoini.

²⁴ Ascano afanan cumanifo, —Nonfin nocon Ifo Diosi ahuun oinmati iishquin noco yonoai cuscan aashquin. Noncai yoitima ipaima. Non ahuun tsain nicasharacoin noco yonoai cuscan non anon, —ishon yoinifo.

²⁵ Ascatan Josué nan shafata Siquem ano Diosin ato yononi cuscan cunushoni nocon Ifo Diosi ismashquin arus fusti aton Ifo tanasharanonfo.

²⁶ Ascan yoini cuscan Josué ato libro ashoni a muran Ifo Diosin ato yononi cuscan cunushoni. Asca huatan Josué toquiri uhuapa fini ihui ahuun anu encina naman ichananti pushu chaima huani.

²⁷ Ascatan Josué Israelifo yoini isca huaquin, —¡Oincapon! Man nocon Ifo Diosi ahuun ointaifin yoia cuscan nan toquiri oin cafiscaquin man nanfohuunoa shinantiro. Man na shafata nocon Ifo Diosi yoia cusca man huayamaiton na toquiri man oin cafiscaquin man shinantiro nocon Ifo Diosin mato yonoa cuscan man huamaran, —ishon Josué Israelifo yoini.

²⁸ Ahuun tsain yoiquin anaitishon Josué ahuun caifo Israelifo nichini nan mai nocon Ifo Diosi ato inan ano fotanonfo.

Josué nani cuscan

²⁹ Ascano chipo Diospan oinmati Josué nan Nunpan facu ciento diez fariyashu nani.

³⁰ Nan nocon Ifo Diosi Josué mai inanni ahuun anu Timnat-sera. Nanno Josué mai huanifo. Nan mai Efraín machifo ano machi futsa ahuun anu Gaas fari oai istafariri ini.

³¹ Josué niyoatian niaifo patasharinoafo nataicanima aton caifo Israelifoan nocon Ifo Diosi nicacoinnifo nan ato yoini cuscan huanonfo. Nocon Ifo Diosin ato shara huashomisi cuscan man man muumisi.